Uiraa a te feia taio

I roto i te ô i Edene, ua parau anei te Diabolo ia Eva e ora ˈtu te tahi mea i roto i te taata ia pohe o ˈna?

Aita. Aita te Diabolo i parau ia Eva e tamau te tahi mea i roto ia ˈna i te ora noa ˈtu e pohe o ˈna. Ua parau râ Satani ia Eva ma te faaohipa i te ophi, ia amu o ˈna i to te raau e ite ai i te maitai e te ino, ‘e ore roa o ˈna e pohe.’ Te parau ra ïa te Diabolo ia Eva, aita e faufaa ia faaroo i te Atua no te ora ma te oaoa e a muri noa ˈtu!—Gen. 2:17; 3:3-5.

Mai te peu e ere no ǒ mai i te ô i Edene, no ahia mai ra ïa te haapiiraa hape e ora ˈtu te tahi mea i roto i te taata ia pohe o ˈna? Aita tatou i papu. Ta tatou râ i ite, ua haamou-roa-hia te mau haapaoraa hape o tera ra tau i te diluvi. Aita hoê aˈe haapiiraa hape i toe mai! O Noa e to ˈna anaˈe utuafare tei tavini na i te Atua mau tei ora mai!

I muri aˈe roa i te diluvi, ua fa faahou mai te haapiiraa hape e ora ˈtu te tahi mea i roto i te taata ia pohe o ˈna. I te taime a faahuru ê ai te Atua i te mau reo i Babela, ua purara te taata i nia i “te fenua atoa.” Eita e ore na ratou i haaparare i tera haapiiraa hape. (Gen. 11:8, 9) Te mea râ ta tatou i papu maitai, o te Diabolo, “te metua no te haavare,” to muri mai i tera haapiiraa e ua oaoa roa oia a parare ai te reira na te ao atoa nei.—Ioa. 8:44.