Pahonoraa i ta outou mau uiraa

◼ Eaha te tereraa ia apeehia no te faaite i te mau faaotiraa i te amuiraa?

E titauhia te hoê faaotiraa ia ravehia te hoê opuaraa i nia i te hoê uiraa faufaa mai te hooraa mai i te mau fare, te faaapîraa e te paturaa i te hoê Piha no te Basileia, te haponoraa i te mau ô taa ê i te Taiete, aore ra te aufauraa i te mau haamâuˈaraa a te tiaau haaati. I te rahiraa o te taime, e mea tano ia faaau i te hoê faaotiraa i te mau taime atoa e titauhia ˈi ia faaohipahia te moni a te amuiraa.

E ravehia te tahi taa-ê-raa i roto i te mau tupuraa no nia i te mau hinaaro taa ê tei taaihia i te mau ohipa aore ra te mau opuaraa faufaa. Ei hiˈoraa, e nehenehe te amuiraa e faaoti i roto i te hoê maitiraa ia afai i te Taiete te hoê ô o te ore e taui i te mau avaˈe atoa no te ohipa pororaa na te ao nei. Oia atoa, eita te mau haamâuˈaraa matauhia no te faaohiparaa i te Piha no te Basileia, mai te hooraa i te mau tauihaa rave rau aore ra te mau raau tamâ, e titau i te hoê faaotiraa.

Mai te peu e e titauhia te hoê haamâuˈaraa, e hiˈopoa maitai te tino matahiapo i te reira. Mai te peu e e farii te pae rahi no te rave i te hoê ohipa, e faaineine te hoê o te mau matahiapo, ei hiˈoraa te hoê melo o te tomite no te taviniraa, i te hoê faaotiraa papaihia o te faaitehia i te putuputuraa o te taviniraa.

E faaite poto e ma te maramarama te matahiapo o te faatere i te maitiraa i te tupuraa e e faataa oia i te mea ta te tino matahiapo i manaˈo e mea maitai ia rave. E nehenehe te mau melo o te amuiraa e ani i te mau haapapuraa. Mai te peu e e mea fifi te tupuraa, e mea maitai aˈe paha ia tuu i te maitiraa i te putuputuraa o te taviniraa i mua mai ia vaiiho i te taata tataitahi i te taime no te feruri. E ravehia te maitiraa ma te amo i te rima i nia.

O te mau melo pûpûhia e tei bapetizohia o te amuiraa anaˈe o te nehenehe e maiti, taa ê atu mai te peu e e titau te ture i te tahi atu faanahoraa, ei hiˈoraa i roto i te mau tupuraa taaihia i te mau taatiraa aore ra te mau moni e horoa-tarahu-hia no te mau Piha no te Basileia. E ere i te mea tano ia apiti mai te feia ratere no te tahi atu mau amuiraa i te maitiraa.

Ia fariihia te hoê faaotiraa, e tia ia tapaohia te taio mahana, ia tarimahia, e i muri iho ia tuuhia i roto i te mau vairaa api parau a te amuiraa.