Nafea ia faariro i te mau taata ei pǐpǐ maoti te buka Te ite
1 Te tapao maitai a te mau Kerisetiano atoa, o te haapiiraa ïa i te parau mau ia vetahi ê e te faariroraa i te mau taata e “haerea fariihia to ratou no te ora mure ore,” ei pǐpǐ. (Ohi. 13:48, MN; Mat. 28:19, 20) No te tauturu ia tatou, ua horoa mai te faanahonahoraa a Iehova i te hoê mauhaa faahiahia roa: te buka Te ite e aratai i te ora mure ore. Te haamatara ra teie upoo parau i te faufaaraa taa ê roa o te mau haapiiraa o te Bibilia i te fare o te taata. Oia mau, no te fanaˈo i te ora mure ore, e tia ia haapii ia noaa mai te ite no nia ia Iehova, te Atua mau hoê roa, e ta ˈna Tamaiti, o Iesu Mesia.—Ioa. 17:3.
2 I teie nei, o te buka Te ite te buka matamua a te Taiete e faaohipahia i roto i te mau haapiiraa o te Bibilia i te fare o te taata. Maoti te reira, e nehenehe ta tatou e haapii i te parau mau i te taata ma te ohie, ma te maramarama e ma te haapoto. Na te reira e tauturu mai ia haaputapû te mafatu o te feia o ta tatou e haapii nei. (Luka 24:32) Parau mau, e mea titauhia i te taata e faatere i te haapiiraa ia faaohipa i te mau ravea maitatai no te haapiiraa. No reira i faaineinehia ˈi teie api hau, no te horoaraa ˈtu i te tahi mau manaˈo tauturu e te mau faahaamanaˈoraa no nia i te mau ravea aravihi no te haapiiraa. Ma te ite-maite-raa e ia au i to tatou huru tupuraa, e nehenehe mau â tatou e faaohipa mǎrû noa vetahi o teie mau manaˈo tauturu, e te taatoaraa atoa. A faaherehere i teie api hau e a taio pinepine. E rave rahi manaˈo i roto o te nehenehe e tauturu ia tatou ia aravihi atu â ia faaohipa tatou i te buka Te ite no te faariro i te mau taata ei pǐpǐ.
3 E faatere anaˈe i te hoê haapiiraa o te Bibilia ma te haere rii mǎrû noa i mua: Ia anaanatae roa ˈtu tatou e ma te aau rotahi i te taata haapii, ma te faariro ia ˈna ei pǐpǐ kerisetiano e ei taeae aore ra ei tuahine puai i muri iho. Ia faaite tatou i te huru mahanahana, auhoa e te aau tae. Mai te peu e e feia faaroo maitai tatou, e matau ïa tatou i te taata—to ˈna oraraa i mutaa ihora e to ˈna huru oraraa i teie nei—o te nehenehe hoi e tauturu mai ia ite tatou e eaha te ravea maitai roa ˈˈe no te tauturu ia ˈna i te pae varua. Ia ineine ïa tatou i te horoa ia tatou iho no te maitai o te taata haapii.—Tes. 1, 2:8.
4 Ia mau maitai anaˈe te haapiiraa, e tano ia hiˈopoa i te mau pene o te buka Te ite te tahi i muri iho i te tahi. E taa mǎrû noa ïa te taata haapii i te parau mau, no te mea te tatara ra te buka i te mau tumu parau a te Bibilia ma te huru maramarama roa ˈˈe. A faatere noa i te haapiiraa ma te ohie e te anaanatae, ia riro hoi ei mea oraora e ia haere i mua. (Roma 12:11) Ia au i te huru oraraa e te mau aravihi o te taata haapii, peneiaˈe e nehenehe ta outou e hiˈopoa i te rahiraa o te mau pene i roto i te hoê noa haapiiraa e hoê hora, ma te ore râ e tairipaa i te haapiiraa. E haere oioi aˈe te feia haapii i mua mai te peu e e faatura te taata faatere i te haapiiraa e te taata haapii i te taime haapiiraa i te mau hebedoma atoa. Peneiaˈe, e nehenehe e hiˈopoa e te rahiraa o te mau taata i na pene e 19 o te buka i roto e ono avaˈe.
5 A haamata i te haapiiraa tataitahi e te mau manaˈo poto o te faaara i te anaanatae no te mau tumu parau. E ite outou e ua riro te upoo parau o te pene tataitahi ei tumu parau e tatarahia mai. Te haamatara ra te upoo parau iti tataitahi i te hoê manaˈo faufaa, o te tauturu ïa ia outou ia haamanaˈo i te tumu parau o te pene. Eiaha e paraparau rahi roa. A tutava râ i te haaparaparau i te taata haapii. Na roto i te aniraa ˈtu i te taata haapii i te mau uiraa faatanohia, ia au i te mau mea ta ˈna i ite aˈena, e tauturu outou ia ˈna ia feruri e ia huti mai i te mau faaotiraa maitatai. (Mat. 17:24-26; Luka 10:25-37; hiˈo te Buka no te Haapiiraa [farani], api 50, § 10.) A pee maite i te mau haamaramaramaraa i roto i te buka Te ite. Mai te peu e e faaô mai outou i te tahi atu mau tuhaa hau, e atea ê ïa outou i te mau manaˈo faufaa aore ra e moehia ia outou, o te faaroa ˈtu â ïa i te haapiiraa. (Ioa. 16:12) Mai te peu e e faahitihia te hoê uiraa e aita e tuea ra e te haapiiraa e tuatapapahia ra, e pinepine e nehenehe ta outou e pahono i te reira ia hope te haapiiraa. E hope ïa ia outou te haapiiraa o te hebedoma ma te ore e faananea. A parau atu i te taata haapii e e pahonohia iho â te rahiraa o ta ˈna mau uiraa i te roaraa o te haapiiraa.—Hiˈo te Buka no te Haapiiraa, api 94, § 14.
6 Mai te peu e te tiaturi rahi ra te taata haapii i te Toru Tahi, i te pohe-ore-raa o te nephe, i te po auahi aore ra i te tahi atu mau haapiiraa haavare e aita o ˈna i navai i te faataaraa a te buka Te ite, e nehenehe ïa outou e horoa ˈtu i te buka Haaferuriraa (farani) aore ra te tahi atu papai no nia i te tumu parau. A parau atu ia ˈna e e paraparau â orua i muri iho oia e feruri ai i nia i te mea o ta ˈna i taio.
7 Ma te haamata e ma te faaoti i te haapiiraa na roto i te pure no te ani i te aratairaa a Iehova, te faaturahia ra ïa taua taime ra, e e tuuhia ïa te taata tataitahi i roto i te hoê huru feruriraa tura, ma te tuu ia Iehova na mua ei Orometua mau. (Ioa. 6:45) Mai te peu e te puhipuhi noa ra te taata haapii i te avaava, e tia paha ia ani ia ˈna ia ore e puhipuhi i te avaava i roto i te haapiiraa.—Ohi. 24:16; Iak. 4:3.
8 E haapii anaˈe ma te aravihi maoti te mau Papai, te mau hiˈoraa e te mau uiraa no te faahaamanaˈoraa: Noa ˈtu e ehia rahiraa taime to tatou haapii-noa-raa i te mau tumu parau: e tuatapapa faahou te hoê taata faatere aravihi i te haapiiraa i te mau haapiiraa tataitahi, ma te manaˈo i te hoê taata taa ê e haapii ra. Na te reira e tauturu ia ˈna ia ite atea i te tahi o ta ˈna mau uiraa. No te haapii ma te aravihi, ia taa maitai ia outou te mau manaˈo faufaa o te pene. A taio i te mau irava no te ite i te tuearaa e te mau tumu parau e a faaoti e teihea mau irava te taio i roto i te haapiiraa. A feruri maitai i nia i te ravea e nehenehe ai outou e haapii maoti te mau hohoˈa e te mau uiraa no te faahaamanaˈoraa i te pae hopea o te pene.
9 Na roto i te faaohiparaa i te mau Papai ma te aravihi, e tauturu ïa outou i te taata haapii ia ite e te haapii mau ra o ˈna i te Bibilia. (Ohi. 17:11) A faaohipa i te tumu parau tarenihia “Ia matau na oe i ta oe Bibilia,” i te api 14 o te buka Te ite, no te haapii ia ˈna ia imi i te mau irava. A faaite ia ˈna e nafea e itehia ˈi te mau irava i faahitihia i roto i te haapiiraa. Mai te peu e e taime, a imi e a taio i te mau irava i horoahia ei faahororaa aita râ i faahitihia. A ani i te taata haapii ia faataa mai eaha ta teie mau irava e haapapu ra aore ra e haamaramarama maira no nia i te manaˈo o te paratarapha. A haamatara i te mau tuhaa faufaa o te mau irava ia taa i te taata haapii te tumu o te mau manaˈo matamua o te haapiiraa. (Neh. 8:8) I te pae rahi, aita e faufaa ia faaô mai te taata faatere i te haapiiraa i roto i te aparauraa i te mau irava ê atu i tei itehia ra i roto i te buka. A faataa i te faufaaraa ia ite i te iˈoa e te anairaa o te mau buka o te Bibilia. E mea faufaa paha no te taata haapii ia taio i Te Pare Tiairaa 15 no Tiunu 1991, mau api 27-30 (farani). Ia tae i te taime tano, a faaitoito i te faaohiparaa i te Tatararaa a te ao apî (farani). E nehenehe outou e faaite mǎrû noa e nafea ia faaohipa i to ˈna mau tuhaa taa ê, mai te mau faahororaa i ropu i te mau api e te tabula o te mau taˈo a te Bibilia.
10 Te faaite maira te haapiiraa 34 o te Buka no te Haapiiraa o te taviniraa teotaratia e e faaara te mau hiˈoraa aore ra te mau faahohoˈaraa i te feruriraa e e turai ia taa ohie i te mau manaˈo apî. Te haaputapû ra te reira i te maramarama e tae noa ˈtu i te mau manaˈo hohonu, ia horoahia te poroi ma te puai mau, e i te rahiraa o te taime, eita e nehenehe na roto noa i te tahi mau faatiaraa parau. (Mat. 13:34) E rave rahi hiˈoraa ohie e te puai râ i roto i te buka Te ite no te haapii. No reira, te itehia ra i roto i te pene 17, te hoê hiˈoraa o te turai ia tatou ia mauruuru no to Iehova horoaraa mai, i te pae varua, te maa, te ahu e te paruru na roto i te amuiraa kerisetiano. E nehenehe te mau hohoˈa nehenehe penihia o te buka Te ite e faaohipahia ma te aravihi no te haaputapû te mau manaˈo hohonu. Na roto i te hiˈopoaraa i te upoo parau iti “Te tia-faahou-raa oaoa mau” i te api 185, e ohipa hau atu â te paratarapha 18 i nia i te taata haapii mai te peu e e hiˈo oia i te hohoˈa i te api 86. Peneiaˈe e turai te reira ia ˈna ia faariro i te tia-faahou-raa ei ohipa mau no te Basileia o te Atua.
11 E tia i te feia haapii i te Bibilia ia haere i mua i te pae varua i te haapiiraa tataitahi. No reira eiaha e haamoe i te ui i te mau uiraa no te faahaamanaˈoraa i roto i te tumu parau tarenihia “A hiˈopoa na i to oe ite” i te pae hopea o te pene tataitahi. Eita e navai ia pahono noa oia mai ia au i tei papaihia. Te tapao o vetahi o teie mau uiraa, o te titauraa ïa i ta ˈna iho pahonoraa no roto roa mai i te mafatu. Ei hiˈoraa, a hiˈo na i te api 31, te anihia ra i te taata haapii e: “Eaha te mau huru maitai o te Atua ra o Iehova o te haaputapû taa ê ra ia oe?”—Kor. 2, 13:5.
12 A haapii i te feia haapii ia faaineine no te haapiiraa: Te hoê taata haapii o te taio na mua i te haapiiraa, o te reni i te mau pahonoraa e o te feruri i nia i te ravea e nehenehe ai o ˈna e pahono na roto i ta ˈna iho mau parau, e haere oioi ïa o ˈna i mua i te pae varua. Na roto i to outou hiˈoraa e ta outou mau faaitoitoraa, e nehenehe outou e haapii ia ˈna ia faaineine no te haapiiraa. A faaite atu ia ˈna i ta outou buka, e ua reni outou i te mau pereota e te mau taˈo faufaa. A faaite atu ia ˈna e nafea ia ite roa i te mau pahonoraa i te mau uiraa neneihia. E nehenehe ta outou e tauturu i te taata haapii ma te faaineine i te hoê pene e o ˈna. A faaitoito ia ˈna ia pahono mai na roto i ta ˈna mau parau. Tera anaˈe te ravea e ite ai outou e ua taa mau anei ia ˈna te mau tumu parau. Mai te peu e e taio o ˈna i te pahonoraa i roto i te buka, e nehenehe ta outou e faaara i to ˈna aravihi e haaferuri ma te ani ia ˈna e nafea o ˈna ia faataa i teie manaˈo i te tahi atu taata na roto i ta ˈna iho mau parau.
13 A faaitoito i te taata haapii ia imi i te mau irava aita i faahitihia i roto i ta ˈna faaineineraa o te hebedoma, no te mea aita paha to outou e taime no te taio pauroa i roto i te haapiiraa. A haapopou ia ˈna no ta ˈna mau tutavaraa na roto i te faaineineraa i ta ˈna mau haapiiraa. (Pet. 2, 1:5; hiˈo Te Pare Tiairaa 15 no Atete 1993, mau api 13-14, te vai ra te tahi mau manaˈo tauturu no nia i te mea e nehenehe e ravehia e te taata faatere i te haapiiraa e te taata haapii atoa ia nehenehe hoi oia e tuatapapa maitai aˈe i roto i te haapiiraa i te Bibilia.) Na roto i teie raveraa, e haapii ïa o ˈna i te faaineine ia ˈna no te mau putuputuraa o te amuiraa e ia horoa i te mau pahonoraa anaanatae. E haapii ïa o ˈna e nafea ia haamatau i te tahi mau peu maitatai no nia i te haapiiraa tataitahi; ua ineine maitai ïa o ˈna no te tamau i te haere i mua i roto i te parau mau ia oti anaˈe ta ˈna haapiiraa o te Bibilia i nia i te buka Te ite.—Tim. 1, 4:15; Pet. 1, 2:2.
14 E aratai anaˈe i te feia haapii i roto i te faanahonahoraa a Iehova: E hopoia ta te feia e faariro ra i te mau taata ei pǐpǐ, e aratai i te feia haapii i roto i te faanahonahoraa a Iehova. E haere oioi noa te taata haapii i te paariraa i te pae varua mai te peu e e farii e e haafaufaa o ˈna i te faanahonahoraa a te Atua e mai te peu e te ite ra o ˈna e e tia ia ˈna ia faaô atu i roto. Te hinaaro nei tatou e ia oaoa o ˈna i te amuimui e te mau tavini a te Atua e ia haere mai na muri iho ia tatou i te Piha no te Basileia, i reira o ˈna e fanaˈo ai i te turu i te pae varua e i te pae morare a te amuiraa kerisetiano.—Tim. 1, 3:15.
15 Ua neneihia te vea iti Te mau Ite no Iehova—Tahoêhia no te faatupu i te hinaaro o te Atua i nia i te fenua taatoa nei ia nehenehe te mau taata ia haamatau i te faanahonahoraa hoê roa ta Iehova e faaohipa ra i to tatou nei mahana no te faatupu i to ˈna hinaaro. Ia haamau-maitai-hia anaˈe te haapiiraa, no te aha e ore ai e horoa ˈtu i te tahi vea iti na te taata haapii? I te omuaraa, a tamau i te titau manihini i te taata haapii ia haere mai i te mau putuputuraa. A parau atu e mea nafea te tereraa. E nehenehe ta outou e faaite atu i te tumu parau o te hoê oreroraa parau i mua nei aore ra e faaite i te tumu parau e tuatapapahia i te haapiiraa o Te Pare Tiairaa. Peneiaˈe e nehenehe ta outou e faaite ia ˈna i te Piha no te Basileia i te taime aita e putuputuraa, no te tamǎrû i to ˈna mǎtaˈu ia haere i te hoê vahi apî no te taime matamua. E ani paha outou ia ˈna e na outou e haere e tii ia ˈna no te haere i te mau putuputuraa. Ia haere mai o ˈna, eiaha e faahuru ê ia ˈna, ia farii-popou-hia râ oia. (Mat. 7:12) A haafarerei ia ˈna i te tahi atu mau Ite, te mau matahiapo atoa. Te tiaturi nei tatou e e haamata o ˈna i te faariro i te amuiraa ei utuafare kerisetiano pae varua no ˈna. (Mat. 12:49, 50; Mar. 10:29, 30) E nehenehe outou e haamau i te hoê tapao na ˈna ia titau mǎrû noa o ˈna, mai te haereraa i te hoê putuputuraa i te hebedoma tataitahi.—Heb. 10:24, 25.
16 A haere noa ˈi te haapiiraa i mua i nia i te buka Te ite, a haapapu i te mau tuhaa e haamatara ra i te faufaaraa ia amuimui tamau e te amuiraa i roto i te mau putuputuraa. A tapao iho â râ i te mau api 52, 115, 137-9, 159, e te pene 17. A faaite i to outou iho mau manaˈo mauruuru hohonu no te faanahonahoraa a Iehova. (Mat. 24:45-47) A faahiti i te mau parau maitatai no nia i ta outou amuiraa e te mea o ta outou e haapii ra i te mau putuputuraa. (Sal. 84:10; 133:1-3) E mea maitai ia mataitai te taata haapii i te mau ripene video atoa a te Taiete, ma te haamata e Te mau Ite no Iehova—Hoê iˈoa, hoê faanahonahoraa (farani). E ite outou i te mau manaˈo hau e nafea ia aratai i te mau taata i roto i te faanahonahoraa i roto i Te Pare Tiairaa 1 no Mati 1985, mau api 22-6 (farani), e te api hau o Te taviniraa o te Basileia no Eperera 1993.
17 A faaitoito i te feia haapii ia poro ia vetahi ê: Ia haapii anaˈe tatou e te mau taata, ta tatou tapao, o te faariroraa ïa ia ratou ei pǐpǐ o te poro no Iehova. (Isa. 43:10-12) Te auraa ïa, e tia i te taata faatere i te haapiiraa ia faaitoito i te taata haapii ia paraparau ia vetahi ê no nia i te mea ta ˈna e tuatapapa ra i roto i te Bibilia. E nehenehe tatou e ani ohie noa ˈtu e: “Nafea oe ia faataa i teie parau mau i to oe utuafare?” aore ra: “Eaha te mau irava ta oe e faaohipa no te haapapu i te reira i te hoê hoa?” A haamatara i te mau irava faufaa o te buka Te ite e faaitoito ra i te pororaa, mai te mau api 22, 93-5, 105-6, e te pene 18. Ia tae i te taime tano, e nehenehe e horoa na te taata haapii vetahi mau api parau iti o ta ˈna e faaohipa i roto i te pororaa faanaho-ore-hia. A parau ia ˈna ia ani o ˈna i te mau melo o to ˈna utuafare ia apiti mai i roto i te haapiiraa. E hoa anei to ˈna e hinaaro atoa ra e haapii i te Bibilia? A ani ia ˈna ia faaite mai e o vai te anaanatae ra.
18 Na roto i te haereraa i te Haapiiraa o te taviniraa teotaratia e te putuputuraa no te taviniraa, e fanaˈo te taata e riro hoi ei pǐpǐ i te hoê faaineineraa e te mau faaitoitoraa hau o te tauturu ia ˈna ia riro ei taata poro o te parau apî maitai. Mai te peu e e hinaaro o ˈna e tapao ia ˈna i te haapiiraa aore ra e riro mai ei taata poro bapetizo-ore-hia, e mea tano ia pee i te mau faaueraa tumu faahitihia i roto i te buka Ta tatou taviniraa (farani), mau api 98-100. Mai te peu e aita o ˈna e faaî ra i te mau titauraa i roto i te hoê tuhaa o to ˈna oraraa, e nehenehe ta outou e imi i roto i te mau papai a te Taiete i te mau manaˈo faufaa no nia i te tuhaa e ia faaite atu ia ˈna. Ei hiˈoraa, e mea fifi paha no te taata haapii ia haapae i te avaava aore ra te tahi atu mau raau taero. Te faahiti ra te buka Haaferuriraa i te mau tumu papu a te Bibilia no reira e tia i te mau Kerisetiano ia haapae i teie mau peu iino e te faaite ra oia i te api 118 i te hoê ravea aravihi no te tauturu ia vetahi ê ia faaore i teie peu. A pure na muri iho ia ˈna no nia i te reira e a haapii ia ˈna ia turui rahi atu â i nia ia Iehova no te fanaˈo i te tauturu.—Iak. 4:8.
19 Te faataahia ra te huru raveraa no te ite e te faaî ra anei te hoê taata i te mau titauraa no te apiti i roto i te taviniraa i mua i te taata i roto i Te Pare Tiairaa 15 no Tenuare 1996, api 16, § 6. Ia faaî anaˈe te taata haapii i te mau titauraa, e mea tano ia ravehia te tahi mau faaineineraa no te haamataro ia ˈna i ta ˈna mahana matamua o te pororaa. Ma te feruriraa maitai, a paraparau no nia i te mau huru e te mau patoiraa pinepine a te mau taata o ta outou tuhaa fenua. Na mua roa, a haamata e o ˈna na roto i te pororaa na te mau fare mai te peu e e nehenehe, e a faaineine mǎrû noa ia ˈna i muri iho i roto i te tahi atu mau tuhaa o te taviniraa. Mai te peu e mea poto noa e te ohie ta outou faaiteraa, e ohie ïa o ˈna i te pee i ta outou raveraa. A faaite i te feruriraa maitai e te faaitoito, e te oaoa i roto i te pororaa; e ite ïa oia i to outou huru feruriraa e e na reira atoa o ˈna. (Ohi. 18:25) Ia haamau te hoê pǐpǐ apî i te tapao e riro mai ei taata poro tamau e te itoito o te parau apî maitai. E nehenehe paha outou e tauturu ia ˈna ia haamau i te hoê porotarama maitai no te pororaa. No te tauturu ia ˈna i roto i ta ˈna huru pororaa, e nehenehe outou e parau ia ˈna ia taio i te mau tumu parau o Te Pare Tiairaa 1 no Me 1985, mau api 13-23; 1 no Tiurai 1988, mau api 18-29; 1 no Tenuare 1991, mau api 23-8 e 1 no Tenuare 1994, mau api 20-5.
20 A faaitoito i te feia haapii ia pûpû ia ratou no te Atua e ia bapetizo: E navai te ite o te hoê taata haapii aau rotahi i te roaraa o te haapiiraa i te buka Te ite no te pûpû ia ˈna no te Atua e no te faaî i te mau titauraa no te bapetizoraa. (Hiˈo Ohipa 8:27-39; 16:25-34.) Teie râ, hou te taata e hinaaro ai e pûpû ia ˈna no te Atua, e tia ia ˈna ia faatupu i te paieti rahi no Iehova. (Sal. 73:25-28) I te roaraa o te haapiiraa, a imi i te mau taime no te turai ia ˈna ia faaite i to ˈna mauruuru no Iehova no to ˈna mau huru maitatai. A faaite i to outou mau manaˈo hohonu no te Atua. A tauturu i te taata haapii ia feruri i nia i te ravea e nehenehe ai oia e faatupu i te mau taairaa piri e te mahanahana e o Iehova. Mai te peu e ua ite e ua here mau â o ˈna i te Atua, e tavini ïa o ˈna i te Atua ma te haapao maitai, no te mea ua taaihia te paieti i te Atua e ta tatou huru hiˈoraa i te ihotaata o te Atua.—Tim. 1, 4:7, 8; hiˈo te Buka no te Haapiiraa, api 75, § 11.
21 A tutava i te haaputapû te mafatu o te taata haapii. (Sal. 119:11; Ohi. 16:14; Roma 10:10) E tia ia ˈna ia ite e no te aha e mea faufaa te parau mau no ˈna e ia faaoti e nafea o ˈna ia faaohipa i ta ˈna i haapii. (Roma 12:2) Te tiaturi mau ra anei o ˈna i te parau mau o tei faataahia ia ˈna i tera hebedoma i muri iho i tera hebedoma? (Tes. 1, 2:13) No te iteraa, a ui atu i te mau uiraa manaˈo e tano, oia hoi: Eaha to oe manaˈo? Nafea oe e nehenehe ai e faaohipa i te reira i roto i to oe oraraa? Na roto i ta ˈna mau pahonoraa, e nehenehe outou e ite i te mau tuhaa e tia ia outou ia tauturu hau atu â ia ˈna no te haaputapûraa to ˈna mafatu. (Luka 8:15; hiˈo te Buka no te Haapiiraa, api 52, § 11) Te ani ra te mau pereota i papaihia i nia i te mau hohoˈa i te mau api 172 e 174 o te buka Te ite e: “Ua pûpû anei oe ia oe iho i te Atua na roto i te pure?” e “Na te aha e tapea ra ia oe ia bapetizohia?” E nehenehe teie mau uiraa e turai i te taata haapii ia ohipa.
22 Te faataahia ra e eaha te rave ia hinaaro anaˈe te taata poro e bapetizo i roto i Te Pare Tiairaa 15 no Tenuare 1996, api 17, § 9. Ua faaineinehia te buka Te ite ma te tapao e tauturu i te taata ia pahono i te mau “Uiraa na te feia e hinaaro ra e bapetizo.” Te vai ra teie mau uiraa, ta te mau matahiapo e hiˈopoa e o ˈna, i roto i te tuhaa hau i te hopea o te buka Ta tatou taviniraa e i roto i te hoê vea iti. Mai te peu e ua haafaufaa outou i te mau pahonoraa o te mau uiraa neneihia i roto i te buka Te ite, e ineine ïa te taata haapii no te mau tauaparauraa taa ê e te mau matahiapo no te bapetizoraa.
23 E tauturu anaˈe i te feia tei tae i te hopea o ta ratou haapiiraa o te Bibilia: Te tiaturihia ra e ua faaite maitai te hoê taata tei tae i te hopea o te haapiiraa o te buka Te ite, i to ˈna aau rotahi e to ˈna hinaaro hohonu e tavini i te Atua. (Mat. 13:23) No reira te upoo parau iti e faahope ai i te buka na roto i teie uiraa: “Eaha ïa ta oe e rave?” Te faaitoito ra te mau paratarapha hopea i te taata haapii ia feruri i nia i to ˈna mau taairaa e te Atua, i te faufaaraa ia faaohipa i te ite i noaa ia ˈna e ia ohipa ma te haamarirau ore no te faaite i to ˈna here no Iehova. Aita i faanahohia e ia haapii tatou i te tahi atu mau buka e te mau taata tei faaoti i te buka Te ite. Mai te peu e aita te hoê taata haapii e faaohipa ra i te ite no nia i te Atua, a faataa mǎrû e ma te taa maitai ia ˈna eaha te tia ia ˈna ia rave no te haere i mua i te pae varua. E nehenehe outou e hoˈi e farerei ia ˈna i te tahi mau taime, ma te vaiiho ia ˈna i te mau ravea no te rave i te mau taahiraa e aratai ia ˈna i te ora mure ore.—Koh. 12:13.
24 E tia i te hoê pǐpǐ apî o te farii i te parau mau e o te bapetizo, ia paari atu â i roto i te ite e te maramarama hou a haapapu roa ˈi i roto i te faaroo. (Kol. 2:6, 7) I muri aˈe a faaoti ai i te buka Te ite, ma te ore e tamau i ta ˈna haapiiraa o te Bibilia i to ˈna fare, e nehenehe ta tatou e horoa ˈtu i te tauturu o ta ˈna paha e hinaaro no te paari mai i te pae varua. (Gal. 6:10; Heb. 6:1) I to ˈna aˈe pae, e nehenehe o ˈna e faarahi atu â i to ˈna maramarama ma te taio i te Bibilia i te mau mahana atoa, ma te haapii tataitahi i Te Pare Tiairaa e te tahi atu mau papai a te “tavini haapao maitai,” ma te faaineine no te mau putuputuraa e ma te apiti tamau atu, e ma te paraparau no nia i te parau mau i to ˈna mau hoa i roto i te faaroo. (Mat. 24:45-47; Sal. 1:2; Ohi. 2:41, 42; Kol. 1:9, 10) Ia nahonaho oia no te rave faahope i ta ˈna taviniraa ma te huru teotaratia, e mea faufaa ia taio o ˈna i te buka Ta tatou taviniraa e ia pee o ˈna i ta ˈna mau titauraa.—Tim. 2, 2:2; 4:5.
25 E faatupu anaˈe i te aravihi no te haapii: Ua horoahia mai ia tatou nei te hopoia e ‘faariro i te mau taata ei pǐpǐ, ma te haapii ia ratou.’ (Mat. 28:19, 20) I te mea hoi e mea faufaa te aravihi no te haapii no te faariro i te mau taata ei pǐpǐ, te hinaaro nei tatou e tutava no te riro ei feia haapii maitai roa ˈˈe. (Tim. 1, 4:16; Tim. 2, 4:2) No te tahi atu mau manaˈo tauturu no nia i te faatupuraa i te aravihi no te haapii, peneiaˈe e hinaaro outou e taio: “Nafea ia haamaitai i te aravihi no te haapii atu” e “Nafea ia haaputapû te mafatu o te feia e faaroo ra ia outou” i roto i te Buka no te Haapiiraa, mau haapiiraa 10 e 15; “Taata faatere i te haapiiraa, haapiiraa” i roto i te buka Auxiliaire; e te mau tumu parau o Te Pare Tiairaa i muri nei: “Te ravea no te paturaa i te materia e tamatahia i te auahi” e “Ia haapii oe, a haaputapû te mafatu,” 1 no Eperera 1985; “Ua ite anei outou i te haaferuri ma te aravihi ia au i te mau Papai?,” 1 no Mati 1986 (farani); e “Nafea ia oaoa i te faariroraa i te taata ei pǐpǐ,” 15 no Febuare 1996.
26 A tutava noa ˈi outou i te faariro i te mau taata ei pǐpǐ maoti te buka Te ite, a pure ma te tuutuu ore ia Iehova, o Tei “faatupu,” ia haamaitai mai o ˈna i ta outou mau tutavaraa no te haaputapû te mau mafatu na roto i te parau apî maitai o te Basileia. (Kor. 1, 3:5-7) Ia ite ïa outou i te oaoa na roto i te haapiiraa ia vetahi ê ia taa i te ite e aratai i te ora mure ore, e ia ite i to ˈna faufaaraa e ia ohipa ia au i te reira!