Ia ohipa tatou ma to tatou nephe atoa
1 E rave rahi tumu e haamauruuru ai tatou ia Iehova. Ei hiˈoraa, te mau mea ta ˈna i rave i mutaa ihora, ta ˈna e rave nei i teie tau, e ta ˈna atoa e rave no tatou a muri aˈe. E turai to tatou mauruuru ia rave i te aha? Te pahono ra te hoê salamo a Davida e: “E haamaitai â vau ia Iehova e ore e faaea; ia vai tamau maite â te haamaitai ia ˈna i roto i to ˈu nei vaha.”—Sal. 34:1.
2 Te faaite papu ra te Bibilia e e tia ia tatou ia poro. Te rave nei tatou i teie ohipa ‘ma to tatou nephe atoa, mai te mea e na Iehova.’ (Kol. 3:23, MN) Mai te peu e e apiti mau tatou i roto i te taviniraa ma to tatou nephe atoa, e na reira tatou i roto i teihea faito? Ia feruri tatou i to Iehova here ia tatou nei, e turai mau â to tatou mafatu ia tatou ia paraparau ma te itoito no nia ia ˈna e ta ˈna mau opuaraa faahiahia. Te hinaaro nei tatou e rave i te mea atoa e maraa ia tatou.
3 E mea papu maitai e, te taata e tavini ma to ˈna nephe atoa, e tapea ïa oia i to ˈna feruriraa i nia i ta ˈna taviniraa moˈa. Ua parau te papai salamo, mai te reira atoa hoi to ˈna manaˈo, e: “Taihitu a ˈu haamaitairaa ia oe i te mahana hoê.” (Sal. 119:164) Te imi nei te feia hoê â to ratou manaˈo e to te papai salamo ra, ia faaohipa i te mau ravea e vai nei ia ratou no te arue ia Iehova. Ia au i to ratou huru tupuraa, te rave nei ratou i tei maraa ia ratou no te tavini ma te itoito.
4 E rave rau huru tupuraa ta tatou no te arue ia Iehova: Eiaha e tiai ia haere roa ˈtu tatou na te mau fare no te poro i te parau apî maitai. Te hiaai nei hoi to tatou mau hoa rave ohipa, to tatou mau hoa haapiiraa, e to tatou mau fetii e to tatou mau hoa, e faaroo i te poroi o te Basileia. Ia ratere anaˈe tatou, e nehenehe tatou e haamata i te mau aparauraa, e peneiaˈe e poro roa ˈtu, i te feia tuati i te hotela, te mau rave ohipa i te fare tamaaraa aore ra i te vahi titoraa mori, aore ra e te feia faahoro pereoo tarahu. I ǒ tatou, e nehenehe tatou e poro i to tatou feia tapiri aore ra te feia afai tauihaa. Mai te peu e ua tapeahia tatou i te fare maˈi, e nehenehe tatou e poro ma te faanaho-ore-hia i te mau vahine utuutu maˈi, i te mau taote e i te tahi atu mau taata maˈi.
5 Mea hotu te pororaa faanaho-ore-hia: I te hoê mahana, a hahaere ai raua na roto i te hoê aua ori-haere-raa, ua haamata e piti Ite i te tauaparau e te hoê taurearea e ori haere ra e ta ˈna tamarii. I muri iho, ua haere mai teie taata e ta ˈna vahine i roto i te parau mau. I muri aˈe, ua faaite mai teie taurearea e, hou oia a farerei ai i na Ite e piti no te taime matamua, ua pure oia i te Atua ma te ani atu e: ‘Mai te peu e te vai mau nei oe, a horoa mai i te ravea ia ite au ia oe.’ No ˈna, ua riro te farereiraa i na Ite i roto i te aua ori-haere-raa ei pahonoraa na Iehova i ta ˈna pure.
6 E oaoa rahi to te feia e rohi nei ma to ratou nephe atoa no to ratou hinaaro e hopoi atu i te tauturu i te pae varua i to ratou taata-tupu. Ua ite ratou e, te oaoa nei Iehova i teie taviniraa ta ratou e rave nei “ma te mafatu atoa.”—Par. 1, 28:9, MN.