Te mau maitai no roto mai i te mauruuru no te here o Iehova—Tuhaa piti
1 I te avaˈe i mahemo, i roto i te tuhaa matamua o teie tumu parau, ua haamataratara tatou e maha ravea e faaite ai tatou i to tatou mauruuru no te here o Iehova i roto i te taviniraa. (Ioa. 1, 4:9-11) E ite mai tatou i ǒ nei e pae ravea ê atu. Ia tauturu roa anaˈe tatou ia vetahi ê i te pae varua, e haamaitaihia tatou.
2 Te pororaa faanaho-ore-hia: E ravea maitai teie ia itea mai ia tatou te feia e poia ra e e poihâ ra i te parau-tia e ia horoa ˈtu i te mau papai bibilia faufaa. Mea maitai ïa ‘faaherehere maite tatou i te taime’ e ia poro i te mau taime maitatai atoa i te taata atoa ta tatou e farerei. (Eph. 5:16) E tia paha ia tatou ia faaitoito, tera râ, mai te peu e ua ite maite tatou i te here o Iehova e i te mau hinaaro o te taata, e poro ïa tatou i te mau taime maitatai atoa.—Tim. 2, 1:7, 8.
3 Ua haamaitai-rahi-hia te hoê taeae mitionare no to ˈna tauaparauraa e te hoê horopatete i roto i te hoê taxi. Ua anaanatae te taata. I muri aˈe e rave rahi farerei-faahou-raa, ua haamata oia i te haapii. Ua haere mai oia i roto i te parau mau, ua haere i mua, e ua riro mai ei matahiapo.
4 Te pororaa na roto i te rata: Peneiaˈe eita ta tatou e nehenehe e haere na te mau fare no te paruparu anei o te tino aore ra e ere i te mahana maitai. E nehenehe tatou e horoa i te hoê faaiteraa poto na roto i te papairaa i te rata i te feia ta tatou i matau, i te feia ua pohe tei herehia, aore ra i te feia aita i te fare. E nehenehe tatou e tuu atoa ˈtu i te hoê apî parau e tano, e poroi bibilia anaanatae to roto, e e faaitoito i te taata taio ia papai atoa mai te peu e e uiraa ta ˈna. A papai i to outou iho vahi nohoraa aore ra to te Piha a te Basileia. Eiaha râ e papai i te vahi nohoraa o te amaa.
5 Te pororaa na roto i te niuniu paraparau: E ravea maitai roa teie no te farerei i te mau taata eita e naeahia e tatou i roto i te pororaa na te mau fare. E noaa mai ia tatou te hoê faahopearaa maitai roa mai te peu e e faaohipa tatou i teie ravea ma te ara maite, ma te aau maitai, ma te ite i te peu, e ma te ite maite. Te horoa ra Ta tatou taviniraa i te Basileia no Fepuare 2001, mau api 5 e 6, i te tahi mau manaˈo tauturu e au ia faaohipahia nafea ia noaa mai te mau faahopearaa maitai aˈe.
6 I to te hoê tuahine pororaa na roto i te niuniu paraparau, ua ui oia i te vahine e ua feruri maite anei oia no nia i to ˈna oraraa no a muri aˈe e to to ˈna utuafare. Ma te pahono mai e e, ua parau te vahine e e faaea noa oia i te fare no to ˈna hepohepo. No to ˈna putapû i te tapitapi mau o te tuahine, ua farii te vahine e farerei ia ˈna i te hoê matete tapiri. Ei faahopearaa, ua farii te vahine i te hoê haapiiraa bibilia!
7 Te manavaraa i te feia ěê: Mai te peu e e aroha tatou i to tatou taata-tupu, e haapao ïa tatou i te feia tae apî mai i ta tatou mau putuputuraa e e manava tatou ia ratou. (Roma 15:7) E faaite atu tatou e to rotopu ratou i te mau taata e anaanatae mau ra i to ratou au-maitai-raa i te pae varua. Ia haapao mau tatou ia ratou e ia pûpû atu tatou i te hoê haapiiraa bibilia, e turaihia paha ïa ratou ia farii i ta tatou tauturu.
8 To tatou haerea maitai: Na roto i to tatou haerea maitai roa, e faanehenehe tatou i te parau mau. (Tito 2:10) Ia faahiti te taata i te mau parau maitatai no nia i te mau Ite no Iehova, te faahanahana ra ïa ratou i to tatou Atua. (Pet. 1, 2:12) E nehenehe te reira e tauturu ia vetahi ê ia haere na te eˈa e tae atu ai i te ora.
9 No te aha e ore ai e hiˈo faahou i teie na ravea e pae e faaite ai tatou i to tatou mauruuru no te here o Iehova e e faaohipa ˈtu? (Ioa. 1, 4:16) Ia na reira tatou, e ooti ïa tatou i te mau maitai rahi.