Parau apî no te vahi paturaa

Auê te oaoa ia ite i te mau ahuru rahiraa rave ohipa e haere ra ma te haaparuparu ore i te mau hopea hebedoma atoa i Toahotu no te pûpû i ta ratou tauturu i te paturaa. I te mea e ua fatata roa te mau ohipa rarahi i te oti, te tuhaa rahi roa ˈˈe e ravehia ra i teie nei, o te mau ohipa rii hopea ïa e te faaineineraa i roto i te fare. Teie râ, mea rahi â te ohipa e toe ra e eita e ore e e opua maite tatou i te faaoti i te mea o ta tatou i haamata. No reira, te tiaturi nei matou e e pahono outou ma te aau tae i te titauraa taa ê ta matou e faatae atu nei no te mau avaˈe i mua nei. E fanaˈo te tahi mau amuiraa i te hopoia taa ê e haere e piti taime i te avaˈe, no te mea e titau-taa-ê-hia te mau rave ohipa. Oia atoa, ua haamatahia hoê ohipa rahi i te pae no te tapiriraa auri e te titau atu nei matou ia rahi atu â te mau taeae aravihi o te tapao i to ratou iˈoa.

Te faahaamanaˈo atu nei matou e, i roto i te mau mahana o te hebedoma, e nehenehe atoa te mau rave ohipa o te mau amuiraa e haere atu e tauturu i nia i te vahi paturaa. E haamata te ohipa i te hora 7h30, e e navai noa ia tapao atu i to outou iˈoa ia tae atu outou i reira. E nehenehe outou e tamaa e te feia rave ohipa tamau o te vahi paturaa. E oia atoa, no te feia e aravihi taa ê to ratou i roto i te tuhaa no te paturaa e o te vata e piti aore ra e rave rahi atu â mau mahana, e nehenehe ratou e faaea roa i reira e e ora e te fetii o te paturaa fare. No reira, a tapao i to outou iˈoa na mua ˈˈe, na roto i te taniuniuraa ˈtu i te 53.27.68 (Tuhaa rave ohipa no te paturaa) aore ra i te 57.16.73.

Ei parau hopea, te hinaaro nei te mau taeae e te mau tuahine toroa faaunauna fenua, na ratou e haapao i te faanahoraa i te aua e te mau vahi e haaati ra i te Betela, e tanu i te tahi mau tumu raau hotu. Mai te peu e te vai ra ta outou te tahi, a taniuniu mai i te 53.27.68.

Te hinaaro mau nei matou e faaite atu i te tapao o to matou mauruuru no ta outou turu e to outou aau horoa maitai.