O vai te poro ra i te evanelia?

“E parau-haere-hia . . . e ati noa ˈˈe teie nei ao.”—MATAIO 24:14.

TE POROHIA ra te evanelia na te ao atoa nei e te mau Ite no Iehova ma te ravea rau. Te na reira ra ratou ma . . .

Te paraparau. Mai ia Iesu e i ta ˈna mau pǐpǐ, te haere ra te mau Ite no Iehova e faaite i te evanelia i te taata. (Luka 8:1; 10:1) Eita ratou e tiai e na te taata e haere mai. Te poro ra te mau Ite atoa, e hitu mirioni tiahapa ratou, i te Basileia o te Atua. Te na reira ra ratou na te mau fare, aroâ, niuniu paraparau, e te vai ra ˈtu â. I te matahiti i mairi, ua poro ratou hoê miria e te afa hora.

Aita noa ratou e haapii atu no nia i te Basileia o te Atua, no nia atoa râ i “te mau mea atoa ta [Iesu] i parau.” (Mataio 28:20) Te faatere tamau nei ratou hau atu i te vau mirioni haapiiraa Bibilia tamoni ore.

Te poro nei te mau Ite i roto e 236 fenua e ati aˈe te ao, i te taata o te mau huru oraraa atoa, i te mataeinaa e i te oire, na te mau ururaau no Amazonie i Marite Apatoa e no Sibérie i Rusia, e na te mau medebara i Afirika e te mau mouˈa Himalaya i Asia. Aita ratou e aufauhia no te poro. E faaohipa ratou i to ratou taime e ta ratou moni no to ratou here i te Atua e te taata-tupu. Te poro atoa ra te mau Ite i te evanelia maoti . . .

Te papai. Ua piahia teie vea, Te Pare Tiairaa e faaite ra i te Basileia o Iehova, i roto 185 reo e ua hau atu i te 42 mirioni te neneihia ra. Ua piahia te Réveillez-vous!, o te faaite atoa ra i te Basileia, i roto e 83 reo e fatata e 40 mirioni vea te neneihia ra.

E buka, buka rairai, api parau, CD e MP3, e DVD o te faataa ra i te mau haapiiraa Bibilia i roto e fatata e 540 reo. Ua faaineine e ua opere te mau Ite hau atu i te 20 miria o teie mau mauhaa i teie noa na ahuru matahiti i mairi, oia hoi e 3 no te taata taitahi i te fenua nei!

Ua nenei atoa te mau Ite no Iehova aore ra ua ani ia neneihia te huriraa Bibilia rau. Ua huri, nenei, e opere ratou i te huriraa Bibilia Les Saintes Écritures—Traduction du monde nouveau. E 96 reo te fanaˈo ra i te reira i roto i to ˈna taatoaraa aore ra hoê noa tuhaa. Ua operehia hau atu i te 166 mirioni Bibilia. Te faaite atoa ra te mau Ite i te evanelia o te Basileia . . .

I te mau putuputuraa Kerisetiano. E ere te mau putuputuraa tahebedoma i te Piha a te Basileia i te pureraa noa, o te haapiiraa râ te fa. E horoahia te mau oreroraa niuhia i nia i te Bibilia, e e hiˈopoahia te Parau a te Atua maoti Te Pare Tiairaa e te tahi atu mau papai. E haapii atoa te mau Ite ia aravihi atu â i te poro i te evanelia.

E hiˈopoa te mau Ite i te hoê â papai i roto hau atu 107 000 amuiraa na te ao, ei patururaa o to ratou auhoêraa. No te taatoaraa teie mau putuputuraa e aita e titauraa moni. Aita e faufaa te reira mai te peu e aita te mau Ite e faaohipa i ta ratou e poro. Te tutava ra ïa ratou i te faaite noa i te evanelia . . .

Ma to ratou iho hiˈoraa. Te tutava ra ratou i te faaite i te haerea maitai e au i te Kerisetiano, ma te haa i nia ia vetahi ê mai ta ratou e hinaaro ia na reirahia ratou. (Mataio 7:12) Noa ˈtu e mea tia ore ratou e i te tahi taime e hapa, te hinaaro mau ra ratou e haa ma te here i nia i te taata atoa eiaha noa ma te poro i te evanelia, ma te tauturu atoa ˈtu râ ia nehenehe.

Aita te mau Ite no Iehova e tamata ra i te taui i te ao e ta ratou pororaa. Ia ravehia râ tera ohipa ia au i to Iehova hinaaro e tae mai ai te hopea, mai ta Iesu i tohu. Eaha te auraa no te fenua e no te taata?

[Hohoˈa i te api 7]

Te porohia ra te evanelia na te ao atoa nei e te mau Ite no Iehova