Afea mai te tamaˈi o Aramagedo?

“Hiˈo atura vau, e inaha e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa . . . i haere mai mai roto mai i te ati rahi.”—APOKALUPO 7:9, 14.

UA INEINE te mau mea atoa no te tamaˈi o Aramagedo. Mea nafea hoi?

Te vai ê na ra te hoê faanahonahoraa i nia i te fenua e tavini ra ia Iehova e e faaau ra i to ratou oraraa i te mau ture aveia morare teitei o te Bibilia. Maoti te turu a te Atua, ua riro e mirioni taata no te mau fenua, opu e reo atoa ei fetii taeae nehenehe mau e te here. Tera ïa te itehia ra i rotopu i te mau Ite no Iehova.—Ioane 13:35.

Fatata Satani i te haaputuputu i ta ˈna mau nuu no te aro faahope roa i teie nunaa hau e au ra e aita ratou e paruruhia ra. (Ezekiela 38:8-12; Apokalupo 16:13, 14, 16) Na te aha e haapapu ra i te reira? Te faataa ra te Bibilia i te mau tupuraa taa maitai e tauturu ia tatou ia ite afea mai te tamaˈi o Aramagedo. Te tupu nei e rave rahi.

Te mau tupuraa ta oe e ite ra

Ua ui atu te mau pǐpǐ ia Iesu e nafea te taata e ite ai e ua fatata “te hopea o teie nei ao.” (Mataio 24:3) Ua pahono atu Iesu ma te faaite i te hoê tau i reira e tia mai ai “te tahi fenua e aro mai i te tahi fenua, e te tahi basileia e aro mai i te tahi basileia; e oˈe hoi, e te maˈi, e e aueue fenua i tera vahi, i tera vahi.” Parau atura oia: “E matamehai anaˈe râ teie nei mau mea no te pohe.” (Mataio 24:7, 8) Ua faataa te aposetolo Paulo i teie atoa tau mai te “anotau hopea” i reira e itehia ˈi “te ati rahi.” (Timoteo 2, 3:1) No oe, te faataa ra anei teie mau parau tohu i te mau mea e tupu ra i teie mahana?

No te aha e anotau fifi ai teie? Ua tohu te aposetolo Ioane e e “riri rahi” to Satani a hurihia mai ai oia e ta ˈna mau demoni i nia i te fenua nei “maa taime poto.” (Apokalupo 12:7-12) Aita anei oe e ite ra i te huru feruriraa ino e te haavî o te taata, eiaha i te hoê noa vahi, na te ao atoa nei râ?

Ua faaite atoa Iesu e e ohipa faahiahia te ravehia i tera anotau fifi mau: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) I roto e 235 tiahapa fenua, te poro nei te mau Ite no Iehova i te evanelia o te Basileia o te Atua na roto hau atu e 500 reo. O ta ratou na vea e piti niuhia i nia i te Bibilia, Te Pare Tiairaa e te Réveillez-vous!, te mau vea opere-rahi-aˈe-hia na te ao. Ua huri atoa te mau Ite no Iehova i te Bibilia na roto e fatata 100 reo. Aita ratou e aufauhia ra no tera ohipa tei turu-noa-hia e te mau ô horoa noa. Te faatupu ra anei teie pororaa faahiahia na te ao atoa nei i te parau tohu a Iesu?

Te faataa atoa ra te Bibilia i te mau tupuraa o te aratai roa ˈtu i te tamaˈi i rotopu i te Atua ra o Iehova e te feia e patoi ra ia ˈna. A hiˈo na i teie na parau tohu e toru ta oe e ite i te tupu.

Te mau tupuraa ta oe e fatata i te ite

Parau tohu 1. Te na ô ra te Bibilia e i te hoê taime e parau te mau tia faatere o te ao: “E hau, e aita e ino.” E manaˈo ratou e fatata roa ratou i te faaafaro i te mau fifi ino roa ˈˈe. E ere roa ˈtu râ i te mea hau te mau tupuraa ta ratou e ite i muri noa mai.—Tesalonia 1, 5:1-3.

Parau tohu 2. I muri iho, e faaoti te mau faatereraa rau e tairi i te mau faaroo atoa. Te faataipe ra te Bibilia i teie mau faatereraa i te hoê puaa taehae, e i te mau haapaoraa hape a teie nei ao i te hoê vahine e parahi ra i nia i te puaa. (Apokalupo 17:3, 15-18) E rave te puaa taipe i to te Atua hinaaro ma te haamou i te mau faaroo e faahua tia ra no te Atua.

Teie ta te aposetolo Ioane e faataa ra ma te mau parau taipe: “E na tara hoê ahuru ta oe i hiˈo ra, e te puaa ra, e faufau ïa i taua faaturi ra, e e pau oia ia ratou i te haru, e e veve roa, e e amu i to ˈna tino, e e tutui ia ˈna i te auahi. Ua tuu hoi te Atua i te manaˈo i roto i to ratou aau.”—Apokalupo 17:16, 17.

Parau tohu 3. I muri aˈe i te haamouraahia te haapaoraa hape, e haaputuputu Satani i te mau faatereraa e nuu faehau no te aro i te feia e haamori ra i te Atua ra o Iehova.—Apokalupo 7:14; Mataio 24:21.

Eaha te faahopearaa no oe?

Mai te peu e aitâ oe i haapii roa ˈtu i te Bibilia, mea fifi paha no oe ia tiaturi e e tupu te mau parau tohu i faataahia i nia nei. E tumu maitai râ no te tiaturi e e tupu te mau parau rii atoa e ua fatata roa te reira. Na te mau parau tohu Bibilia e rave rahi tei tupu ê na e haapapu ra i te reira.a

No te aha te mau Ite no Iehova e papu ai e ua fatata roa “te tamaˈi i taua mahana rahi o te Atua Puai hope ra”? No te aha eiaha e mǎtaˈu i te reira? E nehenehe oe e faataa maa taime no te tauaparau e o ratou no te ite i ta te Bibilia e titau ra ia rave oe ia paruru-atoa-hia oe e Iehova. (Apokalupo 16:14) E taui ta oe e haapii mai i ta oe huru hiˈoraa i te tau no a muri aˈe.

[Nota i raro i te api]

[Parau iti faaôhia i te api 8]

Te faatupu ra anei te ohipa a te mau Ite no Iehova i te parau tohu Bibilia?