Parau tohu tei tupu noa iho â

NO TE AHA MEA TAA Ê AI TE BIBILIA? Ua matauhia te feia hiˈohiˈo i tahito ra no te tohu i te mau mea mea fifi ia taa e ia tiaturi. Mea ino roa ˈtu â te mau tohuraa tapao no teie tau. Ua niuhia te haapiiraa no te ite i te tau no a muri aˈe i nia i te mau huru tupuraa e itehia ra e e mea varavara te reira i te tohu i te mau tupuraa taa maitai tau senekele na mua ˈtu. Area râ i roto i te Bibilia, ua faataa-maitai-hia ïa e ua tupu noa iho â te mau parau tohu noa ˈtu e “mai mutaaiho mai â [te reira] i te faaiteraa i te mau mea aitâ i tupu.”—Isaia 46:10.

TE HOÊ HIˈORAA: I te senekele ono hou te Mesia, ua ite te peropheta Daniela i te hoê orama o tei tohu i te topa-oioi-raa o Medai Peresia ia Heleni. Ua faaite-atoa-hia e a “puai” ai te arii no Heleni, e “ofatihia” to ˈna mana arii. O vai te mono ia ˈna? Ua papai Daniela: “O na basileia ïa e maha e tia mai no roto i taua fenua ra, eita râ e au i to ˈna mana.”—Daniela 8:5-8, 20-22.

EAHA TA TE FEIA TUATAPAPA E PARAU RA? E 200 tiahapa matahiti i muri aˈe i te tau o Daniela, ua arii mai o Alexandre le Grand i nia ia Heleni. I roto noa ahuru matahiti, ua faatopa Alexandre i te Hau emepera Medai Peresia e ua aano roa mai te tuhaa fenua o te Hau emepera Heleni e ua tae roa i te anavai o Indus te iˈoa (i Pakitana i teie mahana). Ua pohe taue râ oia i te 32raa o to ˈna matahiti. I te pae hopea, ua amahamaha teie Hau emepera i te tupuraa te hoê tamaˈi i pihaiiho i te oire iti no Ipsus i Asia Iti. Ua tatuhaa na taata e maha tei upootia mai i te Hau emepera Heleni i rotopu ia ratou. Aita râ i noaa i te hoê noa ˈˈe o ratou te mana o Alexandre.

EAHA TO OE MANAˈO? Te vai ra anei i roto i te tahi atu buka te mau parau tohu tei tupu noa iho â? Aore ra i roto i te Bibilia anaˈe?