Uiraa a te feia taio
Te faaipoiporaa i te vahine rau, e farii anei te Atua?
Eita. Hoê tane no te hoê vahine, te ture aveia ïa a te Atua no te faaipoiporaa matamua i Edene. E ua haapapu â Iesu Mesia i tera ture aveia i ta ˈna mau pǐpǐ.—Genese 2:18-24; Mataio 19:4-6.
E ere anei e hou te Kerisetianoraa, ua hau atu i te hoê noa vahine ta Aberahama, Iakoba, Davida, e Solomona? Oia. Te nafea ra hoi te Bibilia no nia i taua faanahoraa ra? Ua tupu te umeumeraa e te tatamaˈiraa i roto i na utuafare o Aberahama e o Iakoba no teie peu. (Genese 16:1-4; 29:18–30:24) I muri aˈe, ua faaue te Ture a te Atua i te arii taitahi: “Eiaha . . . oia e faarahi i te vahine na ˈna, ia ore ia taiva tana aau.” (Deuteronomi 17:15, 17) Ua ofati Solomona i taua ture ra ma te faaipoipo atu e 700 tiahapa vahine! Ua taiva mau â to ˈna aau ia Iehova no te mana ino o ta ˈna vahine e rave rahi. (Arii 1, 11:1-4) Te faahapa mau ra ïa te Bibilia i te faaipoiporaa i te vahine rau.
E uiui râ paha vetahi e no te aha te Atua i faatia ˈi i te reira i rotopu i to ˈna nunaa. A hiˈo na: Aita anei outou i vaiiho na no te hoê taime poto i te tahi tuhaa o te hoê taihaa fare noa ˈtu e e titauhia ia taui? Ua feruri paha outou e eita e tano aore ra e fifi rii ia tatara ˈtu i teie nei. Mea teitei aˈe iho â to te Atua mau haerea e manaˈo i to tatou nei. (Isaia 55:8, 9) E nehenehe râ tatou e haroaroa i te tahi mau tumu papu i faatia ˈi oia no te hoê taime poto i te faaipoiporaa i te vahine rau.
A haamanaˈo na e i Edene, ua fafau Iehova i te hoê “huaai,” aore ra huero, o te haamou roa ia Satani. I muri aˈe, ua parauhia ia Aberahama e e riro oia ei metua o te hoê nunaa rahi e e na roto mai te Huero tohuhia i to ˈna opu fetii. (Genese 3:15; 22:18) Ua opua maite Satani i te haafifi i te taeraa mai o taua Huero ra. Ua tutava ˈtura hoi e haamou i te nunaa Iseraela i tahito ra. Ua turai pinepine oia ia Iseraela ia hara, ia ere ratou i te farii maitai e te parururaa a te Atua.
No te paruru ia Iseraela, a haamata ai ratou i te fariu ê i te mau ture aveia parau-tia, ua tono noa Iehova i ta ˈna mau peropheta no te faaara ˈtu ia ratou. Ua ite aˈena râ oia e pinepine to ˈna nunaa i te ore e faaroo i te mau faaueraa faufaa roa ˈˈe, o te opani atoa ra i te haamoriraa idolo. (Exodo 32:9) Mai te peu e e mea fifi no ratou ia auraro i te hoê ture faufaa roa, nafea ïa ratou no te ture e opani ra i te faaipoiporaa i te vahine rau? No to ˈna taa maitai i te naturaraa o te taata, ua ite Iehova e aita i tae atura i te taime no te opani i taua peu ra, tei haamau-maoro-hia na i taua tau ra. Ahiri oia i na reira, e itea mai ïa ia Satani te hoê ravea ohie roa no te turai ia Iseraela ia hara.
Te vai ra te tahi atu mau maitai i to te Atua faatiaraa maa taime poto i te faaipoiporaa i te vahine rau. Ua rahi oioi mai te nunaa, e maoti te reira i ora mai ai ratou e tae roa mai i te tau o te Mesia. E parururaa atoa te reira peu no vetahi mau vahine: e fanaˈo ïa ratou i te hoê nohoraa e te hoê utuafare i te tau atâta.
A haamanaˈo râ e e ere o Iehova te tumu o teie peu. Ua faatia oia i te reira no te hoê taime noa, a faature maite atu ai eiaha taua peu ra ia ravehia ma te tano ore. (Exodo 21:10, 11; Deuteronomi 21:15-17) I to Iehova faaotiraa e eiaha faahou tera peu i rotopu i ta ˈna feia haamori, ua faaohipa oia i ta ˈna iho Tamaiti no te haapapu â i te ture aveia o te faaipoiporaa i haamauhia i Edene. No reira Iesu i opani ai i te faaipoiporaa i te vahine rau i rotopu i ta ˈna mau pǐpǐ. (Mareko 10:8) Ua taa-maitai-hia ˈtura teie parau mau: Mea maitai te Ture a Mose i to ˈna ra tau, ua hau aˈe râ “te ture a te Mesia” i te maitai.—Galatia 6:2.