Te faaitoito ra anei te mau faahaamanaˈoraa a Iehova ia tatou i te pae varua?
1 I roto i te hoê arueraa a Iehova, ua parau te hoê taata papai salamo e: “Te feruri nei au i ta oe i faaite maira.” (Sal. 119:99). Te faataa ra te parau hebera no te mau ‘faahaamanaˈoraa’ e te faahaamanaˈo ra Iehova ia tatou i te mau mea i roto i ta ˈna mau ture, ta ˈna mau titauraa, ta ˈna mau faatureraa e ta ˈna mau faaueraa. Ia haapao anaˈe tatou, e faaitoitohia tatou i te pae varua e e oaoa tatou.—Sal. 119:2.
2 No te mea e nunaa tatou no Iehova, te fanaˈo tamau ra tatou i te mau aˈoraa; ua faaroo aˈena tatou i te rahiraa. Noa ˈtu e te faufaahia ra tatou i teie mau huru faaitoitoraa, e nehenehe e moehia e tatou i te tahi mau taime (Iak. 1:25). Te faatae noa mai ra o Iehova ia tatou ma te faaoromai te mau faahaamanaˈoraa î i te here. Ua horoa mai te aposetolo Petero i te tahi mau faahaamanaˈoraa no te ‘faaara i to tatou aravihi no te feruri ma te maramarama, ia haamanaˈo tatou i te mau faaueraa a te Fatu.’—Petero 2, 3:1, 2.
3 Te faahaamanaˈo-noa-hia ra tatou i te faufaaraa ia haapii tataitahi e ia haere i te mau putuputuraa. Te tumu o teie mau ohipa oia hoi e mea faufaa roa no to tatou vai-maitai-raa i te pae varua.—Tim. 1, 4:15; Heb. 10:24, 25.
4 No vetahi, te fifi rahi roa ˈˈe o te amoraa ïa i ta ratou hopoia kerisetiano e poro. Te titau ra te reira i te mau tutavaraa, te faaotiraa papu e te tamau-maite-raa. Noa ˈtu e te titau-rahi-hia ra ia tatou, ia “faatamaahia to [tatou] avae i te faaineineraa o te evanelia” e tauturu ïa te reira ia tatou ia ‘mau papu.’—Eph. 6:14, 15.
5 E ere noa na te iteraa i te mau faaueraa a Iehova e turai ia tatou ia faaitoito i roto i te taviniraa. Te faahaamanaˈo ra te aposetolo Paulo ia tatou e na te mafatu e horoa i te itoito no tatou no te “faˈi i te parau, e ia roaa ˈtu te ora.” (Roma 10:10.) Mai te peu e e faaroo paari to tatou e te farii nei to tatou mafatu i te mau faahaamanaˈoraa a Iehova, e paraparau e e arue ïa tatou i to ˈna iˈoa.—Sal. 119:36; Mat. 12:34.
6 Ia rohi anaˈe tatou no te faatupu i te mau ohipa maitatai, e huti mai ïa tatou i te oaoa (Koh. 2:10). Te faataa ra o Paulo i te oaoa mai te hotu o te varua o Iehova, e e tia ia tatou ia titau hau atu â i taua huru maitai ra (Gal. 5:22). Ua parau faahou o Petero e e haamauruuruhia te “faaitoito hua” na roto i te hoê taviniraa hotu maitai, o te faatupu i te oaoa.—Petero 2, 1:5-8.
7 Ia faaruru anaˈe tatou i te mau fifi, e haamanaˈo noa tatou i te tiaraa papu o te mau aposetolo, te faahiti nei ratou: “E ore hoi matou e tia ia ore ia parau i ta matou i hiˈo aˈenei, e ta matou i faaroo aˈenei.” (Ohipa 4:20). E itoitohia tatou ia haamanaˈo tatou e ‘tei te na reira hoi tatou e ora ˈi tatou e te feia atoa e faaroo mai.’—Tim. 1, 4:16.
8 Eita tatou e riri eita atoa e inoino no te mea te farii tamau nei tatou i te mau faahaamanaˈoraa. Area râ, ua ite maitai tatou i to ratou faufaaraa faahiahia roa (Sal. 119:129). I teie tau fifi, te haamauruuru nei tatou ia Iehova no te mau faahaamanaˈoraa ta ˈna e horoa tamau mai nei na tatou no te faaitoito ia tatou i te pae varua e no te turai ia tatou ia itoito no te mau ohipa maitatai.—Petero 2, 1:12, 13.