Uiraa a te feia taio . . .

No te aha Satani i faaohipa ˈi i te hoê ophi no te paraparau ia Eva?

▪ E farii paha oe i tei parauhia i te api 8 e o Satani to muri i te ophi tei paraparau ia Eva. Ta te Bibilia iho â e haapii ra. E uiui paha oe, “No te aha te hoê varua puai i paraparau ai na roto i te hoê ophi?”

Ia au i te Bibilia e “ravea paari” ta Satani, o ta teie tupuraa ïa e haapapu maira. (Ephesia 6:11) E ere ta tatou i ite i Edene i te fabula no nia i te hoê animara e paraparau ra, e hiˈoraa riaria mau râ o te ravea aravihi ia fariu ê te taata i te Atua. E nafea?

Ua maiti maitai Satani o vai ta ˈna e haru. O Eva te mea ora maramarama apî roa ˈˈe. No to ˈna ite ore, o ˈna ta Satani i haavarevare e i faahema. Ma te mǎtaˈu ore, ua faaohipa oia i te hoê ophi, animara vai ara roa hoi, ia raea ta ˈna mau fa ahaaha. (Genese 3:1) A hiˈo atoa na i ta ˈna i faatupu a haaparaparau ai i te ophi.

Ua haru e ua tapea na mua oia i to Eva ara-maite-raa. Ua ite oia e eita te ophi e paraparau. Ua mairi ta ˈna tane i te iˈoa o te mau animara atoa, tae noa ˈtu teie, ma te hiˈopoa maitai atu. (Genese 2:19) Ta Eva atoa paha i rave e teie animara vai ara roa. Ua faaara maitai Satani i to ˈna anaanatae ia tiatonu oia i te mea noa tei opanihia ia ˈna i roto i te ô. Te piti, ahiri i na roto na te ophi i te mau amaa o te raau opanihia, eaha ta Eva e faaoti? Aita anei oia e manaˈo e ua amu teie animara vava i tera maa a paraparau atu ai? Ahiri ua ohipa roa teie maa i nia i te hoê ophi, eaha ˈtu â ïa i nia ia ˈna? Aita tatou i papu eaha to Eva manaˈo aore ra ua amu anei te ophi i te maa. I to te ophi râ parauraa ˈtu ia ˈna e e faariro te maa ia ˈna “mai te Atua ra te huru,” ua ineine oia i te tiaturi i te haavare.

Ua maiti maitai Satani i ta ˈna mau parau. Ua haafeaa oia ia Eva ma te parau e te faaere ra te Atua ia ˈna i te tahi mea maitai e te taotia faufaa ore ra i to ˈna tiamâraa. E manuïa Satani ia rahi aˈe to Eva miimii i to ˈna here i te Atua, tei horoa mai i ta ˈna e fanaˈo nei. (Genese 3:4, 5) Te vahi peapea, ua manuïa Satani. Aita Eva e Adamu atoa i atuatu i te here e te mauruuru e titauhia no Iehova i roto i to raua aau. Te faaitoito atoa ra Satani i teie huru miimii i teie mahana, e ere anei?

Eaha ïa ta Satani opuaraa? Ua aha oia i muri aˈe? I Edene, ua tamata oia i te huna ia ˈna e i ta ˈna opuaraa. I muri aˈe râ, ia ˈna i faahema ia Iesu, ua ite papu Satani e eita oia e nehenehe e huna ia ˈna. Ua faaue roa ˈtu ïa oia ia Iesu: “Ia tipapa mai oe i raro e haamori mai ia ˈu.” (Mataio 4:9) I pohehae noa na Satani e o te Atua ra o Iehova te haamorihia. E tutava oia i te haafariu ê i te taata e i te haapiˈo i taua haamoriraa ra. Mea au na ˈna ia turai ia tatou ia ofati i to tatou hapa ore i te Atua.

Te haamaramarama ra te Bibilia e mea aravihi roa Satani ia imi i te mau ravea ia pohe te taata. Auaa râ, eita tatou e vare mai Eva, “e ere hoi tatou i te ite ore i ta ˈna mau ravea.”—Korinetia 2, 2:11.