Te faaroo: E huru maitai faufaa mau no te riro ei taata itoito

E NOAA mai te itoito i te hoê faaroo puai. Ia tamata Satani i te tuino i to tatou auhoaraa e o Iehova, e tia ia tatou ia tupohe i “te mau teˈa auahi atoa a te varua ino” maoti to tatou faaroo. (Eph. 6:16) Na te reira atoa e tauturu mai a faaruru ai tatou i te ati e au i te mouˈa ra te huru. Ua parau Iesu i ta ˈna mau pǐpǐ: “Ahiri to outou faaroo e mai te hoê huero sinapi te rahi, e parau outou i teie mouˈa, ‘A haere i ǒ atu,’ e haere iho â taua mouˈa ra.” (Mat. 17:20) E nehenehe mau te faaroo e haapuai ia tatou i te pae varua, mea maitai ïa ia uiui, ‘Eaha te faaroo? No te aha e titauhia te hoê aau farii no te faatupu i te faaroo? E nafea ia haapuai i to tatou faaroo? E faatupu tatou i te faaroo ia vai?’—Roma 4:3.

EAHA TE FAAROO?

No te faatupu i te faaroo, eita e navai noa ia ite i ta te Bibilia e parau ra. “Te tiaturi atoa ra te mau demoni [hoê anaˈe Atua] e te rûrû ra ratou.” (Iak. 2:19) Eaha mau na te faaroo?

Ia au i te Bibilia, e piti tuhaa to te faaroo. A tahi, o “te tiairaa papu ïa i te mau mea tiaturihia.” (Heb. 11:1a) E faaroo to te hoê taata ia tiaturi mau oia e parau mau anaˈe ta Iehova e e tupu te mau mea atoa ta ˈna i fafau. Teie ta Iehova i parau i to Iseraela: “Ia tia ia outou ia faaore mai i ta ˈu nei faufaa i te ao nei, e ta ˈu nei faufaa i te rui nei, e eiaha noa ˈtu ei ao e te rui i muri aˈe; ei reira ta ˈu faufaa i tau tavini nei ia Davida e ore atoa ˈi.” (Ier. 33:20, 21) Te haapeapea ra anei outou aita faahou e hitiraa e e toparaa mahana? Te mǎtaˈu ra anei outou eita te mahana e ohu faahou? Eita roa! Mea tano anei ïa ia manaˈo eita te mau parau a te Atua e tupu, na ˈna hoi i haamau i te mau ture papu o te natura?—Isa. 55:10, 11; Mat. 5:18.

Te piti o te tuhaa o te faaroo, o “te haapapuraa maramarama o te mau mea mau aita e itehia ra.” Te auraa, o te haapapuraa ïa o te mau mea e ore e ite-mata-hia, e mea mau râ. (Heb. 11:1b) A feruri na e nafea outou ia haapapu i te hoê tamarii mea mau te mataˈi. Eita te mataˈi e ite-mata-hia, e haaferuri ïa outou ia ˈna maoti te mau haapapuraa e vai nei. E faataa outou ia ˈna eaha te tupu ia puhi mai te mataˈi aore ra e faaite i te ohipa e hautiuti ra i te mataˈi. Ia ite te tamarii i tera mau haapapuraa, e farii oia e mea mau iho â te mataˈi. Oia atoa, e ere te faaroo i te vare-hanoa-raa i te hoê parau, o te iteraa râ i te haapapuraa o te reira.—Roma 1:20.

E TITAUHIA TE HOÊ AAU FARII I TE PARAU MAU

No te ite i te haapapuraa o te mau mea mau, e titauhia ia noaa i te taata “te ite papu i te parau mau.” (Tim. 1, 2:4) E navai anei râ? Aita. Te na ô ra te aposetolo Paulo: “Ia faatupu te hoê taata i te faaroo i roto i to ˈna aau.” (Roma 10:10) E titauhia ïa ia tiaturi e ia haafaufaa atoa râ i te parau mau. I reira te hoê taata e faaite ai e faaroo to ˈna, te auraa e rave oia i te ohipa e tuati i ta te Bibilia e haapii ra. (Iak. 2:20) Ia ore te hoê e haafaufaa i te parau mau, noa ˈtu te mau haapapuraa e horoahia ˈtu, e faaea noa iho â oia i nia i to ˈna mau manaˈo hape a imi atu ai i te otoheraa. (Pet. 2, 3:3, 4; Iuda 18) No reira te tahi mau taata i tahito i ore ai i faatupu i te faaroo noa ˈtu ua ite mata ratou i te mau semeio! (Num. 14:11; Ioa. 12:37) E faatupu te varua moˈa o te Atua i te faaroo i roto i te aau o te feia anaˈe e haafaufaa i te parau mau.—Gal. 5:22; Tes. 2, 2:10, 11.

TEI TAUTURU IA DAVIDA IA FAATUPU I TE FAAROO PUAI

Eita te faaroo e noaa noa mai mai tera, i te fanauraa aore ra no te mea e faaroo to te metua. E faaroo faahiahia mau to te arii Davida. (Heb. 11:32, 33) Na te reira i faataa ê ia ˈna i to ˈna matahiapo ra o Eliaba. I te hoê taime, ua paruparu te faaroo o Eliaba a faaino ai Golia i to Iseraela, e ua riri atoa i ta Davida mau parau i te tahua aroraa. (Sam. 1, 17:26-28) Eaha te tumu? No te mea aita oia i faatupu i te auhoaraa piri e o Iehova mai to ˈna taeae ra ia Davida.

I roto i te Salamo 27:1, ua faaite Davida i tei tauturu ia ˈna ia faatupu i te hoê faaroo puai. I te irava 2 e te 3, ua feruri maite Davida i ta Iehova i rave i nia i to ˈna mau enemi i roto i te mau tupuraa rau ta ˈna i farerei. I te irava 4, ua haafaufaa mau â oia i ta Iehova i faanaho no te haamori ia ˈna. I te irava 6, ua haamori amui Davida e to ˈna mau hoa faaroo ia Iehova i te sekene. I te irava 7 e 8, ua imi maite oia i te Atua na roto i te pure. I te irava 11, ua taparu atoa Davida ia haapii te Atua ia ˈna i to ˈna ra mau eˈa. Mea faufaa mau te faaroo no Davida i parau ai oia: “Ihea roa vau i teie nei ahiri aita to ˈu e faaroo?”—Sal. 27:13, New World Translation.

E NAFEA IA HAAPUAI I TO OUTOU FAAROO?

Ia puai to tatou faaroo mai to Davida, e titauhia ia faatupu i te hoê â feruriraa maitai e to ˈna e ia rave mai ta ˈna i faaite i roto i te Salamo 27. E titauhia te ite papu no te faatupu i te faaroo. Rahi atu â outou i te haapii i te Parau a te Atua e te mau papai a te tavini haapao maitai e te paari, ohie roa ˈtu â no outou ia faaite i tera huru maitai o te hotu o te varua o te Atua. (Sal. 1:2, 3) A rave atoa râ i te taime no te feruri maite ia rahi mai to outou mauruuru ia Iehova. E hinaaro atu â ïa outou e faaite i te faaroo ma te haamori ia ˈna i te mau putuputuraa e ma te faataa ia vetahi ê i ta outou e tiaturi ra. (Heb. 10:23-25) Hau atu â, “a tamau i te pure” ia Iehova ma te tiaturi papu “te tâuˈa mai ra oia ia outou.” (Tes. 1, 5:17; Pet. 1, 5:7) Eiaha e fiu i te na reira. (Luka 18:1-8) E turaihia ïa outou ia rave i te ohipa o te haapuai i to outou faaroo.—Iak. 2:22.

A FAATUPU I TE FAAROO IA IESU

I te po hou to ˈna poheraa, ua parau Iesu i ta ˈna mau pǐpǐ: “A faatupu i te faaroo i te Atua, a faatupu atoa i te faaroo ia ˈu.” (Ioa. 14:1) E titauhia ïa ia faatupu i te faaroo ia Iehova e ia Iesu atoa. E nafea ia faatupu i te faaroo ia Iesu? E hiˈo mai tatou e toru ravea.

A tahi, a farii ua horoa te Atua i te hoo no te taata tataitahi, no outou atoa ïa. Ua na ô te aposetolo Paulo: “Te ora nei au maoti to ˈu faaroo i te Tamaiti a te Atua o tei here ia ˈu e tei horoa ia ˈna iho no ˈu.” (Gal. 2:20) Ma te faatupu i te faaroo ia Iesu, e faaorehia ta outou hara e e fanaˈo outou i te tiaturiraa o te ora mure ore. E ere anei i te haapapuraa mea here na te Atua ia outou? (Roma 8:32, 38, 39; Eph. 1:7) E ere ïa i te mea tano ia faahapa noa ia outou iho.—Tes. 2, 2:16, 17.

A piti, a faafatata ia Iehova ma te pure ia ˈna maoti to outou faaroo i te tusia o Iesu. Maoti te hoo, e tia ia tatou ia paraparau roa ˈtu i te Atua, “ia itehia mai ia tatou te aroha e te hamani maitai rahi ia hinaaro tatou i te tauturu.” (Heb. 4:15, 16; 10:19-22) E faaitoito atoa mai te pure ia mau papu i mua i te faahemaraa.—Luka 22:40.

A toru, a auraro ia Iesu. Ua papai te aposetolo Ioane: “Te taata e faatupu i te faaroo i te Tamaiti, e fanaˈo ïa i te ora mure ore. Te taata e ore e faaroo i te Tamaiti, e ore ïa e ite i te ora, e vai mai râ te riri o te Atua i nia ia ˈna.” (Ioa. 3:36) Ua faahiti Ioane i “te taata e faatupu i te faaroo” e i “te taata e ore e faaroo i te Tamaiti.” No te aha? No te haapapu e faatupu te hoê i te faaroo ia Iesu ma te auraro ia ˈna. E nafea? Ma te haapao i “te ture a te Mesia,” oia hoi te mau mea atoa ta Iesu i haapii e i faaue i te rave. (Gal. 6:2) E auraro atoa outou ia Iesu ma te pee i te aratairaa ta ˈna e horoa mai ra na roto i “te tavini haapao maitai e te paari.” (Mat. 24:45) Ma te faaroo ia Iesu, e noaa ia outou te puai no te faaoromai tamau i te mau ati.—Luka 6:47, 48.

“A HAAPUAI I TO OUTOU FAAROO MOˈA ROA”

I te hoê mahana, ua tuô te hoê taata ia Iesu a na ô atu ai: “E faaroo to ˈu! A tauturu mai ia rahi atu â to ˈu faaroo!” (Mar. 9:24) E faaroo ê na to tera taata, ua farii râ oia ma te haehaa e hinaaro oia i te faaroo rahi aˈe! I roto i to tatou oraraa, e hinaaro atoa tatou i te faaroo puai. Te haamanaˈo ra outou eaha te titauhia ia rave? E haapii e e feruri maite anaˈe i te Parau a te Atua ia rahi mai to tatou mauruuru ia Iehova. E haamori amui anaˈe ia Iehova e to tatou mau hoa faaroo, e faaite anaˈe ia vetahi ê i ta tatou e tiaturi ra e e tamau anaˈe i te pure. Ia tutava tatou i te haapuai i to tatou faaroo, e fanaˈo tatou i te haamaitairaa rahi roa ˈˈe. Te na ô ra hoi te Bibilia: “Taeae here ma, a haapuai i to outou faaroo moˈa roa . . . a tamau ai i te rave i te mau mea e here ai te Atua ia outou.”—Iuda 20, 21.