E nehenehe anei oe e matau maitai i te Atua?

E mea faahiahia ia fariihia tatou ia paraparau roa ˈtu i te hoê taata tiaraa teitei ma te faahiti i to ˈna iˈoa. E faaohipa-pinepine-hia te mau iˈoa toroa mai “E te Peretiteni e,” “E te Mana rahi e,” aore ra “E te Haava e.” Ia parau atu te hoê taata toroa teitei ia oe, “A pii noa mai na ia ˈu ma to ˈu iˈoa,” auê paha ïa oe i te faahiahia e!

TE PARAU maira te Atua mau i roto i ta ˈna Parau papaihia: “O vau o Iehova, o to ˈu ïa iˈoa.” (Isaia 42:8) E mea rahi to ˈna iˈoa toroa: “Tei hamani,” te “Puaihope,” te “Fatu” e te vai ra ˈtu â. Ua faatura noa râ oia i ta ˈna mau tavini taiva ore ma te faatia ia ratou ia faaohipa i to ˈna iˈoa.

Ei hiˈoraa, i te avariraahia te hiero i Ierusalema, ua omua te arii Solomona i ta ˈna pure ma te parau: “E Iehova e.” (Te mau arii 1, 8:22, 23) Ua taparu atoa te peropheta Elia i te Atua a na ô ai: “E faaroo mai oe, e Iehova.” (Te mau arii 1, 18:37) E i to te peropheta Isaia paraparauraa i te Atua no Iseraela, ua na ô oia: “O oe, e Iehova, o to matou ïa metua.” (Isaia 63:16) Oia mau, te ani maira to tatou Metua i te raˈi ia faahiti i to ˈna iˈoa.

E mea faufaa ia paraparau ia Iehova ma te faahiti i to ˈna iˈoa, e ere râ te matauraa ia ˈna i te reira anaˈe. Te fafau ra Iehova no te taata e here ra e e tiaturi ra ia ˈna: “E faateitei au ia ˈna i nia, no te mea te haapao ra oia i to ˈu nei iˈoa.” (Salamo 91:14) E au ra e aita e navai ia ite noa i to ˈNa iˈoa i te mea e e ravea faufaa teie ia paruru mai te Atua. Eaha ïa te titauhia ia matau maitai oe ia Iehova?