E te mau taurearea, a faatupu i te mau taairaa piri e o Iehova
1 Auê teie mau parau o te Salamo 24:3-5 (MN) i te faahiahia e: “Na vai e paiuma i te mouˈa o Iehova? O vai te tia i to ˈna ra vahi moˈa? Te taata rima mâ ra e te aau maitai; o tei ore [i hopoi i to ˈU nephe] i te parau haavare [ra], aore hoi i tǎpǔ ma te haavare. To ˈna te maitai e noaa mai no ǒ ia Iehova ra, e te parau-tia no ǒ i te Atua o to ˈna ra ora.” Oia mau, te hinaaro nei Iehova e ite i rotopu i to ˈna mau hoa, i te feia viivii ore e te hapa ore, te feia o te ore e ora e piti huru oraraa o te tǎpǔ ma te haavare. Mea oaoa ia ite e te tano nei teie faataaraa i nia i te hoê nahoa Kerisetiano apî i teie mahana. Te faahanahana mau nei ratou ia Iehova e ta ˈna faanahonahoraa. No to ratou viivii ore i te pae morare, mea nehenehe mau ratou i mua i te aro o te Atua.
2 Mea ohie anei na te mau taurearea ia vai viivii ore noa i te pae morare i teie mahana? Eita; i te mau mahana atoa, e faaruru ratou i te mau fifi. I roto i te ao nei, te itehia nei te hoê parareraa rahi o te mau ohipa faufau e te mau ohipa morare ore. Eaha ta ratou e nehenehe e rave no te paruru ia ratou? E mea faufaa roa ia faatupu ratou i te mau taairaa piri e o Iehova.
3 Te mea e titauhia ia outou ia rave: I te mea e e mea titauhia ia haafaufaa ma te haavare ore i te mau huru maitatai o Iehova e nehenehe ai e faatupu i te mau taairaa piri e o ˈna, ia ite ïa outou o vai mau na oia, e tia ˈi. E titau ïa te reira i te hoê haapiiraa hohonu o ta ˈna Parau maoti te mau papai bibilia. Mai ia Timoteo, te hinaaro ra outou e ia “faaamuhia [outou] i te parau i faaroohia nei, i taua parau maitai ta [outou] i ite papu na.” (Tim. 1, 4:6) Maoti taua haapiiraa ra e ite ai outou i “te maitai o Iehova.” (Sal. 27:4) E rahi noa ˈtu â to outou ite no nia ia ˈna, e rahi noa ˈtu â ïa to outou hinaaro e haafatata ˈtu ia ˈna.
4 E titau te faatupuraa i teie mau huru taairaa, i te taime e te mau tutavaraa. Teie ta Paulo i papai ia Timoteo: “E haamanaˈo papu i teie nei mau parau; o ta oe ïa e rave eiaha e faaea, ia ite te taata atoa i te tupuraa o to oe ite.” (Tim. 1, 4:15) Mai te peu e aitâ outou i bapetizohia ˈtura, a aratai i ta outou mau tutavaraa i te pûpûraa ia outou iho e te bapetizoraa. I te mea e ua fatata roa mai te hopea o teie faanahoraa nei, e mea titauhia ia haamau tatou i to tatou feruriraa i nia i to tatou ‘huru e tia ˈi i te paieti.’ (Pet. 2, 3:11) Mea faufaa roa ta tatou huru hiˈoraa ia Iehova, ei Atua no tatou e Oia tei horoa i te ora. Ia faatupu tatou i te mau taairaa piri e o Iehova, mai to te hoê tamarii e to ˈna metua tane ta ˈna e faatura e e here mau ra, e itehia ïa te reira i roto i ta tatou mau ohipa.—Mal. 1:6.
5 I roto i te faanahonahoraa a te Atua, te faaohipa ra tau ahuru tausani taurearea tane e taurearea vahine i to ratou puai, to ratou ito, e te faaite ra ratou i te manaˈo tae i roto i te ohipa pororaa. Te haere nei ratou i te mau putuputuraa i te Piha a te Basileia, ma te ineine i te horoa ˈtu i te mau pahonoraa faaineine-maitai-hia. Tau tausani o ratou teie e faaohipa nei i te puai o te apîraa i roto i te taviniraa pionie. I roto i te Maseli 20:29, te parauhia ra taua puai ra e faaohipahia nei “te hinuhinu o te taata apî ra.” Noa ˈtu e e mea titauhia ia ohipa puai i roto i te taviniraa a Iehova no te faatupu i te mau taairaa hohonu e te piri e o ˈna, eita te reira e mâuˈa!
6 E rave rahi i rotopu ia outou, e te mau taurearea, na to outou mau metua Kerisetiano i faaite ia outou i te eˈa i reira outou e haere ai. Ua faaite ratou ia outou e rave i teihea mau tuhaa ia vai noa i nia i te eˈa o te ora. A faaroo i to outou mau metua i te Fatu ra. (Eph. 6:1) Te here mau ra ratou ia outou e te hinaaro nei ratou e ia manuïa outou i roto i to outou oraraa. Te hinaaro nei ratou e ia tapae outou i roto i te ao apî; a tahoê atu ia ratou i roto i te porotarama haapiiraa ta ratou e faanaho nei. A faaô atu i nia i te eˈa o te parau mau. A haapii hau atu â no nia ia Iehova; e rahi noa ˈtu â ïa to outou here no ˈna e e oaoa ïa outou i te taviniraa ia ˈna e a muri noa ˈtu.