O vai mau Iesu Mesia?
“E tae atura oia i roto i Ierusalema, aueue ihora taua oire atoa ra, e te taata atoa i te uiraa e, O vai teie? Ua parau atura taua tiaa rahi atoa ra, O Iesu teie, o te Peropheta o Nazareta i Galilea ra.”—MATAIO 21:10, 11.
NO TE aha teie aueueraa i to Iesu Mesiaa tomoraa i Ierusalema i taua mahana ra o te matahiti 33? Mea rahi tei faaroo i te parau no Iesu e i te mau mea faahiahia ta ˈna i rave, a faaite noa ˈtu ai ia vetahi ê. (Ioane 12:17-19) Aita râ te tiaa i ite e e atutu te parau o teie taata na te ao nei e tae roa mai ai i to tatou tau!
Ua ohipa puai Iesu i nia i te tuatapaparaa, teie te tahi mau hiˈoraa.
Ua niuhia te tarena faaohipahia i te fenua e rave rahi i nia i te matahiti i fanauhia ˈi paha Iesu.
E fatata e piti miria taata, oia hoi hau atu i te 30 % o te huitaata, e parau ra e e Kerisetiano ratou.
Te haapii ra te haapaoraa Mahometa, tei hau i te hoê miria melo na te ao nei, e e “peropheta rahi aˈe [o Iesu] ia Aberahama, Noa, e Mose.”
E faahiti pinepine tatou i te manaˈo o te mau parau paari a Iesu. Teie te tahi:
‘Ia riro ta oe oia ei oia, e ta oe aita ei aita.’—MATAIO 5:37.
‘A hiˈo i te raau rahi i roto i to oe iho mata.’—MATAIO 7:3.
‘A imi, e itea ïa ia oe.’—MATAIO 7:7.
‘Ta oe e hinaaro ia vetahi ê, ia na reira atoa ˈtu oe ia ratou.’—MATAIO 7:12.
‘Ta Kaisara ia Kaisara ra, e ta te Atua i te Atua ra.’—MATAIO 22:21.
‘A parahi e a feruri.’—LUKA 14:28.
Mea papu e ua ohipa Iesu i nia i te tuatapaparaa. E manaˈo e e haapiiraa taa ê râ to te taata no nia ia ˈna. E ui paha oe, ‘O vai mau Iesu Mesia?’ O te Bibilia anaˈe te faaite maira nohea mai Iesu, eaha to ˈna huru oraraa, e no te aha oia i pohe ai. E ohipa puai te iteraa i te parau mau no nia ia ˈna i nia i to oe oraraa i teie nei e no a muri aˈe.
a O “Iehova te faaora” te auraa o “Iesu,” te iˈoa o teie peropheta no Nazareta. E iˈoa toroa te taˈo “Mesia” o “Tei faatavaihia” te auraa, ei faaiteraa e na te Atua i faatavai, aore ra i faatoroa ia Iesu i te hoê tiaraa taa ê.