Ia poro tatou ma te aravihi atu â
1 E ohipa ru mau â te pororaa i teie nei tau. E tamau te mau taata i te ora aore ra e pohe ratou ia au i to ratou huru i mua i te parau apî maitai (Petero 1, 4:5, 6, 17; Apo. 14:6, 7). No reira ïa tatou e imi ai i te mau ravea atoa no te poro ma te aravihi atu â. Eaha ta tatou e nehenehe e rave no te na reiraraa?
2 Ia faaineine maitai ia tatou: E maiti tatou i roto i Te taviniraa o te Basileia o te avaˈe i te hoê faaiteraa o te faaara, i to tatou manaˈoraa, i te anaanatae o te mau taata o ta tatou tuhaa fenua, e e faatano tatou i te mea ta tatou e parau ra i to ratou huru oraraa. Aore ra e hinaaro paha tatou e faaohipa i te hoê raveraa manaˈohia e tatou ma te faaohipa i te tahi mau manaˈo e te tahi mau irava aravihi. E ara ïa tatou e ia faaara ta tatou omuaraa parau i te anaanatae (hiˈo i te vea iti Haaferuriraa, mau api 3-8). E hinaaro paha tatou e ui i te taata i te hoê uiraa tano maitai aore ra e ani ia ˈna to ˈna manaˈo no nia i tera e tera parau apî o te faaanaanatae ra i te feia o to ˈna tuhaa fenua. Ia mau maitai ta tatou faaiteraa, e faaineine tatou e te hoê fetii aore ra e te hoê taata poro o te horoa mai i te mau manaˈo faufaa no te haere i mua.
3 E aparau tatou e te mau taata: Ta tatou fa o te haaparareraa ïa i te hoê poroi faufaa. E manuïa tatou ma te haamata i te mau aparauraa anaanatae. Ia patoi mai te taata aore ra e faaite mai o ˈna i to ˈna manaˈo no nia i te hoê tumu parau, ia faaroo maitai tatou ia ˈna. E nehenehe te mea ta ˈna e parau ra e tauturu ia tatou ia ite eaha te mau irava e faaohipa no te pahono ia ˈna e e opere atoa na ˈna i ta tatou tiaturiraa (Petero 1, 3:15). Mai te peu e aita to ˈna manaˈo e tuea ra e te haapiiraa a te Bibilia, e nehenehe tatou e parau ma te aravihi e: “E rave rahi taata o te manaˈo atoa mai te reira. A hiˈo na râ i te tahi atu huru hiˈoraa no nia i taua tumu parau ra.” E taio ïa tatou i te hoê irava tano e e ani tatou i to ˈna manaˈo.
4 E haamau tatou i te hoê porotarama faaau ohie: Eita e hoona rahi mai te peu e e faaineine maitai tatou ia tatou e aita tatou i farerei i te mau taata. I teie mahana, e pinepine e mea iti te taata ta tatou e farerei ra i to ratou fare ia poro tatou. Mai te peu e te reira te tupuraa i roto i ta tatou tuhaa fenua, no te aha e ore ai e taui i ta tatou porotarama no te haere i tera e tera fare i te taime tei te fare te mau taata? E manaˈo paha tatou e o te mau hopea hebedoma te mau taime tano roa no te haere e farerei i te mau taata. I te tahi taime, i roto ïa i te hebedoma, te ahiahi iho â râ, e nehenehe e farerei ia ratou. I roto i te tahi mau tuhaa fenua, te opua nei te feia poro e haere e poro i te mau mahana faaearaa ohipa, no te mea e nehenehe ratou e faaite i te parau apî maitai i mua e rave rahi taata. I taua mau mahana ra, e mea ataata te mau taata e mea nahonaho maitai aˈe no te tauaparau. E mea tano i taua mau taime ra ia faatano i ta tatou mau omuaraa parau e ia faatuati i ta tatou mau parau e te hoê tumu parau bibilia.
5 E hiˈo tatou e mea aravihi anei ta tatou mau faaiteraa: I muri aˈe tatou e vaiiho ai i te taata, e ui tatou e: “Ua haaputapû anei au i to ˈna mafatu? Ua turai anei au ia ˈna ia faaite i to ˈna manaˈo e ua faaroo anei au ia ˈna? Ua pahono anei au ia ˈna ma te aravihi? Ia au i te tupuraa, ua hau anei ta ˈu raveraa i te aravihi?” E mea faufaa ia poro i te tahi mau taime e te hoê taata poro aravihi aore ra te hoê pionie e ia faaroo maitai i ta ˈna mau faaiteraa, e ia nehenehe tatou iho e poro ma te aravihi atu â.
6 Mai te peu e mea aravihi tatou i roto i ta tatou ohipa, e nehenehe tatou e faaite i te mau parau mau no nia i te Basileia o te ‘faaora ia tatou, tatou e te feia e faaroo ra ia tatou’.—Tim. 1, 4:16; Mas. 22:29.