Te parau mau no nia i te a muri aˈe
Ua feruri aˈena anei oe eaha te tupu a muri aˈe? Te faaite ra te Bibilia e fatata roa te mau ohipa faufaa roa i te tupu e te mau faahopearaa ta te reira e faatupu i nia i te huitaata na te ao nei.
Ua faataa Iesu nafea tatou e ite e ‘ua fatata te Faatereraa arii a te Atua.’ (Luka 21:31) Ua tohu oia e e tupu te mau ohipa mai te tamaˈi rahi, te mau aueueraa fenua rahi, te oˈe e te maˈi pee. Te ite nei hoi tatou i taua mau ohipa ra i teie nei.—Luka 21:10-17.
Te faaite atoa ra te Bibilia e i “te mau mahana hopea” o te faatereraa a te taata, e haa te feia ma te ino mau. E faataahia te reira i roto i te Timoteo 2, 3:1-5. A ite ai oe i taua mau haerea e ohipa ra i teie mahana, e papu ia oe e e tuati teie parau tohu Bibilia i te ohipa e tupu ra i teie nei.
Eaha ïa te auraa? Fatata roa te Faatereraa arii a te Atua i te rave i te mau tauiraa rahi no te haamaitai roa i te oraraa i nia i te fenua. (Luka 21:36) I roto i te Bibilia, te fafau ra te Atua e e faatupu oia i te mau ohipa maitai no te fenua e no te feia e ora ˈtu. Teie te tahi mau hiˈoraa.
TE HOÊ FAATERERAA MAITAI
“E ua horoahia maira [ia Iesu] te mana, e te hinuhinu, e te basileia no ˈna, ia auraro mai te taata atoa, e te mau fenua atoa, e te reo atoa ia ˈna; to ˈna mana, e mana mure ore ïa, e ore ïa e mou, e to ˈna basileia, e ore ïa e pau.”—DANIELA 7:14.
Eaha te auraa? Ua haamau te Atua i te hoê basileia aore ra faatereraa arii hau aˈe i te teitei o te faatere i te fenua atoa. O ta ˈna Tamaiti te Arii. E nehenehe oe e ora ma te oaoa i raro aˈe i taua faatereraa arii ra.
TE HOÊ EA MAITAI
“E ore hoi to reira e parau e, Ua paruparu vau i te maˈi.”—ISAIA 33:24.
Eaha te auraa? Eita roa ˈtu oe e maˈihia aore ra e tino paruparu to oe. E ora râ oe e a muri noa ˈtu.
TE HAU NA TE AO NEI
“Ua faaore oia i te tamaˈi e tae roa aˈenei i te hopea fenua!”—SALAMO 46:9.
Eaha te auraa? Eita faahou e itehia te tamaˈi e te mauiui ta te reira e faatupu.
E Î TE FENUA I TE FEIA MAITAI
“No parahirahi aˈe te paieti ore, e aita ra . . . Area te feia mǎrû ra, e parahi ïa i te fenua.”—SALAMO 37:10, 11.
Eaha te auraa? Eita faahou e taata ino, o te feia anaˈe râ e hinaaro e auraro i te Atua.
E RIRO TE FENUA ATOA EI PARADAISO
“E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira.”—ISAIA 65:21, 22.
Eaha te auraa? E riro te fenua atoa ei ô nehenehe roa. E faatupu te Atua i ta tatou pure, oia hoi ia tupu to ˈna hinaaro “i te fenua nei.”—Mataio 6:10.