E aratai papu pae varua anei to oe?

I TE 16raa o to ˈna matahiti, ua riro o Uzia ei arii o te basileia apatoa o Iuda. Ua faatere oia hau atu i te 50 matahiti i te maoro, mai te hopea o te senekele 9 e tae atu i te omuaraa o te senekele 8 H.T.T. Mai to Uzia apîraa, “ua rave oia i te parau tia i te aro o Iehova.” Na te aha i turai ia ˈna ia pee i te hoê haerea tia? Te na ô ra te faatiaraa e: ‘Te imi ra Uzia i te Atua i te oraraa o Zakaria ra, [te orometua haapii i te mǎtaˈu i te Atua mau] ra: e te imi ra oia ia Iehova ra, te horoa maira te Atua [mau] i te maitai no ˈna.’—Paraleipomeno 2, 26:1, 4, 5; MN.

Aita i rahi ta tatou i ite no nia ia Zakaria, te taata aˈo i te arii, maori râ i roto i teie faatiaraa bibilia. Teie râ, ei “orometua haapii i te mǎtaˈu i te Atua mau ra,” ua ohipa maitai o Zakaria i nia i te arii apî no te rave i te mea tia. Te faataa ra The Expositor’s Bible e eita e ore e “e taata matau [Zakaria] i te ite moˈa, aravihi i te pae varua, e o te nehenehe e tufa i to ˈna ite.” Ua faaoti te hoê aivanaa Bibilia no nia ia Zakaria e: “Ua ite maitai o ˈna i te parau tohu e . . . e taata maramarama, paieti, tia oia; e e au ra e ua ohipa rahi oia i nia ia Uzia.”

No to ˈna haerea taiva ore ua haamaitai-rahi-hia Uzia, e ua ‘etaeta roa oia’ no te mea ‘ua tauturu noa te Atua mau ia ˈna.’ Oia mau, ua niuhia te manuïaraa o ta ˈna mau tutavaraa i te pae tino i nia i ta ˈna tapi-maite-raa i te hoê haerea paieti “i te oraraa o Zakaria.” (Paraleipomeno 2, 26:6-8; MN) I to Uzia ruperuperaa, ua faarue oia i te mau haapiiraa a Zakaria, to ˈna aratai papu. ‘Ua teoteo aˈera Uzia e pohe tura: ua rave hoi oia i te hara ia Iehova.’ Ei faahopearaa o te hoê ohipa faatura ore roa, ua roohia oia i te hoê maˈi iri hairiiri o tei haaparuparu roa ia ˈna, e aita ˈtura oia i nehenehe faahou e rave pauroa i ta ˈna mau hopoia arii.—Paraleipomeno 2, 26:16-21.

E taata anei to oe o te nehenehe e parauhia e orometua haapii, e aratai papu, o te turai ra ia oe ia ‘imi i te Atua’? E nehenehe, noa ˈtu e e taata apî oe aore ra ua mairi oe i te taurearearaa, e tane oe aore ra e vahine. A poihere i taua aratai papu ra no te mea e nehenehe ta ˈna mau aˈoraa e tauturu ia oe ia rave noa i te mea tia i te aro o Iehova. A faaroo i tera Kerisetiano paari e a haapao maite i te aˈoraa ta ˈna e horoa ˈtu. Eiaha roa ˈtu oe e haafaufaa ore i te mau parau paari a taua “orometua haapii i te mǎtaˈu i te Atua mau ra.”—Maseli 1:5; 12:15; 19:20.