Eaha te huru feruriraa ta tatou e faaite ra?
1 Ua faaoti Paulo i ta ˈna rata i te amuiraa no Philipi na roto i teie faaitoitoraa: “Ei ia outou atoa na te aroha mau o to tatou Fatu ra o Iesu Mesia.” (Phil. 4:23). Ua haapopou oia i te feia no Philipi no te mea ua anaanatae ratou ma te aau rotahi i te pororaa o te parau apî maitai, ua faaite ratou i te huru mahanahana e ua tapitapi ratou ma te here no te tahi e te tahi.—Phil. 1:3-5; 4:15, 16.
2 E tia atoa ia tatou ia faaite i te hoê â huru feruriraa i roto i ta tatou amuiraa. Mai te peu e e faaite te taatoaraa i te itoito, te hamani maitai e te farii maitai, e tupu te hoê huru feruriraa ta te mau taata e ite. E faatupu te hoê huru feruriraa maitai e te here i te tahoêraa e te mau haereraa i mua i te pae varua (Kor. 1, 1:10). E faatupu te hoê huru feruriraa ino i te haaparuparuraa e te pumahana.—Apo. 3:15, 16.
3 Te horoa nei te mau matahiapo i te hiˈoraa: Tei te mau matahiapo te hopoia no te atuatu i roto ia ratou, e i roto i te amuiraa, i te hoê huru feruriraa maitai roa. No te aha? No te mea e mana to ratou huru e to ratou haerea i nia i te amuiraa. Te haafaahiahia nei tatou i te mau matahiapo e apiti ra ma te itoito i roto i te pororaa, o te farii maitai ia tatou ma te mata ataata e te hoê parau maitai, e te horoa mai ra i te mau aˈoraa maitatai e te faaitoito, no tatou anaˈe aore ra na mua mai.—Heb. 13:7.
4 E parau mau, e tia ia tatou paatoa ia rave i ta tatou tuhaa ia vai te auhoaraa, te farii-maitai-raa, te itoito e te maitai i te pae varua i roto i te amuiraa. E nehenehe te taata tataitahi e faaite i te farii maitai e te here i roto i ta ˈna mau taairaa e o vetahi ê (Kor. 1, 16:14). Eiaha ia vai te taa-ê-raa i rotopu ia tatou no te faito matahiti, te iri, te faito ite aore ra te huru oraraa i te pae faufaa (hiˈo Ephesia 2:21). No to tatou tiaturiraa e faaite tatou i te hoê huru feruriraa oaoa, farii maitai e te itoito i roto i te taviniraa.—Roma 12:13; Kol. 3:22, 23.
5 E tia i te feia atoa e apiti maira e o tatou, te mau taata atoa tei anaanatae i te parau mau aita i maoro aˈenei, ia ite e te farii-popou-hia ra ratou i roto i te fetii o te mau taeae e te ohipa ra te here e te paieti. Ma te poro e te faaite i te mau huru kerisetiano maitatai roa, te haapapu ra tatou e o te amuiraa ‘te pou e te tumu o te parau mau ra’. (Tim. 1, 3:15.) Te paruru-atoa-hia ra tatou i te pae varua maoti i “te hau a te Atua” e haapao ra i to tatou aau e to tatou mau manaˈo (Phil. 4:6, 7). Ia tutava na tatou i te faaite i te huru feruriraa o te haafanaˈo ia tatou i te farii maitai o Iehova, na roto i te Fatu ra o Iesu Mesia!—Tim. 2, 4:22.