E haafaufaa anaˈe i te mau oreroraa parau huiraatira hiˈopoa-faahou-hia

¹ Ua haapotohia te aamu o te mau Ite no Iehova i teie mahana ma te tano i roto i te Maseli 4:18: “O te eˈa hoi o te feia parau-tia ra, e au ïa i te maramarama anaana ra, o tei tupu noa te anaanaraa e tae noa ˈtu i te avatea mau ra.”

² Ia au i teie parau, te tamau noa ra te amuiraa kerisetiano i te fanaˈo i te mau faataaraa e tae mai i te taime tano e te mau haamaramaramaraa faaapîhia no nia i te mau haapiiraa bibilia (Mat. 24:45-47). E nehenehe outou e faahiti i te mau hiˈoraa papu ta outou i tapao mai to outou apitiraa e te mau Ite no Iehova. Te haere ra te maramarama o te parau mau i te rahi, e e nehenehe outou e apee i te mau haereraa i mua na roto i te mau putuputuraa a te amuiraa, e te mau oreroraa parau huiraatira.

³ Te mau tino parau hiˈopoa-faahou-hia: Ua hiˈopoa faahou te Taiete aita i maoro aˈenei e rave rahi mau tino parau o te mau oreroraa parau huiraatira. Te vai ra i roto te mau haamaramaramaraa faaapîhia, e ua faataahia te mau manaˈo faufaa. Ia haafaufaa taatoa te amuiraa i teie mau haamaramaramaraa faaapîhia, e ara ïa te mau taeae e hohora i te mau oreroraa parau huiraatira ia faaohipa i te mau tino parau hopea roa.

⁴ Mai te peu e te hinaaro nei outou e huti mai i te haapiiraa maitai aˈe i roto i taua mau oreroraa parau huiraatira ra, a feruri maite i nia i te mau tumu parau o te mau oreroraa parau o te hohorahia. Hou a haere ai i te putuputuraa huiraatira, a tamata i te haamanaˈo i te mau manaˈo hopea neneihia i roto i te mau buka a te Taiete no nia i taua tumu parau ra. I muri iho, a faaroo noa ˈi outou, a tiai i te mea ta te taeae orero e parau. A tapao ia vauvauhia taua mau parau mau ra na roto i te hoê raveraa apî, no te faaohipa a muri aˈe. No reira, e papu maitai outou e huti rahi outou i te haapiiraa na roto i te mau tino parau o te mau oreroraa parau hiˈopoa-faahou-hia.

⁵ E tia i te mau oreroraa parau ia haapii, ia turai atoa râ i te ohipa: Ia paraparau anaˈe Iesu, ua haaputapû o ˈna i te mafatu o te feia e faaroo ra ia ˈna. Te taio nei tatou i roto i te Mataio 7:28 e i te pae hopea o ta ˈna Aˈoraa i nia i te mouˈa, te oreroraa parau huiraatira tuiroo roa ˈˈe aita i hohorahia aˈenei, “ua maere anaˈe ihora te taata atoa i te huru o ta ˈna parau.”

⁶ Ma te tapea mai i roto i te feruriraa i te hiˈoraa o Iesu, e faaohipa ïa te mau tino matahiapo i te maramarama ia maiti ratou i te mau taeae orero apî, oia hoi te mau taeae anaˈe e feia haapii maitai ratou, o te faatura iho â i te mau tino parau a te Taiete, e o te tapea mai i te ara-maite-raa o te feia e putuputu mai. E tia i te mau taeae e haamaitairaa taa ê ta ratou no te hohora i te mau oreroraa parau huiraatira ia tutava ma te tuutuu ore i te haamaitai i to ratou aravihi ia orero, ma te farii i te mau aˈoraa e te mau manaˈo atoa no ǒ mai i te mau matahiapo.

⁷ Mai ta te Isaia 65:13, 14 i faaite, te ite-noa-hia ra te ruperuperaa i te pae varua o te mau tavini a te Atua. O te mau oreroraa parau huiraatira te hoê o te mau ravea e rave rahi o te faariro ia tatou ei mau taata “haapiihia ïa e Iehova.”—Isaia 54:13.