‘A vai ara’

¹ I te taime a faahiti ai Iesu i te mau parau i roto i te Mataio 26:38-41, ua fatata o ˈna i te ite i te mau taime fifi roa ˈˈe o to ˈna oraraa taata nei. E mea faufaa roa ˈˈe te reira no te mau Aamu atoa. Te faaoraraa o te huitaata atoa ua riro ïa ei aroraa. E tia i te mau pǐpǐ a Iesu ‘ia vai ara.’

² I teie nei mahana ua tae tatou i te uputa o te taeraa mai o Iesu i roto i na tiaraa e piti e vai ra ia ˈna oia hoi ei taata faatiamâ e ei taata haamou. I te mea hoi e ua riro tatou ei mau kerisetiano e vai ara ra o te ite ra e mea ru te taime, eita ïa tatou e faaea noa e e tiai noa i te faaoraraa. Ua ite tatou e e tia ia tatou ia vai ara noa i te mau taime atoa. E mea faufaa ia tamau tatou i te ‘rohi e i te aro’ i roto i te taviniraa a Iehova (Tim. 1, 4:10). E o tatou tataitahi? Te vai ara ra anei tatou?

³ A hiˈopoa ia tatou iho: Ua parau atoa o Iesu i teie faaararaa: “E ara râ ia outou.” (Luka 21:34, 35). E ara tatou ia tatou iho, ia riro “ei feia hapa ore, e te ino ore (...) i rotopu i teie nei ui piˈo e te mârô.” (Phil. 2:15.) E haerea kerisetiano anei to tatou i te mau mahana atoa, ma te pee ia Iesu e i te mau faaueraa tumu e vai ra i roto i te Parau a te Atua? E tia ia tatou ia haapae te mau haerea tano ore no te hoê kerisetiano o teie nei ao, “i raro aˈe i taua varua ino ra.” (Ioane 1, 5:19; Roma 13:11-14.) Ia hiˈopoa tatou ia tatou iho na roto i te haamaramaramaraa a te mau Papai, te vai ara mau ra anei tatou mai ta Iesu i ani?

⁴ E tia i te mau matahiapo ia ara i te amo ma te itoito i ta ratou mau hopoia i roto i te amuiraa, ma te ite e e hopoia ta ratou ia aupuru i te nǎnǎ ma te ite e e pahono atu iho â ratou no nia i ta ratou huru aupuru i te nǎnǎ (Heb. 13:17). E hopoia taa ê ta te mau upoo o te utuafare e aratai i to ratou utuafare na nia i te mau eˈa o Iehova (Gen. 18:19; Iosua 24:15; a hiˈo Timoteo 1, 3:4, 5). E mea faufaa roa atoa ia pee tatou paatoa i te faaueraa bibilia oia hoi ia here tatou i te tahi e te tahi. O te tapao faataaraa ïa teie o te kerisetianoraa mau.—Ioane 13:35.

⁵ E faaara anaˈe i to tatou taata-tupu: Te vai-ara-raa e ere noa ïa i te araraa ia tatou iho. E hopoia ta tatou e faariro i te mau taata ei pǐpǐ (Mat. 28:19, 20). E tia i te here no to tatou taata-tupu ia turai ia tatou ia faaara ia ˈna ia nehenehe atoa o ˈna e ora mai i te haamouraa o te ao nei. Na te kerisetiano tataitahi teie hopoia. E tuhaa faufaa teie no ta tatou haamoriraa (Roma 10:9, 10; Kor. 1, 9:16). Te farerei pinepine nei tatou i te tâuˈa-ore-raa aore ra te patoi-roa-raa mai ia apiti anaˈe tatou i roto i taua ohipa faaora ra. E tia ia tatou ia tamau noa, noa ˈtu e aita te rahiraa o te mau taata e tâuˈa ra i ta tatou faaararaa (Ezek. 33:8, 9). Na te here mau no te Atua e no to tatou taata-tupu e turai ia tatou ia tamau noa.

⁶ E ere teie te taime ia teoteo. Eiaha tatou ia vaiiho i te mau peapea o te oraraa i te mau mahana atoa ia haafariu ê ia tatou, eiaha atoa tatou e faaô atu i roto i te mau faaanaanataeraa o teie nei ao a riro mai ai hoi te reira ei marei (Luka 21:34, 35). O teie mahana te taime ia taa maitai tatou e te ora nei tatou i te hoê tau hopea. Te piri roa mai ra te taime i reira o Iesu e haava ˈi i te faanahoraa ino. O te feia anaˈe o te vai ara, o te vai ara maitai o te vai itoito e o te haapao maitai o te ora. Ia auraro anaˈe tatou i te mau faaueraa a Iesu e ‘ia au ia tatou te ora i teie nei mau mea iino,’ e mea papu e haamauruuru tatou ia Iehova.—Luka 21:36.