Te titau nei tatou i te amuiraa
1 Ua haafaufaa te mau tamaiti a Korea i te amuiraa a Iehova na roto i teie mau parau: “E maitai rahi to te mahana hoê i roto i te mau hezere no oe ra, i te mahana atoa e tausani noa ˈtu i te tahi vahi ê.” (Sal. 84:10). I to ratou manaˈo, eita te ao e nehenehe e horoa i te hoê â mea faahiahia. Mai te peu e e farii outou i to ratou mau manaˈo, e tia ia outou ia tuu i te amuiraa kerisetiano i ropu i to outou oraraa.
2 Mai to ˈna haamataraa mai â, te fanaˈo mau ra te amuiraa kerisetiano i te haamaitairaa a te Atua (Ohipa 16:4, 5). Eiaha tatou e faariro i te reira mai te hoê mea faufaa ore aore ra mai te hoê noa ravea no te farerei i te tahi e te tahi. Ua riro te amuiraa ei “vahi haaputuputuraa” na te mau Ite no Iehova no te mau vahi atoa. Te haaputuputu ra tatou i reira ma te tahoê ia haapiihia tatou e Iehova e ia faanahohia tatou no te ohipa o te Basileia.—Isa. 2:2.
3 O te amuiraa kerisetiano te arai matamua e haapiihia ˈi te parau mau ia tatou (Tim. 1, 3:15). E tia i te mau pǐpǐ a Iesu ia ‘vai hoê noa,’ ia tahoê e te Atua, e te Mesia e te tahi e te tahi (Ioane 17:20, 21; hiˈo atoa Isaia 54:13). Na te ao taatoa, te tiaturi nei to tatou mau taeae kerisetiano i te mau haapiiraa e te mau faaueraa tumu bibilia e te faaau nei ratou i to ratou oraraa i te reira.
4 Ua haamatarohia e ua faaineinehia tatou no ta tatou hopoia oia hoi te faariroraa i te mau taata ei pǐpǐ. I te mau avaˈe atoa, te horoa nei Te Pare Tiairaa, te A ara mai na! e Te taviniraa o te Basileia i te mau manaˈo ohie no te haamata i te mau tauaparauraa bibilia. Te tumu o te mau putuputuraa oia ïa te faaiteraa ia tatou e nafea ia ite e ia faarahi i te anaanatae o te mau taata. Te haapapu ra te maraaraa i tapaohia na te ao taatoa e te fanaˈo ra taua ohipa ra i te turu no nia mai i te raˈi.—Mat. 28:18-20.
5 Maoti te amuiraa, te ‘faaitoitohia nei tatou i te mau mahana atoa i te aroha e te mau ohipa maitatai ra.’ (Heb. 10:24, 25.) Ma te itoito, te faaruru nei tatou ma te taiva ore i te mau tamataraa. Te tauturu nei te mau tiaau maitai ia tatou ia faaruru i te mau faateimaharaa e te mau haapeapearaa (Koh. 4:9-12). Mai te peu e e fariu ê tatou, e noaa mai ia tatou i te mau aˈoraa e tano. Te vai ra anei i te hoê faanahonahoraa ê atu o te horoa mai i teie huru tauturu tufahia ma te here?—Tes. 1, 5:14.
6 Te hinaaro nei o Iehova e ia faaea piri noa tatou i ta ˈna faanahonahoraa ia vai noa to tatou tahoêraa (Ioane 10:16). Te faaitoito ra te amuiraa ia tatou ia piri maite noa i te tavini haapao maitai o te tono hoi i te mau tiaau ratere no te faaitoito ia tatou. Na roto i to tatou haerea tano i teie aratairaa maitai, e haafatata tatou i te tahi e te tahi, e e tauturu te reira ia tatou ia vai puai noa i te pae varua.
7 Ua riro te amuiraa ei faanahoraa faufaa roa no to tatou vai-maitai-raa i te pae varua. Mai te peu e aita te reira, eita e nehenehe e tavini ia Iehova ma te tano. Ia vai piri noa ïa tatou i teie ravea o ta Iehova i haamau. E turu anaˈe ta ˈna mau tapao e e faaohipa anaˈe ma te aau tae i te mau aˈoraa no ǒ mai ia ˈna ra. Ma te faaohipa i te reira e faaite tatou e te haafaufaa nei tatou i te amuiraa.—Sal. 27:4.