Te mau tiaau o te aratai nei ia tatou: te taeae faatere i te haapiiraa o Te Pare Tiairaa
1 Te Pare Tiairaa—Te faaite ra i te Basileia o Iehova, o te faanahoraa matamua ïa i ravehia e “te tavini haapao maitai e te paari” no te horoa mai i te maa pae varua na tatou “i te hora mau ra.” (Mat. 24:45) E hopoia faufaa roa ta te matahiapo e aratai ra i te haapiiraa o Te Pare Tiairaa: e tia ia ˈna ia riro mai ei taata aravihi no te haapii, ei Kerisetiano hiˈoraa maitai.—Roma 12:7; Iak. 3:1.
2 No te haapii ma te aravihi, e tia i te taeae faatere i te haapiiraa o Te Pare Tiairaa ia faaineine maitai ia ˈna i te mau hebedoma atoa. E na reira oia na roto i te pure e ma te haapao maite. E itehia to ˈna anaanatae mau i te amuiraa i roto i ta ˈna mau tutavaraa haavare ore ia haaputapû te mau tumu parau e tuatapapahia ra i to tatou mafatu. E onoono oia i nia i te mau manaˈo faufaa o te haapiiraa e e tauturu oia ia tatou ia taa i to ratou taairaa e te upoo parau o te haapiiraa.
3 No te faaineine maitai ia ˈna, e tia ia ˈna ia taio i te mau irava Bibilia ia ite oia nafea ia faaohipa i te reira. E haafaufaa oia i te Parau a te Atua na roto i te faaitoitoraa i te amuiraa ia faaohipa maitai i te Bibilia i roto i te haapiiraa. Mai te peu e, i roto i te mau pahonoraa a te mau melo o te amuiraa, ua moehia te hoê manaˈo faufaa aore ra te faaohiparaa o te hoê irava tumu, e ui ïa te taeae faatere i te tahi atu â uiraa papu no te haamatara i te manaˈo. Inaha, e aratai oia ia tatou ia huti i te mau faaotiraa maitatai e e haamaramarama mai oia ia tatou nafea ia faaohipa i te mea ta tatou e haapii ra i roto i to tatou oraraa.
4 E tutava te taeae faatere i te haapiiraa o Te Pare Tiairaa i te riro mai ei taata aravihi roa no te haapii. Eita o ˈna e paraparau rahi roa, e titau râ oia ia tatou ia pahono ma ta haapoto e ma te papu na roto i ta tatou iho mau parau. I te tahi taime, e nehenehe oia e faahaamanaˈo e e tia i te taata matamua o te pahono ra i nia i te hoê paratarapha ia pahono roa ˈtu i te uiraa e ma te haapoto. E faataa te mau pahonoraa i muri mai a te feia i putuputu mai i te hoê irava Bibilia, e horoa i te hoê manaˈo hau aore ra i te faaohiparaa ohie o te mau manaˈo i haapiihia. Te fa a te taeae faatere i te haapiiraa o Te Pare Tiairaa, o te horoaraa ïa i te hiaai i te taata taitahi ia apiti ma te faaitoito i te faaineineraa tataitahi aore ra e te utuafare.
5 Tatou o te ‘haapiihia ra e Iehova,’ te mauruuru nei tatou i “te mau [“ô,” MN] taata,” mai te mau taeae faatere i te haapiiraa o Te Pare Tiairaa, o te ‘ohipa puai nei i roto i te haapiiraa.’—Isa. 54:13; Eph. 4:8, 11; Tim. 1, 5:17.