Ia faufaahia ˈtu â tatou i te tairururaa mataeinaa “Feia poro itoito rahi i te Basileia”

¹ Te hoê porotarama faaitoito: E porotarama faahiahia mau â tei vauvauhia mai i ta tatou tairururaa mataeinaa hopea nei! Ua putuputu tatou no te hoê â tumu: ia ineine maitai aˈe tatou no te faaite haere i te Basileia o te Atua ma te itoito rahi. Te haamanaˈo ra anei outou i te auraa o te ihoparau “e faaite haere” i horoahia e te taeae orero matamua? Te haamanaˈo ra anei outou teihea huru maimiraa i faaitoitohia ia tatou ia rave i roto i te oreroraa parau “Eiaha tatou e mǎtaˈu, tei pihai hoi Iehova ia tatou”? Eaha te mau aamu ta outou i hiˈopoa aˈena?

² Ua horoa mai te oreroraa parau e toru tuhaa “Te huru maitai o to tatou faaroo i tamatahia e te mau fifi rau” e toru tumu rarahi e faatia ˈi Iehova i te hamani-ino-raa. E nehenehe anei ta outou e faahiti mai? Ua niuhia to tatou tiaraa amui ore Kerisetiano i nia i teihea mau irava? Eaha tei faaitoitohia ia tatou ia rave no te faaineine ia tatou iho no te mau tamataraa i taaihia e to tatou tiaraa amui ore? E nafea to tatou faaoromai i roto i te mau tamataraa e arue ai ia Iehova?

³ Eaha te mau tuhaa o te darama “Ia mau papu tatou i te anotau ahoaho” o tei faaitoito roa ˈˈe ia outou? E nafea outou ia pee ia Ieremia?

⁴ Ia au i te oreroraa parau no te taatoaraa ‘Te mou nei te huru o teie nei ao,’ eaha te mau tauiraa rarahi o te aratai atu i te mahana riaria a te Atua ra? E nafea outou ia taai i te mau manaˈo o te oreroraa parau hopea “Ia rahi te mau ohipa maitatai ei feia poro itoito rahi i te Basileia,” e ta outou taviniraa?

⁵ Mau manaˈo faufaa ia faaohipa e tia ˈi: Ia au i te oreroraa parau “Ia faaite outou i te mauruuru,” e nafea tatou e faaite ai i te hohonuraa o to tatou mauruuru ia Iehova? I roto i te oreroraa parau tumu “Ua î roa te feia poro i te Basileia i te itoito rahi,” to vai itoito rahi i faaitoitohia ˈi tatou ia pee? Eaha te hiˈopoaraa i te manaˈo haava i faaitoitohia ia tatou ia rave?

⁶ Eaha na titauraa e toru, i haamahitihitihia i roto i te oreroraa parau e toru tuhaa “E faaitoito mai te parau tohu a Mika ia haere tatou ma te iˈoa o Iehova,” ia raea ia tatou e tia ˈi no te fanaˈo i te farii maitai a Iehova? E naeahia anei te reira? (Mika 6:8) Ia au i te oreroraa parau “A tapea maite i te viivii ore na roto i te parururaa i to outou aau,” i roto i teihea mau tuhaa ia vai mâ noa tatou i te pae morare e tia ˈi? Mai ta te oreroraa parau “A ara i te peu haavare” i faaite, i roto i teihea mau tuhaa e titauhia ˈi ia ara tatou ia ore tatou e haavarehia aore ra e haavare ia vetahi ê?

⁷ Eaha te mau aˈoraa e au o te oreroraa parau e toru tuhaa “Feia poro i te Basileia o te faahanahana i ta ratou taviniraa” ta outou i haamata i te faaohipa i roto i ta outou taviniraa? Ua hiˈopoa te oreroraa parau “E faaitoito te aparauraa pae varua” i te Philipi 4:8. E nafea tera irava ia tauturu ia tatou ia faatupu i te mau aparauraa pae varua e afea tatou ia na reira e tia ˈi?

⁸ Ua faataa mai te oreroraa parau “A tiaturi roa ia Iehova i te anotau ahoaho” e nafea tatou ia faaruru i te ahoaho no te mau ati, no te mau fifi i te pae faaravairaa faufaa, no te maˈi, no te mau fifi utuafare aore ra no te hoê paruparu tamau. E nafea tatou e faaite ai i to tatou tiaturi ia Iehova i mua i taua mau fifi ra?

⁹ Te mau taoˈa apî pae varua: Ua oaoa tatou i te taeraa mai te buka apî ra Adorez le seul vrai Dieu. Eaha to outou huru i te faaiteraahia eaha te fa o tera buka? No te aha te faaohiparaa i te reira ei piti o te buka haapiiraa e riro ai ei mea maitai i roto i te ohipa e faariro i te taata ei pǐpǐ?

¹⁰ I muri aˈe, ua tae mai te buka haviti mau E haafatata ˈtu ia Iehova. Eaha te tahi o to ˈna mau tuhaa taa ê? Eaha te mau hohoˈa ta outou e au iho â râ? Ua fatata ˈtu anei outou ia Iehova i to outou taioraa ˈtu? O vai atu â te nehenehe e faufaahia i tera buka?

¹¹ Ua horoa mai te tairururaa mataeinaa “Feia poro itoito rahi i te Basileia” i te mau faaitoitoraa pae varua e hinaarohia no te faaruru i teie anotau fifi. Ia faufaahia ˈtu â tatou i taua mau faanahoraa faahiahia ra, e rave anaˈe i te mau mea atoa ta tatou e nehenehe no te haamanaˈo i tei parauhia, no te farii maite i tei horoahia mai, e no te faaohipa i ta tatou i haapii. (Pet. 2, 3:14) Ma te na reira, e haapuai tatou ia tatou ia vai hapa ore noa e ia riro tatou ei feia poro itoito rahi i Basileia, mai to tatou Fatu ra o Iesu Mesia, e no te hanahana o Iehova.—Phil. 1:9-11.