O vai te arii o teie nei ao?

I ROTO i te Ioane 12:31, ua na ô Iesu i te hoê nahoa taata e ‘e hee te arii o teie nei ao.’ Oia atoa ‘aore to te arii o teie nei ao e mana i nia ia ˈna’ e ua ‘faahapahia te arii o teie nei ao.’ (Ioane 14:30, Te Faufaa Api; 16:11) No vai teie parau?

Aita iho â Iesu e faahiti ra i to ˈna Metua, te Atua ra o Iehova. O vai ïa “te arii o teie nei ao”? E nafea oia e “hee” ai e mea nafea oia i ‘faahapahia ˈi’?

“Te arii o teie nei ao”

E pinepine te hoê tia ohipa ino i te faateniteni ia ˈna. Ua na reira atoa te Diabolo i to ˈna faahemaraa ia Iesu, te Tamaiti a te Atua, ma te faaite atu i “te mau basileia atoa” o te ao nei. Ua na ô oia: “E horoa ˈtu vau i te hau, e te hinuhinu i teie nei mau fenua ia oe, ua pûpûhia mai hoi teie ia ˈu, e na ˈu e horoa ˈtu na ta ˈu taata i hinaaro. E teie nei, ia tia ia oe i te tahopu mai ia ˈu nei, na oe anaˈe ïa.”—Luka 4:5-7.

Mai te peu e o te ino te Diabolo, mai ta vetahi i parau, e nafea ia faataa i teie faahemaraa? O te tahi manaˈo ino anei te faahema ra ia Iesu, aore ra o te ahoaho i roto ia ˈna tei tupu mai paha i muri aˈe i to ˈna bapetizoraa? E ere, te parau ra te Ioane 1, 3:5 e aore roa e hara i roto ia Iesu. Ua ite oia e e mana rahi to te Diabolo i nia i te huitaata ma te faataa ia ˈna ei “arii o teie nei ao,” oia atoa ei “taparahi taata” e te “haavare.”—Ioane 14:30; 8:44.

E 60 tiahapa matahiti i muri aˈe i to te Diabolo faahemaraa i te Mesia, ua haamanaˈo te aposetolo Ioane i te mau Kerisetiano e e mana rahi to te Diabolo. Ua na ô oia e “te vai noa nei to te ao atoa i raro aˈe i taua varua ino ra” o ‘te haavare ra i to te ao atoa nei.’ (Ioane 1, 5:19; Apokalupo 12:9) Ia au i te Bibilia, e varua itea ore “te arii o teie nei ao.” E nafea râ oia e mana ˈi i nia i te huitaata?

Demoni i raro aˈe i te mana o te arii o teie nei ao

No nia i te aroraa a te mau Kerisetiano no te faaroo, ua faataa maitai te aposetolo Paulo o vai ma to ratou mau enemi. Ua parau roa oia: “E ere hoi i te taata anaˈe ra ta tatou e to nei o te feia hau atoa râ, e te mana, e te mau tavana o teie nei ao pouri, e te mau varua iino i te reva nei.” (Ephesia 6:12) E ere ïa i “te taata” ta tatou e aro nei, i “te mau varua iino” râ.

“Te mau varua iino” i ǒ nei, o te mau melahi ino puai mau ïa, e ere râ i te ino. Te faaohipa ra ïa te Diabolo i to ˈna mana na roto i te tahi atu mau melahi orure hau, tei ‘faarue i to ratou parahiraa’ i te raˈi.—Iuda 6.

Mea nafea teie “mau tavana o teie nei ao” i te faatereraa i te ao nei mai tahito mai â? Te pahono maira te buka a Daniela. Ua haapeapea roa te peropheta no to ˈna mau hoa ati Iuda tei hoˈi i te matahiti 537 hou te Mesia i Ierusalema mai to ratou faatîtîraahia i Babulonia. Ua pure oia no ratou e toru hebedoma. Ua tono te Atua i te hoê melahi e tamahanahana ia ˈna. Ua faataa te melahi e ua maoro oia, no te mea ‘ua patoi te arii o te basileia o Peresia ia ˈna e piti ahuru ma hoê mahana.’—Daniela 10:2, 13.

O vai teie ‘arii no Peresia’ ta te melahi e parau ra? E ere ïa o Kuro, te arii Peresia tei farii maitai ia Daniela e to ˈna nunaa. O vai te tia ia faaû i te hoê melahi e toru hebedoma? E ere ïa te hoê arii taata. A haamanaˈo, ua pohe 185 000 faehau i te hoê noa melahi i te hoê noa rui. (Isaia 37:36) Teie ‘arii patoi no Peresia,’ e demoni ïa na te Diabolo o te faatere ra i te Hau emepera o Peresia. E ia au i te Daniela 10:20, ua aro â te melahi a te Atua i “te arii no Peresia” e i te tahi atu demoni, “te arii no Iavana,” aore ra Heleni.

Eaha ïa te nehenehe e parau? Te vai ra iho â ‘te mau tavana itea ore o teie nei ao,’ te mau arii demoni o te faatere ra i te ao nei i raro aˈe i te mana o to ratou arii, o Satani te Diabolo. Eaha ta ratou fa mai tahito mai â e tae roa mai i teie mahana?

Te huru mau o te arii o teie nei ao

I roto i te Apokalupo, te buka Bibilia hopea, te faaite ra te aposetolo Ioane i to Iesu, te melahi rahi ra o Mikaela, upootiaraa i nia i te Diabolo e ta ˈna mau demoni e te faahopearaa ino mau o to ratou tiavaruraahia mai te raˈi mai. Te taio ra tatou: “E ati ra hoi to te fenua . . . tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.”—Apokalupo 12:9, 12.

Mea nafea to te Diabolo faaiteraa i to ˈna riri rahi? E rave te feia ohipa ino mâha ore i te mau mea atoa ia noaa mai ta ratou e hinaaro. Te Diabolo atoa ïa e ta ˈna mau demoni. Ta ratou opuaraa, ia mou te fenua e te huitaata e o ratou. Ua ite te Diabolo e e maa taime poto to ˈna e toe nei, e te faaohipa ra oia i te tapihooraa ta ˈna e faatere ra. No te aha? No te turai i te taata ia hiaai rahi e hoo mai, a pau atu ai te mau faufaa a te natura, a ino atu ai te fenua e a fifi atu ai te oraraa o te taata.—Apokalupo 11:18; 18:11-17.

Mai tahito mai â te ite-atoa-raahia to te Diabolo hiaai i te mana i roto i te mau ohipa poritita e te faaroo. Te faaau ra te Apokalupo i te mau puai poritita i te hoê puaa taehae e “mana rahi” to ˈna no ǒ mai i te Diabolo ra. Te faataa atoa ra i te taairaa haama i rotopu i te poritita e te haapaoraa ei faaturi faufau mau i te pae varua. (Apokalupo 13:2; 17:1, 2) E rave rahi mirioni taata tei pohe no te haavîraa, te faatîtîraa, te tamaˈi e te mau aroraa i rotopu i te mau opu fetii i te roaraa o te tau. Ia hiˈohia te mau ohipa riaria e te huru ê i tupu, mea fifi roa ia parau e na te taata noa i rave. Aita anei e varua ino itea ore to muri mai?

Te faaite roa ra te Bibilia o vai te faatere ra i te mau aratai taata e te mau puai o te ao nei. Ma te ite aore ra aita, te faaite ra te huitaata i te huru o to ratou arii ma te rave i te mau mea atoa ia noaa mai ta ratou e hinaaro. E faaruru maoro â anei râ te huitaata i te faatereraa a te Diabolo?

E mou te Diabolo

Ua fatata te Diabolo e ta ˈna mau demoni i te mou. Ta te taviniraa ïa a te Mesia i te fenua i te senekele matamua i faaite. I to ta ˈna mau pǐpǐ faatiaraa e ua tiavaru ratou i te mau demoni, ua na ô Iesu: “Ua ite au ia Satani i te mairiraa, mai te uira no nia i te raˈi.” (Luka 10:18) Te oaoa ra ïa oia a tiai ai i te taime e upootia ˈi oia i nia i te arii o teie nei ao, i muri aˈe i to ˈna hoˈiraa i te raˈi ei Mikaela te melahi rahi. (Apokalupo 12:7-9) Ia faahohonu oe i te mau parau tohu Bibilia, e ite oe e ua tupu taua upootiaraa ra i te raˈi i te matahiti 1914 aore ra i muri iti noa ˈˈe.a

Mai 1914 mai ra to te Diabolo iteraa e ua fatata oia i te haamouhia. Te vai noa ra to te ao atoa i raro aˈe i to ˈna mana. Mea rahi râ i teie mahana tei ore i hema i ta ˈna mau tutavaraa tuutuu ore i te faatere ia ratou. Maoti te Bibilia i taa ˈi ia ratou te huru mau o te Diabolo e ta ˈna mau raveraa. (Korinetia 2, 2:11) Te tiaturi nei ratou i ta Paulo i papai i to ˈna mau hoa Kerisetiano: “Na te Atua hau e haaparuparu ia Satani i raro aˈe i to outou avae eita e mahia.”b—Roma 16:20.

Ua fatata te Diabolo i te mou! Ia faatere mai te Mesia ma te here, e faariro te feia parau-tia i te fenua ei paradaiso. Haavîraa uˈana, riri e nounou, aita faahou ïa. Te parau ra te Isaia 65:17 e ‘e ore tei mutaaihora e manaˈohia.’ Auê ïa tamǎrûraa no te feia atoa i tiamâ mai i te arii o teie nei ao e i to ˈna mana!

[Nota i raro i te api]

[Parau iti faaôhia i te api 9]

Ia faatere mai te Mesia ma te here, e faariro te feia parau-tia i te fenua ei paradaiso