E nafea ia haamata?

Eaha te tahi faanahoraa o te tauturu ia oe ia anaanatae e ia faufaa-atoa-hia i te taioraa Bibilia? A hiˈo na e pae manaˈo ta e rave rahi i tamata roa.

E taio i te vahi tano. A haere i te vahi aita e maniania. Eiaha te tahi mea ia faahuru ê i to feruriraa, e haapao noa ïa oe i ta oe e taio ra. Mea maitai aˈe ia haere i te hoê vahi maramarama maitai e te haumârû.

Te feruriraa maitai. I te mea no ǒ mai te Bibilia i to tatou Metua i te raˈi, e faufaahia oe i te reira ia riro oe mai te tamarii ra te huru o tei ineine i te haapii mai i to ˈna na metua î i te here. A tuu i te manaˈo feaa aore ra oti noa i te hiti ia haapii atu te Atua ia oe.—Salamo 25:4.

A pure na mua. O te mau manaˈo o te Atua to roto i te Bibilia, e ere ïa i te mea maere e titauhia ia ani i ta ˈna tauturu no te taa i te reira. Ua haapapu te Atua e horoa oia i “te Varua Maitai i te feia i ani atu ia ˈna.” (Luka 11:13) Na te varua moˈa e tauturu atu ia taa i te manaˈo o te Atua. Maoti te reira e taa roa ˈi ia oe “te mau mea hohonu atoa a te Atua.”—Korinetia 1, 2:10.

A taio no te taa. Eita e navai noa ia taio, e tia atoa ia feruri i ta oe e taio ra. A uiui, ‘Eaha te mau huru maitatai ta ˈu i ite i nia i te taata no ˈna teie aamu? E nafea vau ia faaite atoa i te reira i roto i to ˈu oraraa?’

A feruri i te tahi mau fa. Ia faufaahia oe i te taioraa Bibilia, a feruri e haapii atu te reira i te tahi mea o te haamaitai atu â i to oe oraraa. Teie paha te tahi fa ta oe e manaˈo ra, ‘E hinaaro vau e haapii atu â no nia i te Atua.’ Aore ra, ‘E tauturuhia vau ia riro ei taata maitai, ei tane e aore ra ei vahine maitai aˈe.’ I muri iho, ia naea tera mau fa ia oe, a maiti i te taio i te tahi mau tuhaa taa maitai o te Bibilia.a

E tauturu teie na e pae manaˈo ia haamata i te taio i te Bibilia. Eaha râ te rave ia anaanatae atu â oe i te reira? E horoahia te tahi mau ravea i roto i te tuhaa i mua ˈtu.