Ia tapea maite tatou i te faaiteraa i mua i te taata i to tatou tiaturiraa, ma te aueue ore
1 E ravea matamua te haapiiraa o Te Pare Tiairaa faaohipahia no te horoa i te “maa i te hora mau ra” i te nunaa o Iehova i teie nei mahana (Mat. 24:45). Te haere nei tatou i teie putuputuraa faufaa e e piti fa faufaa roa: ia faaitoito ia tatou i te pae varua e ia faaite i to tatou tiaturiraa ia vetahi ê. — Heb. 10:23-25.
2 Ia haafaufaa tatou i te reira: Te manaˈohia ra e i roto i te rahiraa o te mau amuiraa, e hoê i nia e toru anaˈe feia e putuputu mai o te faaineine ra i ta ratou haapiiraa. E fatata hoê â rahiraa taata e pahono ra. E ere i te roaraa o te putuputuraa iho e noaa ˈi te taatoaraa o te maa varua paari e vai ra i roto i Te Pare Tiairaa. E tia ia faanaho tatou i te taime no te tuatapapa na mua i te mau tumu parau.
3 I roto i ta tatou faaineineraa, e manaˈo paha tatou e riro ei tauturu ia haamata i te feruri i nia i te mau uiraa i roto i te tumu parau tarenihia i te vahi hopea o te tumu parau. E mau maitai ïa ia tatou i te mau manaˈo matamua o te haapiiraa.
4 I te roaraa o te putuputuraa, e faaroo maitai tatou. E haapao maitai tatou i te mau omuaraa parau a te taeae aratai; e tuu ratou i te niu o te haapiiraa. E faahiti paha oia e toru aore ra e maha uiraa o ta te tumu parau e pahono, aore ra e hiˈo faahou o ˈna i te mau manaˈo matamua o te haapiiraa na mua ˈˈe, mai te peu e e tuatapapahia to muri iho. Mai te peu e e mea titauhia ia haamaitai i to tatou maramarama o te hoê parau tohu aore ra o te hoê faaueraa tumu a te mau Papai, e faaite mai te taeae aratai ia tatou. Parau mau, e tia ia ˈna ia haapoto i ta ˈna mau tatararaa i te mea e, te tumu o te haapiiraa oia hoi ia faaite te amuiraa i to ˈna tiaturiraa. E faaroo maite tatou i te mau pahonoraa a vetahi ê no nia i te mea ta ratou i haapii; e nehenehe te reira e faaetaeta i to tatou faaroo.
5 E faaite tatou i to tatou tiaturiraa: Te apiti tamau ra anei tatou i te haapiiraa? E mea maitai aˈe ia horoa i te mau pahonoraa poto e te papu. (A hiˈo i te Luka 21:1-4.) E haafaahiahia te taata atoa i te hoê pahonoraa ohie no roto mai i te mafatu. I roto i te rahiraa o te tupuraa, e tia ia haapoto noa e ia haapapu i te pahonoraa matamua i te hoê uiraa. E nehenehe atoa ïa te tahi atu mau taata tei putuputu mai e faahiti i te hoê irava bibilia aore ra e huti i te ara-maite-raa i nia i te hoê tuhaa iti o te paratarapha. I te na reiraraa, e rave rahi o te nehenehe e faaite i to ratou tiaturiraa i mua i te mau taata. Ia riro noa te mau pahonoraa ei mea maitai e te faaitoito e tia ˈi.
6 Mai te peu e eita i te mea maoro to outou haereraa i te haapiiraa aore ra e haamâ outou e pahono, e hinaaro paha outou e ia tauturu te taeae aratai ia outou. A ani ia ˈna ia hiˈo mai ia outou i te tuatapaparaa o te hoê paratarapha taa maitai, mai te peu e e afai outou i to outou rima i nia. E nehenehe outou e ani e taio i te hoê irava o te mau Papai e ia horoa i te hoê tatararaa poto. No te aha e ore ai e tapao i te tahi mau parau i te hiti api ia haamanaˈo outou i te mea ta outou e hinaaro ra e parau ia pahono outou? E te mau taurearea, eiaha ia moehia e auhia ta outou mau pahonoraa. — Mat. 21:16.
7 E mea faufaa ia faaite tatou i to tatou faaroo, e te vai ra ia tatou nei te hoê ravea faahiahia roa no te na reira i roto i te haapiiraa o Te Pare Tiairaa. Mai te peu e e haamarirau outou i te pahono, ia imi outou i te mau ravea atoa no te haapaiuma i te fifi e a faahepo ia outou iho ia horoa hoê noa ˈˈe pahonoraa. E apiti atoa ïa outou i te putuputuraa e e ite outou i te faahopearaa maitai. No reira, no te aha e ore ai e faanaho e horoa hoê noa ˈˈe pahonoraa i te haapiiraa o Te Pare Tiairaa i mua? — Mas. 15:23.