A apiti maite i roto i te ohipa ootiraa
1 Ua paraparau te mau peropheta a Iehova i te tau tahito oia atoa o Iesu Mesia iho no te hoê ohipa haaputuputuraa. (Isa. 56:8; Ezek. 34:11; Ioa. 10:16) Taua ohipa ra, o te ravehia ra i teie mahana, o te pororaa ïa i te parau apî maitai o te Basileia i te ao atoa nei. (Mat. 24:14) Te itehia ra te taa-ê-raa i roto i te feia e tavini ra i te Atua e te feia aita e tavini ra ia ˈna. (Mal. 3:18) Eaha te auraa o te reira no tatou?
2 Ta tatou iho hopoia: E nehenehe tatou e huti mai i te haapiiraa na roto i te hiˈoraa o Paulo, o tei horoa taatoa ia ˈna i roto i te taviniraa Kerisetiano. Te manaˈo ra oia e e tia ia ˈna ia poro, ia nehenehe te mau taata atoa e faaroo i te parau apî maitai e ia faaorahia mai ratou. Na te reira i turai ia ˈna ia haa noa no ratou. (Roma 1:14-17) Ia hiˈo tatou i te ati ta te huitaata e faaû atu, e ere anei e e hopoia rahi atu â ta tatou i te pororaa ˈtu i te feia o ta tatou tuhaa fenua?—Kor. 1, 9:16.
3 Te taime no te ohipa ma te ru: E nehenehe e faaauhia te pororaa i te hoê ohipa faaoraraa. E tia ia itehia te taata e ia tauturuhia ratou ia imi i te haapuraa hou a maoro roa ˈi. Aita rea taime e toe ra, e e ati to mua i te mau taata. Eita ïa e maerehia e ua faaitoito Iesu i ta ˈna mau pǐpǐ ia ‘pure i te Fatu o te ohipa ia tono â oia i te rave ohipa ei ooti.’—Mat. 9:38.
4 Ma te ite maite i te huru ru o te tau, ua apiti hau atu â e rave rahi mau tavini i te Basileia i roto i taua ohipa faaoraraa ra. E tia o Hirohisa, te hoê taurearea e ora ra e to ˈna mau taeae e mau tuahine apî e maha i roto i te hoê utuafare hoê anaˈe metua, i te hora toru i te aahiata no te opere i te tahi mau vea, no te faaamu i to ˈna utuafare. Noa ˈtu taua tupuraa ra, ua riro Hirohisa, o tei hinaaro e rave hau atu â i roto i te taviniraa, ei pionie tamau. Te vai ra anei te tahi mau ravea e nehenehe ai outou e apiti maite atu â i roto i taua ohipa ra o te ore e tapiti-faahou-hia?
5 “Te poto nei te taime.” (Kor. 1, 7:29) E rave anaˈe ïa i te mau mea atoa i roto i te ohipa faufaa roa ˈˈe e vai ra i te fenua nei: te pororaa i te parau apî maitai o te Basileia e te faariroraa i te taata ei pǐpǐ. Ua faaau Iesu i ta ˈna taviniraa i te ohipa ootiraa. (Mat. 9:35-38) Mai te peu e e apiti maite tatou i roto i taua ohipa ootiraa ra, e hotu mai ta tatou mau tutavaraa. E nehenehe tatou e tauturu i te hoê taata ia amui mai i te nahoa rahi o te feia haamori ia Iehova i faataahia i roto i te Apokalupo 7:9, 10.