Pahonoraa i ta outou mau uiraa

◼ Ia anihia mai te hoê amuiraa ia faanaho i te hunaraa maˈi o te hoê taata, teie paha te mau uiraa e uihia mai:

Na vai e vauvau i te oreroraa parau hunaraa? Na te mau fetii e rave i teie faaotiraa. E nehenehe ratou e maiti i te hoê taeae bapetizohia e roo maitai to ˈna. Mai te peu e e anihia te hoê taeae orero i te tino matahiapo, e maiti ïa ratou i te hoê matahiapo aravihi roa no te vauvau i te hoê oreroraa parau i niuhia i nia i te tino parau a te Taiete. Eiaha e arue rahi roa i te taata i pohe, tera râ, peneiaˈe e tano ia faahiti i te tahi mau huru maitatai o ta ˈna i faaite na.

E nehenehe anei e faaohipa i te Piha no te Basileia? E nehenehe, mai te peu e e farii te tino matahiapo, e mai te peu e eita te reira e faahuehue i te porotarama matauhia o te mau putuputuraa. E nehenehe e faaohipa i te piha mai te peu e e roo maitai to te taata i pohe e e melo oia no te amuiraa, aore ra mai te peu e e tamarii aita i naeahia te matahiti na te hoê melo o te amuiraa. Mai te peu e ua matauhia taua taata ra no to ˈna haerea tei ore i au i te Kerisetiano, aore ra no te tahi atu mau tumu e nehenehe ai te roo o te amuiraa e faainohia, eita paha ïa te mau matahiapo e farii e ia faaohipahia te Piha no te Basileia.—Hiˈo Notre ministère, api 62.

Ia au i tei matauhia, eita te Piha no te Basileia e faaohipahia no te hunaraa o te mau fetii e ere i te Ite no Iehova o te hoê utuafare kerisetiano. E nehenehe râ e fariihia mai te peu e e mau taata poro bapetizohia itoito te mau melo o te utuafare o te taata i pohe, mai te peu e ua matauhia te taata i pohe e te mau taeae e te mau tuahine e rave rahi no to ˈna haerea farii maitai i te parau mau, e ua matauhia oia no to ˈna haerea maitai, e mai te peu e eita e anoihia mai i roto i te oroa hunaraa te tahi mau peu a teie nei ao.

Mai te peu e e farii te mau matahiapo e ia faaohipahia te piha, e tia ia ratou ia feruri e e peu matauhia anei ia afai mai i te afata maˈi i roto i te piha no te oroa hunaraa. Mai te peu e e peu matauhia, e nehenehe ratou e farii e ia afaihia mai i roto i te piha.

E no te hunaraa o te mau taata e ere i te Ite no Iehova? Mai te peu e e roo maitai to te taata i pohe i rotopu i te feia i matau ia ˈna, e nehenehe paha te hoê taeae e horoa i te hoê oreroraa parau Bibilia e tamahanahana i te fare oroa hunaraa aore ra i te menema. Eita te amuiraa e farii i te haapao i te oroa hunaraa o te hoê taata i matauhia no to ˈna haerea taiata aore ra ofati ture, aore ra aita roa ˈtu to ˈna oraraa i tuea e te mau faaueraa tumu Bibilia. Eita roa ˈtu e tia i te hoê taeae ia apiti atu e te hoê ekalesiatiko no te faatupu i te hoê oroa eukumene, aore ra ia faatere i te oroa hunaraa i roto roa i te hoê fare pure a Babulonia Rahi.

Eaha te tia ia rave mai te peu e ua tiavaruhia na te taata i pohe? Te mea matauhia, eita te amuiraa e haapao i to ˈna hunaraa. Eita te Piha no te Basileia e faaohipahia. Mai te peu e ua faaite na te taata i to ˈna tatarahapa e to ˈna hinaaro e ia faahoˈihia mai oia i roto i te amuiraa, peneiaˈe e faatia te haava manaˈo o te hoê taeae ia vauvau i te hoê oreroraa parau Bibilia i te fare oroa hunaraa, aore ra i te menema no te horoa i te hoê faaiteraa i mua i te feia e ere i te Ite no Iehova i tae mai, e no te tamahanahana i te mau fetii. Teie râ, hou oia e rave ai i teie faaotiraa, e tano e ia paraparau na mua te taeae i te tino matahiapo e ia haapao oia i ta ratou mau aratairaa. Mai te peu e, i roto i te tahi mau tupuraa, eita e tano e na teie taeae e horoa i te oreroraa parau, peneiaˈe e tano e na te hoê taeae no roto i te fetii o te taata i pohe e vauvau i te hoê oreroraa parau no te tamǎrû i te oto o te mau fetii.

Te vai ra te tahi atu mau haamaramaramaraa i roto i te mau vea i muri nei: La Tour de Garde, 15 no Atopa 1990, api 30-1; Te Pare Tiairaa, 1 no Mati 1982, api 17-19; La Tour de Garde, 15 no Tiunu 1980, api 5-7; 1 no Setepa 1978, api 5-8; 1 no Setepa 1977, api 539-40; 1 no Tenuare 1971, api 31-2; e Réveillez-vous!, 8 no Setepa 1990, api 22-3; A ara mai na!, 8 no Eperera 1978, api 5-9.