A ani i te tauturu a Iehova na roto i te pure
1 Ua faataa maitai Iesu i ta ˈna mau pǐpǐ e te titau ra ta ratou taviniraa i te haamaitairaa a Iehova. (Mat. 9:37, 38) Te faaite nei ta tatou mau pure haavare ore, oia hoi te mau pure arueraa e te mau pure haamaitairaa, oia atoa te mau aniraa rotahi e te mau taparuraa e, te tiaturi taatoa nei tatou i nia i te tauturu a Iehova. (Phil. 4:6, 7) Te faaue maira te mau Papai ia tatou ia pure “i te mau pure atoa ra, [“e te mau taparuraa,” MN]” e mai te reira atoa no te mau pure no nia i te taviniraa.—Eph. 6:18.
2 Te arue nei tatou ia Iehova na roto i te pure no to ˈna mau huru maitatai e ta ˈna mau ohipa faahiahia. Te arue atoa nei tatou ia ˈna no te mea o oia te Tumu o te parau apî maitai ta tatou e poro ra. E tia oia ia aruehia, maoti oia e manuïa ˈi ta tatou taviniraa.—Sal. 127:1.
3 Na roto i ta tatou mau pure haamauruururaa, te faaite nei tatou i to tatou mauruuru ia Iehova no to ˈna faataaraa mai ia tatou i to ˈna hinaaro e ta ˈna opuaraa. E ere anei e haamaitairaa ia faaite i te mau parau mau o te Basileia? E haamauruuru anaˈe ia Iehova no te mau mea atoa ta tatou e rave ra i roto i te taviniraa.—Sal. 107:8; Eph. 5:20.
4 Ma te tano roa, e ani tatou ia Iehova ia tauturu oia ia tatou i te maimiraa i te feia e farii e haapii i te Bibilia e ia haaputapû i to ratou mafatu. Na roto i teie mau aniraa, te farii nei tatou e o te Atua anaˈe te nehenehe e faahotu i ta tatou taviniraa.—Kor. 1, 3:5-7.
5 I roto i ta ˈna eˈa opereraa vea, ua manaˈo te hoê tuahine e aita te hoê vahine e taio ra i Te Pare Tiairaa e te A ara mai na! Ma te ore e hinaaro e haamâuˈa i teie mau vea faufaa, ua ani oia ia Iehova e eiaha ïa teie vahine e farii faahou i te mau vea mai te peu e eita oia e taio. I to ˈna hoˈi-faahou-raa e farerei i muri aˈe, ua parau te tane a taua vahine ra e: “Mauruuru i to oe afai-noa-raa mai na mâua i taua mau vea ra. Mea au roa na ˈu ia taio i te reira.”
6 Maoti te mau pure hohonu e te haehaa e nehenehe ai tatou e taparu ia Iehova ia tauturu mai ia tatou ia haapaiuma i te tâuˈa ore, te mau faaooo, e te mǎtaˈu i te taata, ia tamau tatou i te faaite ma te itoito. (Ohi. 4:31) Mai te peu e e pure tatou na roto “i te mau pure atoa ra, [“e te mau taparuraa,” MN]” e e rave tamau tatou i ta tatou taviniraa moˈa ma te auraro, e nehenehe ïa tatou e tiaturi papu e e tauturu mai Iehova ia tatou!—Ioa. 1, 3:22.