Eaha ta te Bibilia e parau ra?
Eaha te Basileia o te Atua?
TE MANAˈO O VETAHI Te hoê mea i roto i te aau o te taata. Area te tahi atu, o te ravea ta te taata e faaohipa no te hopoi mai i te hau e no te tahoê i te huitaata. Eaha to oe manaˈo?
TA TE BIBILIA E PARAU RA
“E faatupu . . . te Atua o te raˈi ra i te hoê basileia [aore ra Faatereraa arii], o te ore roa ïa e mou, e ore roa hoi e riro ia vetahi ê; e hope roa hoi taua mau basileia [a te taata] ra i te parari e e pau.” (Daniela 2:44) E faatereraa mau te Basileia o te Atua.
EAHA ˈTU Â TA TE BIBILIA E HAAPII MAI RA?
Mai te raˈi mai te Faatereraa arii a te Atua e faatere mai ai.—Mataio 10:7; Luka 10:9.
Tera te ravea ta te Atua e faaohipa no te faatupu i to ˈna hinaaro i te raˈi e te fenua.—Luka 11:2.
Afea te Faatereraa arii a te Atua e tae mai ai?
E PARAU ANEI OE . . .
Aita hoê aˈe taata i ite
Fatata roa
Eita roa e tae mai
TA TE BIBILIA E PARAU RA
“E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) Ia faaitehia te parau apî oaoa i te feia o te mau fenua atoa, i reira te Faatereraa arii a te Atua e tae mai ai no te haamou i teie nei ao ino.
EAHA ˈTU Â TA TE BIBILIA E HAAPII MAI RA?
Aita hoê aˈe i nia i te fenua o tei ite papu i te taime e tae mai ai te Faatereraa arii a te Atua.—Mareko 13:32.
Te faaite ra te mau parau tohu fatata te Faatereraa arii a te Atua i te tae mai.—Mataio 24:3, 7, 12.