E mea ora tei te ao varua—o vai râ?

I Europa, te tomo ra te hoê vahine ruhiruhia i roto i te fare pure, ta ˈna korona i te rima, e e tuturi ma te faatura i mua i te tii o Maria. I Afirika, te ninii ra te hoê utuafare i te ava na te hiti o te menema o te hoê fetii faaturahia. I Marite ma, te haapae ra te hoê taurearea i te maa e te feruriruri ra no te paraparau i ta ˈna e tiaturi ra, to ˈna melahi tiai. I Asia, te tutui ra te hoê tahuˈa pure i te mau taoˈa papie ǔ rau na te mau varua o te mau tupuna.

EAHA to ratou taairaa? Te tiaturi ra ratou paatoa e e mea ora varua maramarama to nia o te tia ia paraparau atu e o te ohipa roa mai i nia i te taata. E ere te reira i te mea apî e te mea maere. Mea rahi roa râ te manaˈo tuea ore no nia i taua mau mea ora ra.

Hoê anaˈe Atua to te Mahometa: Allah.a E Atua Toru Tahi to te Amuiraa faaroo Kerisetiano: te Atua te Metua, te Atua te Tamaiti e te Atua te Varua Maitai. E tausani tiahapa atua e ruahine to te haapaoraa Initia. Tei roto te mau mea ora varua i te tahi mau animara, tumu raau, ofai e anavai, i ta vetahi atu parau. E na te mau buka, hohoˈa taviri e porotarama afata teata no nia i te mau melahi e demoni, tupapau, atua e ruahine e ohipa ra i nia ia vetahi ê.

Ua rau te manaˈo tuea ore no nia i te mau atua, ua rau atoa ïa te huru raveraa no te paraparau ia ratou. Ia feruri tatou, e ere teie mau ravea atoa i te mea tano. A hiˈo na: Hou a niuniu ai, ua ite tatou o vai ta tatou e niuniu ra e ua papu e te vai mau ra taua taata ra e e pahono mai oia. E mea maamaa ia tamata i te paraparau i te hoê taata feruri-noa-hia. E e mea atâta ˈtu â ia topa tatou i nia i te hoê taata haavare.

O vai mau ïa to nia? Te pahono e te faataa atoa ra te Bibilia o vai ta tatou e paraparau atu e eaha ta tatou e nehenehe e tiai. Ia taio oe i to muri nei tumu parau, e maere oe i ta te Bibilia e faaite ra.

[Nota i raro i te api]