Pahonoraa i ta outou mau uiraa

◼ Eaha te rave mai te peu e e onoono te hoê taata ia ore oia e farii faahou i te mau Ite no Iehova?

Mai te peu e te vai ra te hoê iri papairaa e opani tahaa ra i te hoê tapao ia haere mai tatou e paraparau no nia i te haapaoraa aore ra te faaite papu ra i te mau Ite no Iehova, e mea maitai ia auraro i te hinaaro o te mau taata e eiaha e patoto atu i to ratou uputa.

I te tahi mau taime, te ite nei tatou i te mau iri papairaa e opani ra i te feia hoohoo e te feia ani moni ia tomo. E ere no tatou teie mau parau, no te mea te rave nei tatou i te hoê ohipa faaroo ma te here. E mea maitai ia ore e haapao i te reira e ia patoto atu i te uputa. Mai te peu e e faahapa mai te taata e faaroo maira i ta tatou ohipa, e faataa ïa tatou ia ˈna ma te mǎrû e no te aha tatou i manaˈo ai e ere no tatou taua papai ra. Mai te peu râ i teie nei, e faaite maitai mai oia ia tatou e no te mau Ite no Iehova atoa teie opaniraa, e auraro ïa tatou i to ˈna hinaaro.

I te tahi mau taime, e riri paha te taata e faaroo ra e e ani papu oia e eiaha tatou e haere faahou e farerei ia ˈna. E tia ia tatou ia faaroo i ta ˈna aniraa. E tia ïa ia tuu i te hoê tapao e te taio mahana i roto i te vehi o te tuhaa fenua ia ore te feia poro o te haere atu na reira ia patoto i te uputa o taua taata ra.

Tera râ, eiaha ia moehia ia tatou eiaha e ape i teie mau huru fare e a muri noa ˈtu. E nehenehe te mau taata o taua mau fare ra e taui i te faaearaa. Peneiaˈe e farii popou te hoê melo o te utuafare i te parau apî maitai. E nehenehe te mafatu o te taata o ta tatou i tauaparau e taui, e farii hau atu â oia i ta tatou poroi. No reira, i muri iho i te tahi area taime, e tia ia tatou ia hoˈi e hiˈo i taua utuafare ra ia ite tatou i to ˈna huru.

E tia ia hiˈopoa maitai i te mau tuhaa fenua hoê taime i te matahiti e ia haamau i te tabula o te mau fare eiaha e porohia. I raro aˈe i te aratairaa a te tiaau no te taviniraa, e nehenehe e anihia i te feia poro aravihi o te faaite i te mǎrû ia haere i te mau fare o taua mau taata ra. E nehenehe e parauhia ˈtu i teie mau taata e te haere mai nei tatou no te hiˈo e aita anei te mau taata o te fare i taui i te faaearaa. E tia i te feia poro ia ite i te mau manaˈo o te buka Haaferuriraa, mau api 8-15, i raro aˈe i te omuaraa “Mea nafea ia faaruru i te mau patoiraa.” Mai te peu e e huru au noa to te taata e faaroo maira, e nehenehe ïa tatou e hoˈi faahou e farerei ia ˈna ia au i te raveraa matauhia. Mai te peu e e huru patoi to ˈna mai te haamataraa, eita ïa tatou e hoˈi mai e farerei ia ˈna hou te matahiti i mua. E nehenehe te tomite o te mau matahiapo e faaoti, i te tahi taime, e mea maitai aˈe, ia au i te tupuraa, ia rave na roto i te tahi atu ravea.