Mea ino anei ia oto?

Ua roo-aˈena-hia anei oe te tahi maˈi? Peneiaˈe ua ora oioi mai oe e ua ore te mauiui. E ere râ hoê â huru no te oto. Ua papai te taote Alan Wolfelt i roto i ta ˈna buka: “O te mauiui ia pohe tei herehia te mea fifi roa ˈˈe ia faaoromai. E mǎrû mai râ te reira i te roaraa o te tau e maoti te tauturu a vetahi ê.”—Healing a Spouse’s Grieving Heart.

A hiˈo na i te huru o te patereareha Aberahama a pohe ai ta ˈna vahine. Te faatia ra te Bibilia “ua haamata Aberahama i te oto e te taˈi ia Sara.” (Genese 23:2; New World Translation) Ua titauhia ïa te taime ia ore to ˈna mauiui.a Te vai atoa ra te hiˈoraa o Iakoba tei oto no to ˈna tiaturi ua pohe ta ˈna tamaiti Iosepha i te amuhia e te tahi animara taehae. “E rave rahi te mahana,” ua oto oia e aita i tia i te fetii ia tamahanahana ia ˈna. Ua vai noa to ˈna mauiui noa ˈtu ua mairi tau matahiti.—Genese 37:34, 35; 42:36; 45:28.

I teie mahana, e rave rahi atoa o te oto ra a pohe ai te tahi taata o tei piri roa ia ratou. A hiˈopoa na hiˈoraa e piti i muri nei.

• “Ua pohe ta ˈu tane Robert i te 9 no Tiurai 2008. I tera poipoi, ua rave mâua mai tei matauhia. I muri aˈe i te taofe, ua haere oia i te ohipa, ua apa e ua tauahi mâua ia mâua a haapapu atu ai to mâua here i te tahi e te tahi. Ono matahiti i muri aˈe, te oto noa ra to ˈu aau. I to ˈu manaˈo, eita tera mauiui e ore.”—Gail, 60 matahiti.

• “Noa ˈtu ua pohe ta ˈu vahine a 18 matahiti i teie nei, te manaˈonaˈo e te oto noa ra vau ia ˈna. Ia ite au te tahi ohipa nehenehe mau, e manaˈo vau ia ˈna. E feruri au, e au atoa o ˈna i ta ˈu e mataitai ra ahiri tei pihai iho o ˈna ia ˈu.”—Etienne, 84 matahiti.

E mauiui e e manaˈonaˈo iho â tatou ia pohe tei herehia. Eiaha râ e inoino ia vetahi ê no to ratou huru i mua i tera ati, mea taa ê hoi te taata atoa. Eiaha atoa e faahapa ia tatou iho ia ore tatou e faaea oioi i te oto. Eaha te tamahanahana mai ia pohe tei herehia?