E taime teie no te maiti

“Hamani ihora . . . te Atua i te taata ma to ˈna ihora huru, i hamani oia ia ˈna ma te hohoˈa o te Atua ra; i hamani oia ia raua, o te tane e te vahine.”—Genese 1:27.

TE FAATAA ra teie mau parau matauhia i te mau api matamua o te Bibilia hoê o te mau mea rahi roa ˈˈe ta te Atua i ‘faanehenehe i te tau mau ra’—to ˈna poieteraa i na taata faaipoipo tia roa ra o Adamu raua Eva. (Koheleta 3:11) Ei Atua i poiete ia raua, ua parau Iehova ia raua e: “Ia fanau orua, e ia rahi roa, e faaî i te fenua nei, e e haavi iho; e ia mana orua i nia iho i te iˈa o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.”—Genese 1:28.

I roto i ta ˈna parau i na taata matamua, ua faaite te Atua i ta ˈna opuaraa ia raua. Ia faaî e ia aupuru raua i te fenua, o te riro ei nohoraa paradaiso no raua e no to raua huaai. Aita te Atua i faataa ê na i te taime e ora ˈi e e pohe ai raua. Ua tuu râ oia i mua ia raua i te hoê tiaturiraa faahiahia. Ia rave raua i te maitiraa maitai e ia pee maite raua i te Atua, e nehenehe raua e ora i roto i te hau e te oaoa mau e a muri noa ˈtu.

Ua rave raua i te maitiraa ino, e te faahopearaa, ua naea te taata atoa i te ruauraa e te pohe. Ua farii hoi te patereareha Ioba: “Area te taata ta te vahine e fanau nei, aita rea o ˈna pue mahana, e te î hoi i te peapea.” (Ioba 14:1) Eaha te fifi?

“No te taata hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa,” ta te Bibilia ïa e faataa ra. (Roma 5:12) O Adamu iho â taua “taata hoê” ra, o tei maiti roa i te ofati i te faaueraa ohie e te maramarama râ a te Atua. (Genese 2:17) Ua maiti Adamu i te faarue i ta ˈna ravea e ora e a muri noa ˈtu i nia i te hoê fenua paradaiso. Ua faaere atoa oia i to ˈna huaai i te hoê tufaa faufaa roa e ua tutuu na ratou i te utua o te hara e te pohe. E au ra e aita e ravea faahou, tera iho â anei?

E taime no te faaapî

E tausani matahiti i muri aˈe, ua faaurua te fatu salamo ia papai: “E parahi te feia parau-tia i nia i te fenua, e parahi tamau â ratou i reira.” (Salamo 37:29) No te haapapu e e tupu ta ˈna parau i fafau i Edene, ua faataa te Parau a te Atua ma te nehenehe i ta ˈna e fatata i te rave: “Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” E te parau ra te Atua iho e: “Inaha, te faaapî nei au i te mau mea atoa nei.”—Apokalupo 21:4, 5.

I te mea e e taime to te mau mea atoa, e hiti mai ïa te uiraa, Afea taua taime no te faaapîraa ra e tae mai ai, a tupu atu ai te mau parau fafau faahiahia a te Atua? Te tutava ra te feia nenei o teie vea, te mau Ite no Iehova, i te faaite i te taata e te ora nei tatou i ta te Bibilia e parau ra te “anotau hopea” e ua fatata te taime e haa ˈi te Atua no te ‘faaapî i te mau mea atoa.’ (Timoteo 2, 3:1) Te faaitoito nei matou ia oe ia hiˈopoa i te Bibilia e ia ite e e nehenehe oe e fanaˈo i te mau tiaturiraa faahiahia. Te faaitoito atoa nei matou ia oe ia farii i teie titau-manihini-raa: “E imi outou ia Iehova, oi itea ˈˈe oia, e tiaoro outou ia ˈna, oi fatata mai oia.” (Isaia 55:6) Aita to oe oraraa i faataa-ê-na-hia, tei ia oe noa râ te parau o to oe oraraa e tiaturiraa mure ore!

[Parau iti faaôhia i te api 8]

“Inaha, te faaapî nei au i te mau mea atoa nei”