E haamâha tatou i te mau hinaaro pae varua o te feia tariˈa turi
1 Te arataihia ra e rave rahi taata tariˈa turi i te Tiai mamoe maitai e te pûpû nei ia ratou i te Atua ra o Iehova (Ioane 10:3, 11). E tia i te tahi atu mau melo o te mau amuiraa, te mau matahiapo iho â râ, ia haapao maitai i te mau hinaaro pae varua o te mau taeae e te mau tuahine tariˈa turi.
2 Te pahonoraa i te mau hinaaro o te feia tariˈa turi: Te hurihia ra te mau putuputuraa a te amuiraa na roto i te reo aparaa rima mai te peu e te vai nei te feia huri aravihi. Mai te peu e, i roto i te amuiraa, aita e taata i ite i te reo aparaa rima, e nehenehe e aratai i te feia tariˈa turi i roto i te hoê amuiraa tapiri o te nehenehe e rave i teie tuhaa. E parau mau, mai te peu e aita te reira e ravehia i roto i ta outou tuhaa fenua, e nehenehe e maiti i te feia poro o te haere e parahi i pihai iho i te feia tariˈa turi e e faataio ia ratou i te mau manaˈo matamua o te mau tumu parau ta ratou e tapaopao.
3 Faanahoraa i roto i te tuhaa haaati e i te amuiraa: Na te tiaau haaati e haapao i te mau faanahoraa no te huriraa na roto i te reo aparaa rima i te mau tairururaa haaati e i te mau tairururaa taa ê hoê mahana. E nehenehe te hoê matahiapo aore ra te hoê tavini tauturu aravihi e nominohia ei taeae haapao. E nehenehe e ani i te mau taeae e i te mau tuahine hiˈoraa maitai e aravihi ia huri i te hoê tuhaa o te tairururaa. E nehenehe e na reira-atoa-hia i roto i te amuiraa, no te haamâha i te mau hinaaro o te feia tariˈa turi.
4 E mea maitai ia haaparahi i te feia tariˈa turi i te hoê vahi e ite ratou i te taeae huri e te tahua. E mea maitai no te mau putuputuraa a te amuiraa e no te mau tairururaa haaati. I roto i te mau putuputuraa a te amuiraa, mai te peu e e mea iti te feia tariˈa turi, e mea maitai ia haaparahi i te taata huri. E mea maitai ia ani te mau matahiapo i te hoê taeae tariˈa turi paari ia noaa mai te mau aˈoraa papu no nia i te vahi o te parahiraa.
5 Mai te peu e e nehenehe e faaohipahia i te hoê taata aravihi, tavini tauturu aore ra matahiapo, e na te rahiraa taeae e tuahine tariˈa turi e haapapu i te reira, e faaoti ïa te mau matahiapo ia hurihia te taatoaraa na roto i te reo aparaa rima i te tahi mau putuputuraa. E ravehia paha te reira na mua i roto i te haapiiraa buka. Mai te peu e e hinaaro te hoê amuiraa e huri i te hoê o te tahi atu mau putuputuraa o te hebedoma na roto i te reo aparaa rima, e tia i te mau matahiapo ia faaite i te Taiete i to ratou hinaaro.
6 Te ani ra te aparauraa i rotopu i te feia tariˈa turi e te feia e faaroo i te hoê tutavaraa taa ê i na pae e piti. Teie râ, e hinaaro paha te mau melo o te amuiraa e matau maitai ia ratou iho ia nehenehe te hoê faaitoitoraa mau e tupu i nia i te tahi e te tahi (Heb. 10:24). E tauturu taua huru ra i te feia apî ia manaˈo e te farii-popou-hia ra ratou.