E haere “rahi atu â” tatou i te mau putuputuraa
1 Ua riro noa na ei mea faufaa no te nunaa o Iehova ia putuputu. I ǒ i te mau ati Iseraela, ua riro te hiero e te mau sunago ei pu no te haamoriraa mau; i reira ratou e fanaˈo ai i te haapiiraa no ǒ mai i te Atua ra e e putuputu ai ma te oaoa. Oia atoa, eita te mau Kerisetiano matamua e faarue i ta ratou mau putuputuraa. A maraa noa ˈi te mau faaheporaa e te mau tamataraa i te anotau hopea nei fifi roa e orahia ra e tatou, te hinaaro atoa nei tatou ia puaihia tatou i te pae varua na roto i te mau putuputuraa a te amuiraa; e e “rahi atu â” to tatou hinaaro. (Heb. 10:25) E tapea mai tatou e toru tumu tatou e haere ai i te mau putuputuraa.
2 No te amuimuiraa: Te faaue ra te mau Papai ia tatou ia ‘haamahanahana noa tatou ia tatou iho, e ia faatupu i te maitai te tahi i te tahi.’ (Tes. 1, 5:11) E faaî te amuimuiraa e te feia e mǎtaˈu ra i te Atua i to tatou feruriraa i te mau manaˈo maitatai e e turai te reira ia tatou ia rave i te mau ohipa maitatai. Mai te peu râ e e faaatea ê mai tatou, e nehenehe e ô mai te mau manaˈo maamaa, miimii aore ra faufau.—Mas. 18:1.
3 No te haapiiraa: Te horoa nei te mau putuputuraa kerisetiano i te hoê haapiiraa Bibilia tamau no te atuatu i te here no te Atua i roto i to tatou mafatu. Te pûpû ra te reira i te mau haapiiraa ohie no te faaohipa “i te hinaaro atoa o te Atua.” (Ohi. 20:27) Te haapii nei te mau putuputuraa ia tatou i roto i te aravihiraa o te pororaa e te faaiteraa i te parau apî maitai, tei riro ei mea faufaa roa ˈtu â ïa i teie mahana no te fanaˈo i te oaoa faito ore ia ite e ia tauturu i te mau taata o te farii ra i te parau mau a te Bibilia.
4 No te parururaa: I roto i to tatou ao ino, ua riro te amuiraa ei haapuraa mau i te pae varua, ei pu no te hau e te here. Ia haere anaˈe tatou i te mau putuputuraa a te amuiraa, e ohipa puai mai te varua moˈa o Iehova i nia ia tatou; e faatupu oia i te mau hotu oia hoi ‘te [here], te oaoa, te hau, te faaoromai, te [hamani maitai], te maitai, te faaroo, te [mǎrû], te hitahita ore.’ (Gal. 5:22, 23; MN) E haapaari te mau putuputuraa i to tatou hinaaro papu ia tapea maite e ia vai aueue ore tatou i roto i te faaroo. E faaineine te reira ia tatou i mua i te mau tamataraa.
5 Na roto i te haere-tamau-raa i te mau putuputuraa, te putapû nei tatou i te mau parau i faahitihia e te papai salamo i roto i te Salamo 133:1, 3: “Inaha hoi, te maitai e te popou, ia parahi atoa te mau taeae ma te au maite!” Noa ˈtu eaha te vahi i reira te mau taata e tavini ai i te Atua e e putuputu ai i teie mahana, “i reira Iehova i te faaueraa i te maitai, e ua horoa mai i te ora e a muri noa ˈtu.”