E haafatata ˈtu i te Atua
Tei faatupu i te mau parau fafau
MEA fifi roa anei no oe ia tiaturi ia vetahi ê? Ma te peapea, te ere nei teie nei ao i te tiaturi. Ia haavare mai aore ra ia ofati te hoê taata tiaturihia i ta ˈna parau, e ore roa paha to oe tiaturi ia ˈna. Te vai ra râ hoê ta oe e nehenehe e tiaturi e o te ore roa hoi e faainoino ia oe. “E tiaturi ia Iehova ma to aau atoa,” ta te Maseli 3:5 e faaitoito maira. No te aha e au ai ia Iehova to tatou tiaturi? E hiˈopoa anaˈe ïa i te mau parau a Iosua, o tei tiaturi roa ia Iehova, ia au i te Iosua 23:14.
Teie te tupuraa. Te fatata ˈtura Iosua, tei mono ia Mose ei aratai ia Iseraela, i te 110 matahiti. I te roaraa o to ˈna oraraa, ua ite roa ˈtu oia i te ohipa puai e rave rahi a Iehova no Iseraela, mai te faaoraraa semeio i te miti Uteute tau 60 matahiti na mua ˈtu. I teie nei, ma te haamanaˈo i te reira, te tii ra Iosua i to Iseraela ‘feia paari, feia tavana, feia haava, e feia toroa atoa.’ (Iosua 23:2) Te faaite ra ta ˈna mau parau i te manaˈo o te hoê aau î i te faaroo, eiaha noa te paari tei noaa ia ˈna no to ˈna matahiti rahi.
“Te haere nei au na te eˈa o to te ao atoa nei,” ta Iosua ïa e faataa ra. Ma te faaohipa i te parau faaau “te eˈa o to te ao atoa nei,” te pohe hoi, te parau nei Iosua, “Fatata roa vau i te pohe.” No reira, ua faaea paha oia e rave rahi hora o ˈna anaˈe i te manaˈonaˈoraa i to ˈna oraraa. Eaha ta ˈna mau parau hopea no to ˈna mau hoa haamori?
Te na ô faahou ra Iosua: “Aore roa te hoê o te mau mea maitatai ta to outou Atua ta Iehova i parau mai ia outou ra i ore i te tia; ua hope roa i te tupu ia outou, aore roa te hoê i toe.” E parau teie a te hoê taata tei tiaturi roa i te Atua. Te tumu? Ma te haamanaˈo i te mau mea atoa ta ˈna i ite, ua taa ia Iosua e e faatupu noa iho â Iehova i ta ˈNa i fafau.a Mea maramarama maitai ïa: te hinaaro ra Iosua ia tiaturi papu to ˈna mau hoa Iseraela e e tupu atoa te taatoaraa o te mau parau fafau a Iehova no to ratou a muri aˈe.
No nia i te Iosua 23:14, te na ô ra te hoê buka faahororaa Bibilia: “A faahiti i te parau fafau taitahi o te Bibilia; i muri iho, a hiˈopoa i te mau buka aamu o te ao nei; e a uiui no nia i te mau taata atoa e vai ra i roto, no te ite mai hoê noa ˈˈe hiˈoraa o to te Atua ofatiraa aore ra haamoeraa i te hoê parau fafau.” Ahani e ravehia na taua hiˈopoaraa ra, e faaoti atoa ïa tatou mai ia Iosua: aore roa te mau parau fafau a Iehova i ore i te tia.—Te mau arii 1, 8:56; Isaia 55:10, 11.
Te faatia ra te Bibilia i te mau parau fafau a te Atua tei tupu, vetahi atoa e tupu ra i mua i to tatou mata, e te mau mea faahiahia a Iehova e tupu no to tatou a muri aˈe.b A hiˈopoa i tera mau parau. E haapapu ta oe haapiiraa Bibilia e e au i Tei faatupu i te mau parau fafau to oe tiaturi.
[Nota i raro i te api]
a Teie te tahi noa mau parau fafau ta Iosua i ite roa ˈtu. E horoa Iehova i te hoê fenua no Iseraela. (A faaau i te Genese 12:7 e te Iosua 11:23.) E faaora Iehova ia Iseraela mai Aiphiti mai. (A faaau i te Exodo 3:8 e te Exodo 12:29-32.) E haapao Iehova i to ˈna nunaa.—A faaau i te Exodo 16:4, 13-15 e te Deuteronomi 8:3, 4.
b No te mau haamaramaramaraa hau no nia i te mau parau fafau a te Atua no to tatou a muri aˈe, a hiˈo i te mau pene 3, 7, e te 8 o te buka Eaha ta te Bibilia e haapii mau ra? piahia e te mau Ite no Iehova.