Eaha te auraa ia matau maitai i te Atua?

E AURAA taa ê anei to to oe iˈoa? I te tahi mau fenua, mea matauhia ia horoa i te hoê iˈoa e auraa to ˈna i te hoê tamarii. E faaite paha te iˈoa i mairihia i te mau tiaturiraa e faufaa o te mau metua aore ra i ta ratou mau tiairaa no te ananahi o te tamarii.

E ere no teie nei teie peu. I tahito ra, e pinepine i te horoahia te iˈoa ia au i to ˈna auraa. E faaite paha te reira i ta te hoê taata e riro mai. Ei hiˈoraa, ia Iehova i parau ia Davida no nia i ta ta ˈna tamaiti e riro mai, ua na ô Oia: “E riro . . . oia i te mairihia ia Solomona [no roto mai i te hoê taˈo tumu e “hau” te auraa], na ˈu hoi e horoa mai i te hau e te parahi noa ia Iseraela i to ˈna ra anotau.”—Paraleipomeno 1, 22:9.

I te tahi mau taime, ua taui Iehova i te iˈoa o te tahi taata ia au i ta ˈna e riro mai. Ua mairihia ta Aberahama vahine fanau ore i te iˈoa Sara, o “tamahine hui arii” te auraa. No te aha? Ua faataa Iehova: “E haamaitai au ia ˈna, e e horoa vau i te tahi tamaiti no oe ia ˈna, e e haamaitai atoa vau ia ˈna: e riro hoi Sara ei metua no te mau fenua, e e hui arii atoa te fanau ia ˈna no te mau fenua.” (Genese 17:16) Papu maitai, e taa maitai aˈe ïa tatou i ta Sara e riro mai ia ite tatou no te aha i tauihia ˈi to ˈna iˈoa.

Eaha ïa no te iˈoa faufaa roa ˈˈe—Iehova? Eaha to ˈna auraa? I to Mose aniraa i te Atua i to ˈNa iˈoa, ua pahono aˈera Iehova: “Te vai nei au o vau e vai nei.” (Exodo 3:14) E rave rahi Bibilia te huri ra i ta Iehova pahonoraa mai teie. I roto râ i te huriraa a Rotherham, te taio ra tatou: “E riro vau mai ta ˈu e hinaaro.” Te faaite ra to Iehova iˈoa e e Atua oia o te riro mai i te mau mea atoa. Hoê noa hiˈoraa: I te mahana taitahi, no ta ˈna mau tamarii e i te taime e hinaarohia, e riro te hoê metua vahine ei tuati, tutu maa, orometua haapii e te vai ra ˈtu â. Hoê â atoa no Iehova, i nia i te hoê faito rahi aˈe râ. No te faatupu i ta ˈna opuaraa î i te here no te huitaata, e riro mai oia i ta ˈna e hinaaro ia au i tei titauhia. Te matau-maitai-raa ia Iehova, o te maramaramaraa e te mauruururaa ïa i te mau mea atoa ta ˈna e riro mai.

Te mea peapea, aita te feia i ore i matau maitai i te Atua e ite ra i to ˈNa huru faahiahia. Ma te haapii râ i te Bibilia, e ite oe i ta Iehova e riro mai, ei Aˈo paari, Faaora puai, Atua aau horoa noa, e te vai ra ˈtu â. E mea faahiahia mau te auraa o to Iehova iˈoa.

E ere noa râ i te mea ohie ia matau maitai i te Atua. No te aha? O ta to muri nei ïa tumu parau e faaite.