Uiraa a te feia taio

E faautuaraa anei te mau ati o te oraraa na te Atua?

Ua tupu anei te hoê fifi rahi i roto i to oe oraraa, a ui atu ai oe e e hinaaro anei tera no te Atua? No te hoê maˈi tupu taue, te hoê ati hapepa, aore ra te pohe manaˈo-ore-hia o te hoê melo utuafare, e manaˈo paha tatou e ua faaoti te Atua e faautua ia tatou.

Aita râ, e tamahanahanahia oe ia ite e te hinaaro nei te Atua ia oaoa te taata e ia ora ma te ino ore. Ei haapapuraa, i to te Atua poieteraa i na taata matamua, ua tuu oia ia raua i roto i te “ô i Edene,” te hoê paradaiso aore roa e ati.—Genese 2:15.

Ua faaoti râ na taata matamua e patoi i teie tiaturiraa faahiahia e ua opua e faaroo ore i te Atua. Mea ino roa te faahopearaa no raua e no te taatoaraa o to raua huaai, o tatou atoa ïa. No te aha? E nehenehe e faaauhia te reira i te ohipa e tupu ia ore te metua tane e aufau i te moni o te fare tarahu, e tiahihia ïa te utuafare taatoa e e roohia ratou i te fifi e te veve. Te faaruru atoa nei te huitaata i te ati mai te orureraa hau matamua mai â. (Roma 5:12) E rave rahi matahiti i muri aˈe, ua autâ Ioba taata parau-tia ahiri e ‘faitohia’ to ˈna oto e mauiui, “e iti ïa te one tahatai nei i te teiaha.”—Ioba 6:2, 3.

Te tahi atu tumu o te ati, aita tatou i feruri maitai na mua. Ei hiˈoraa, e hamani e e hoo atu paha te hoê tamuta i te fare i te hoê vahi e tupu pinepine te ati auahi. Ma te ite ore i te reira, e hoo mai oe i te hoê fare ei faaearaa. Aita anei ïa oe e tuu ra ia oe e to oe utuafare i roto i te ati rahi? Ia tupu mai te fifi, eita ïa e tano ia parau e e faautuaraa na te Atua, e ere anei? Te faaite ra te Bibilia i te parau mau: “Te faaroo ra te ite ore i te mau parau atoa ra; te hiˈo maitai ra râ te taata haapao ra i to ˈna taahiraa.”—Maseli 14:15.

Mea mahanahana ia ite e noa ˈtu e e roohia tatou pauroa i te ati, ua fatata roa râ te Atua i te faatiamâ i te huitaata. I reira, e ore roa oe e farerei, e ite mata, e e faaroo faahou i te ati. E “mou” te mihi, te oto, te pohe, e te hevaraa. (Apokalupo 21:4) Mea mahanahana atoa te parau fafau e e ore roa te taata e faatia i te fare e e tanu i te maa ia tuinohia e te tamaˈi aore ra te ati natura. Eita ïa, e “vai” maoro râ te mau mea ta ratou i hamani.—Isaia 65:21-25.

A tiai ai oe ia faaore roa te Atua i te mau ati, eaha ta oe e rave i teie nei no te faaiti mai i te mau faahopearaa ino o te reira? Te mea faufaa roa, “eiaha . . . e tiaturi i to oe ihora haapao,” aore ra maramarama, ta te Bibilia e aˈo ra, “e tiaturi [râ] ia Iehova ma to aau atoa.” (Maseli 3:5) A imi i ta ˈna aratairaa e tamahanahanaraa. A haapao maite i to ˈna paari tei papaihia i roto i te Bibilia. E tauturu te reira ia oe ia rave i te mau faaotiraa paari e e paruru ia oe i tera mau ati e nehenehe e apehia.—Maseli 22:3.