Eaha ta oe fa i roto i te oraraa?

UA OHIPA Kenny e te hoê taiete manuïa o te faaau i te tapihooraa, ua faahoro oia i te hoê pereoo uira moni rahi, e ua fatu i te hoê piha faaearaa unauna i te hoê vahi ona o te hoê oire rahi. Ei taata ouˈa amarara aravihi, ua oaoa roa oia i te ouˈaraa i te hoê teiteiraa tau tausani metera. E oraraa mauruuru anei to ˈna? Ia au i The Wall Street Journal, ua parau oia e: “E 45 matahiti to ˈu, e aita to ˈu e a muri aˈe. . . . Mea faufaa ore to ˈu oraraa.”

Ua haa puai Elyn no te riro mai ei vahine faahee aravihi i nia i te pape paari. Ua riro mai oia ei vahine faahee tuiroo i te pae hopea. Ua noaa ia ˈna te roo ta ˈna i hinaaro. “Teihea râ te oaoa atoa ta ˈu i manaˈo e fanaˈo?” ta ˈna ïa i autâ. “Ua moemoe roa vau. E ruhiruhia vau i te pae hopea e, noa ˈtu e mea navai au i te pae moni, e e faufaa ore roa to ˈu oraraa mai te peu e teie noa ta te oraraa nei e pûpû.”

I te mea e ua matauhia oia no to ˈna aravihi i te faaohipa i te mau ǔ, ua ora Hideo no ta ˈna mau manuïaraa i te pae anoihi. Aita oia i hoo atu i ta ˈna mau hohoˈa peni, ua feruri oia e e ofati to ˈna na reiraraa i to ˈna hapa ore i te pae anoihi. I te pae hopea o na matahiti e 98 o to ˈna oraraa, ua horoa oia ei ô i te rahiraa o ta ˈna mau hohoˈa peni na te hoê fare manaha. Ua pûpû oia i to ˈna ora no te mau tapiraa i te pae anoihi. Aita râ oia i mauruuru, a manaˈo ai oia e eita roa ˈtu oia e nehenehe e haamaitai hope roa i ta ˈna anoihi.

Te horoa rahi roa ra vetahi mau taata i te taime, te tutavaraa e te mau faufaa no te tauturu ia vetahi ê. A rave, ei hiˈoraa, i te hoê tia faatere i te pae tapihaa hohoˈa i Hollywood. Ei mono peretiteni o te hoê o te mau taiete hohoˈa taviri rahi roa ˈˈe i Marite, ua amui oia i te feia tuiroo e ua ora i te hoê vahi nohoraa moni rahi e te unauna. I to ˈna tereraa ˈtu i Cambodge no te hoê tau faafaaearaa, ua haere atu te hoê potii e taparu ia ˈna i te moni a tamaa ˈi oia i te hoê fare tamaaraa i Phnom Penh. Ua horoa ˈtu oia na ˈna hoê tara Marite e te hoê inu vaiharo. Ua oaoa te potii. I te po i muri aˈe râ, to reira faahou oia, e taparu noa ra. Ua ite oia e e ere te tahi noa tauturu iti tei hinaarohia.

Hoê matahiti i muri aˈe, ua faaoti teie tia faatere e taui i te toroa—te ohiparaa no te hoê tapihaa faaanaanataeraa i te tautururaa i te feia veve i Cambodge. Ua haamau oia i te hoê fare haapiiraa o te horoa i te nohoraa, te maa, e te haapiiraa. Teie râ, te aro tamau nei oia i to ˈna mau huru aau tuati ore—te oaoa e te mauruuru no ta ˈna e rave nei e te hepohepo e te inoino no te maraaraa o te mau fifi e mea tia ia faaruru oia.

Ua manaˈo na taata toomaha atoa i faahitihia iho nei e ua ite ratou i ta ratou i hinaaro e rave i roto i te oraraa. Ua ahoaho râ ratou i te naearaa ia ratou i te pae hopea te fa ta ratou i tutava rahi i te titau. No teihea mea e ora ˈi oe? Eaha ta oe fa matamua i roto i to oe oraraa? Ua papu anei ia oe e eita oe e tatarahapa i muri aˈe i te huru oraraa ta oe e ora nei?