Tapiraa i ta te Atua opuaraa i teie tau

‘I pohe te Mesia no te taata atoa, ia ore te feia e ora ra ia haapao faahou ia ratou iho i te oraraa nei.’—KORINETIA 2, 5:15.

1. A faatia na i te tupuraa o te hoê mitionare i roto i ta ˈna tuhaa taviniraa.

“TO MATOU te pereoo tivira matamua i tomo i roto i te hoê oire iti atea Afirika i te otiraa te tamaˈi tivira,” ta te hoê mitionare o Aaron te iˈoa ïa i haamanaˈo.a “Aita matou i nehenehe e paraparau faahou i te amuiraa iti i reira, e ua titauhia ia haapao matou i te mau hinaaro o te mau taeae. Hau atu â i te maa, te ahu, e te mau papai bibilia, ua afai atoa matou i te ripene video Les Témoins de Jéhovah: un nom, une organisation.b No te mea ua amui rahi mai te taata e anaanatae ra no te mataitai i te reira i ta te oire iti ‘fare teata’—te hoê fare aihere rahi e ta ˈna video e afata teata—ua pata ïa matou i te reira e piti taime. E rave rahi haapiiraa bibilia i noaa mai i na pataraa hohoˈa taitahi. Papu maitai, ua hoona ta matou mau tutavaraa atoa.”

2. (a) No te aha te mau Kerisetiano e faaoti ai i te faaohipa i to ratou ora no te tavini i te Atua? (b) Eaha te mau uiraa ta tatou e hiˈopoa mai?

² No te aha Aaron e to ˈna mau hoa i rave ai i tera ohipa fifi? No to ratou mauruuru no te tusia taraehara o Iesu Mesia, ua pûpû ratou i to ratou ora no te Atua e e hinaaro ratou e faaohipa i te reira ia au i ta te Atua opuaraa. Mai ia ratou, ua faaoti te mau Kerisetiano pûpûhia atoa ‘e ore e haapao faahou ia ratou iho i te oraraa nei’ e rave râ i tei maraa ia ratou “no te evanelia.” (Korinetia 2, 5:15; Korinetia 1, 9:23) Ua ite ratou e ia mou teie faanahoraa o te mau mea, aita to te moni e to te roo o teie nei ao e faufaa faahou. No reira ratou e hinaaro ai e faaohipa i to ratou ora e to ratou ea ia au i ta te Atua opuaraa. (Koheleta 12:1) E nafea ïa tatou? E nafea e noaa ˈi te itoito e te puai no te na reira? E eaha te mau ravea taviniraa e vai nei i mua ia tatou?

Raveraa i te mau taahiraa riirii e te au

3. Eaha te mau taahiraa matamua no te rave i to te Atua hinaaro?

³ No te mau Kerisetiano mau, e ohipa no te oraraa taatoa te raveraa i te hinaaro o te Atua. E haamata iho â te reira e te mau taahiraa matamua mai te faaôraa ˈtu i roto i te Haapiiraa o te taviniraa teotaratia, te taioraa i te Bibilia i te mau mahana atoa, te apitiraa i te pororaa, e tae roa ˈtu i te bapetizoraa. A haere ai tatou i mua, e haamanaˈo tatou i ta te aposetolo Paulo parau: “E haamanaˈo papu i teie nei mau parau; o ta oe ïa e rave eiaha e faaea, ia ite te taata atoa i te tupuraa o to oe ite.” (Timoteo 1, 4:15) E ere teie haereraa i mua i te faatietieraa ia tatou iho, e faaiteraa râ i ta tatou faaotiraa papu e rave i to te Atua hinaaro ma te pipiri ore. Ma te rave i teie haerea, te faaite nei ïa tatou e na te Atua e aratai ra i to tatou taahiraa i roto i te mau tuhaa atoa o te oraraa, e ua hope roa ta ˈna aratairaa i te maitai i ta tatou nei.—Salamo 32:8.

4. E nafea tatou e haavî ai i te riaria faufaa ore?

⁴ E nehenehe te manaˈo feaa aore ra te haapeapea-rahi-roa-raa no tatou iho e faataupupu i ta tatou haereraa i mua i roto i ta tatou taviniraa i te Atua. (Koheleta 11:4) No reira, hou tatou a ite ai i te oaoa mau i te taviniraa i te Atua e ia vetahi ê, ia haavî na mua tatou i to tatou iho riaria e tia ˈi. Ua manaˈo Erik, ei hiˈoraa, e tavini i roto i te hoê amuiraa reo ê. Ua manaˈonaˈo râ oia e: ‘E farii anei ratou ia ˈu? E au anei au i te mau taeae? E au anei ratou ia ˈu?’ Te faatia nei oia e: “Ua taa ˈtura ia ˈu e e mea tia ia haapeapea ˈtu â vau no te mau taeae i no ˈu iho nei. Ua faaoti au e faaea i te haapeapea e i te tiatonu noa ma te pipiri ore i tei maraa ia ˈu i te rave. Ua ani au i te tauturu na roto i te pure e ua haere au i mua. I teie nei, mea au roa na ˈu ta ˈu taviniraa i reira.” (Roma 4:20) Oia, a tavini noa ˈi tatou i te Atua e ia vetahi ê ma te pipiri ore, e ite tatou i te oaoa e te mauruuru.

5. No te aha e titauhia ˈi ia faanaho maite i te ohipa no te tapi i ta te Atua opuaraa? A horoa i te hoê hiˈoraa.

⁵ E titau atoa te tapiraa ma te manuïa i ta te Atua opuaraa ia faanaho maite tatou i ta tatou mau ohipa. Ma te paari eiaha ia rahi te tarahu a riro ai tatou ei tîtî no teie nei ao a fifi atu ai tatou i te rave i ta te Atua ohipa. Te haamanaˈo maira te Bibilia e: “Ua riro te tipee ra ei tavini no tei tipeehia.” (Maseli 22:7) E tauturu te tiaturiraa ia Iehova e te tapiraa na mua i te mau mea pae varua ia tatou ia tapea i te mea faufaa. Ei hiˈoraa, te ora ra o Guoming e ta ˈna na tuahine e piti e to ratou metua vahine i te hoê vahi e mea moni rahi te fare, e mea fifi ia noaa te hoê ohipa papu. Ma te faaohipa maite i te moni e ma te tufa i te mau haamâuˈaraa, e ravai noa ratou noa ˈtu e aita ta ratou paatoa e ohipa. “I te tahi mau taime, eita matou paatoa e aufauhia,” ta Guoming ïa e parau ra. “E nehenehe noa râ matou e tamau i te taviniraa pionie e e aupuru maitai atoa i to matou metua vahine. Ua mauruuru roa matou i te mea e aita o Mama i hinaaro ia haapae matou i te mau tapiraa pae varua no te horoa ˈtu i te hoê oraraa fanaˈo.”—Korinetia 2, 12:14; Hebera 13:5.

6. Eaha te hiˈoraa e faaite nei e nafea tatou e faatano ai i to tatou oraraa i nia i ta te Atua opuaraa?

⁶ Mai te peu e te tapi hua ra outou i to teie nei ao—te moni aore ra te tahi atu mea—e titau paha te tapiraa na mua i ta te Atua opuaraa e rave rahi faatanoraa. Eita teie mau tauiraa e nehenehe e rave-oioi-hia, e ia hape noa ˈtu outou i te haamataraa e ere ïa te auraa e aita outou i manuïa. A hiˈo na ia Koichi, o te pauraa te taime i te hautiraa to ˈna fifi. Ei taurearea, ua haapii Koichi i te Bibilia, na te mau hauti video râ i faatere i to ˈna oraraa e rave rahi matahiti. I te hoê mahana, ua parau o Koichi ia ˈna iho e: ‘Te aha ra oe? Ua 30 tiahapa matahiti to oe i teie nei, e aita hoi oe e rave nei i te tahi ohipa faufaa aˈe i roto i to oe oraraa!’ Ua rave faahou o Koichi i ta ˈna haapiiraa bibilia e ua farii i te tauturu a te amuiraa. Noa ˈtu e ua taui riirii noa o ˈna, aita oia i tuu. Ma te pure rahi e te turu î i te here a vetahi ê, ua matara ˈtura o ˈna i teie hinaaro uˈana. (Luka 11:9) I teie nei, e tavini tauturu oaoa o Koichi.

E haapii anaˈe ia vai faito noa

7. No te aha e titauhia ˈi ia vai faito noa i te raveraa i ta te Atua ohipa?

⁷ E titau te tapiraa i ta te Atua opuaraa i te tutavaraa ma to tatou nephe atoa. Eiaha roa tatou ia faaherehere ia tatou aore ra ia faatau i te na reiraraa. (Hebera 6:11, 12) Aita râ Iehova e hinaaro nei ia rohirohi roa tatou—i te pae tino, feruriraa, e aau. Ma te farii haehaa e eita tatou e nehenehe e faatupu i ta te Atua ohipa maoti noa to tatou puai, e faahanahana te reira ia ˈna e te faaite atoa nei ïa i to tatou vai faito noa. (Petero 1, 4:11) Te fafau ra Iehova i te horoa mai i te puai titauhia no te rave i to ˈna hinaaro, eiaha râ tatou ia horoa hau roa ˈtu i tei maraa ia tatou, ma te tamata i te rave i ta ˈna e ore e ani mai. (Korinetia 2, 4:7) Ia tavini noa tatou i te Atua ma te ore e rohirohi roa, e mea titauhia ia faaau tatou ma te paari i to tatou puai.

8. Eaha tei tupu i to te hoê potii tamataraa i te horoa i te mea maitai roa ˈˈe na teie nei ao e na Iehova, e eaha te faatanoraa ta ˈna i rave?

⁸ Ei hiˈoraa, ua rave uˈana o Ji Hye, o te ora nei i Asia Hitia o te râ, i te ohipa e piti matahiti i te maoro a tavini ai oia ei pionie. “Ua tamata vau i te horoa i te mea maitai roa ˈˈe na Iehova e na ta ˈu atoa ohipa,” te faatia nei oia, “e taoto râ vau e pae noa hora i te po. Ua paruparu roa ˈtura vau no te feruri i te parau mau, e ua iti to ˈu oaoa no te mau mea pae varua.” No te tavini ia Iehova ‘ma to ˈna aau, [nephe], manaˈo, e puai atoa,’ ua imi Ji Hye i te hoê ohipa o te ore e titau rahi i te taime. (Mareko 12:30; MN) “Noa ˈtu te faaheporaa a to ˈu utuafare ia monihia, ua faaitoito vau i te tapi na mua i ta te Atua opuaraa,” ta ˈna ïa e parau nei. “E navai noa iho â ta ˈu moni no te mau mea hiaai-matamua-hia, mai te ahu tano. E auê te au e ia taoto maoro ˈtu â! Te oaoa nei au i ta ˈu taviniraa, e mea puai aˈe au i te pae varua i teie nei. No te mea ïa aita vau e apiti rahi ra i te mau faaanaanataeraa e arearearaa a teie nei ao.”—Koheleta 4:6; Mataio 6:24, 28-30.

9. E nafea paha ta tatou mau tutavaraa e ohipa ˈi i nia i te taata i roto i te pororaa?

⁹ Eita paatoa e nehenehe e tavini i te Atua ei poro evanelia taime taatoa. Mai te peu e te faaruru nei outou i te matahiti rahi, te maˈi, aore ra te tahi atu mau taotiaraa, a haamanaˈo e te haafaufaa maitai nei Iehova i to outou haapao maitai e ta outou taviniraa aau atoa e pûpû atu. (Luka 21:2, 3) No reira, eiaha tatou e haafaufaa ore i te ohiparaa a ta tatou mau tutavaraa, noa ˈtu e mea iti, i nia ia vetahi ê. Ei hiˈoraa, a feruri na e ua haere tatou i te tahi mau fare e e au ra e aita e taata e anaanatae ra i ta tatou poroi. I te revaraa ˈtu tatou, e paraparau paha te mau fatu fare no nia i to tatou tere tau hora aore ra mahana i muri aˈe, noa ˈtu e aita hoê i iriti mai i te opani! Aita tatou e tiaturi nei e e farii maitai mai te mau taata atoa e faaroo nei i te parau apî maitai, e na reira râ vetahi. (Mataio 13:19-23) E farii paha vetahi i muri aˈe ia taui te mau tupuraa o teie nei ao aore ra o to ratou oraraa. Atira noa ˈtu, ma te rave i tei maraa ia tatou i roto i te taviniraa i mua i te taata, te rave nei tatou i ta te Atua ohipa. E ‘hoa rave ohipa tatou no te Atua.’—Korinetia 1, 3:9.

10. Eaha te mau ravea e vai nei i mua i te amuiraa taatoa?

¹⁰ Hau atu â, e nehenehe tatou paatoa e tauturu i to tatou mau melo utuafare e to tatou mau taeae e tuahine pae varua. (Galatia 6:10) E nehenehe to tatou mana maitai i nia ia vetahi ê e vai maoro e e puai. (Koheleta 11:1, 6) Ia amo maite te mau matahiapo e te mau tavini tauturu i ta ratou hopoia, te paturu nei ratou i te ea pae varua e te aueue-ore-raa o te amuiraa, e e maraa te ohipa Kerisetiano. Te haapapuhia maira e ia “rahi â te rave i te ohipa a te Fatu,” “e ere i te mea faufaa ore” ta tatou ohipa.—Korinetia 1, 15:58.

Tapiraa i ta te Atua opuaraa ei toroa

11. Taa ê atu i te haaraa e ta tatou amuiraa, eaha ˈtu â ta tatou ravea?

¹¹ Ei Kerisetiano, mea au na tatou te ora, e te hinaaro nei tatou e faahanahana i te Atua i roto i te mau mea atoa ta tatou e rave nei. (Korinetia 1, 10:31) Ia poro tatou ma te haapao maitai i te parau apî maitai o te Basileia e ia haapii tatou ia vetahi ê ia haapao i te mau mea atoa ta Iesu i faaue, e ite ïa tatou e rave rahi ravea taviniraa o te faaoaoa ia tatou. (Mataio 24:14; 28:19, 20) Taa ê atu i te haaraa e ta tatou amuiraa, e ravea ta tatou no te tavini i te vahi e hinaaro-rahi-hia te feia poro i te hoê vahi, reo, aore ra fenua ê. E titauhia paha te matahiapo e te tavini tauturu aravihi aitâ i faaipoipo ia haere i te Haapiiraa faaineineraa no te taviniraa, e i muri aˈe ia tavini i roto i te mau amuiraa e hinaaro-rahi-hia te Kerisetiano feruriraa paari, i to ratou iho fenua aore ra i te ara. E faaî paha te mau hoa faaipoipo tavini taime taatoa i te mau titauraa no te faaineineraa mitionare no Gileada e no te tavini i te ara. E te hinaaro-noa-hia nei te rima tauturu no te rave i te mau ohipa rau i te Betela e i te paturaa e tataîraa i te mau vahi putuputuraa e i te mau amaa.

12, 13. (a) E nafea oe e faaoti ai teihea huru taviniraa ta oe e tapi? (b) A faaite e nafea te aravihi i noaa mai i roto i te hoê tuhaa taviniraa e mea faufaa ˈi i roto i te tahi atu.

¹² Eaha te mau huru taviniraa e mea tia ˈi ia tapi oe? Ei tavini pûpûhia a Iehova, a tiatonu noa ia ˈna e i ta ˈna faanahonahoraa no te aratairaa. E tauturu to ˈna “varua maitai” ia oe ia rave i te faaotiraa tano. (Nehemia 9:20) E pinepine te hoê tuhaa taviniraa i te aratai atu i te tahi atu, e e nehenehe te ite e te aravihi i noaa mai e faaohipahia i muri aˈe no te tahi atu taviniraa.

¹³ Ei hiˈoraa, ua turu noa o Dennis e ta ˈna vahine o Jenny i te paturaa i te mau Piha a te Basileia. I muri aˈe i to te mataˈi rorofai Katrina tairiraa i te tuhaa apatoa no Marite, ua faaoti raua e tauturu i tei atihia. Te faatia nei o Dennis e: “Ua oaoa roa mâua i te faaohiparaa i te aravihi i noaa ia mâua i te paturaa i te mau Piha a te Basileia no te tauturu i to tatou mau taeae. Ua putapû roa mâua i te mauruuru o te feia ta mâua i tauturu. Aita te ohipa patu-faahou-raa a te tahi atu mau pǔpǔ tauturu i manuïa roa. Ua tataî aore ra ua patu ê na te mau Ite no Iehova hau atu i te 5 300 fare e e rave rahi Piha a te Basileia. Te ite ra te taata i te reira e i teie nei te anaanatae rahi nei ratou i te poroi o te Basileia.”

14. Eaha ta oe e rave mai te peu e te hinaaro nei oe e tapi i te taviniraa taime taatoa?

¹⁴ E nehenehe anei oe e tapi i ta te Atua opuaraa ma te maiti i te taviniraa taime taatoa ei toroa? Mai te peu e e, mea papu e e haamaitai-rahi-hia oe. Ia ore to oe nei huru oraraa e faatia ia oe ia na reira, e nehenehe paha ïa oe e faatano atu. A pure mai ia Nehemia a manaˈo ai oia e rave i te hoê ohipa faufaa: ‘E Iehova, e faatupu mai oe i te hinaaro o to tavini.’ (Nehemia 1:11) E ma te tiaturi i “tei faaroo i te pure,” a haa ia au i ta oe pure. (Salamo 65:2) Ia haamaitai Iehova i ta oe mau tutavaraa i te tavini atu â ia ˈna, e mea tia ia rave oe na mua i tera mau tutavaraa. Ia faaoti oe i te haamata i te taviniraa taime taatoa, a tapea i ta oe faaotiraa. A mairi ai te tau, e rahi mai to oe ite, e to oe oaoa atoa.

Te hoê oraraa faufaa mau

15. (a) E nafea tatou e faufaahia ˈi i te tauaparauraa i te mau tavini taime roa a te Atua e te taioraa i to ratou aamu? (b) A faahiti i te hoê aamu ta oe i manaˈo e mea faaitoito roa.

¹⁵ Eaha ta oe e tiai no te tapiraa i ta te Atua opuaraa? A tauaparau e te mau tavini taime roa a Iehova, tei tavini iho â râ e rave rahi matahiti ma te taime taatoa. E oraraa hoona e te faufaa mau to ratou! (Maseli 10:22) E faatia mai ratou e aore roa Iehova i mairi i te tauturu ia ratou i roto atoa i te mau tupuraa fifi ia noaa mai tei hinaaro-mau-hia e hau atu â. (Philipi 4:11-13, MN) Mai 1955 e tae atu i 1961, ua nenei te Tour de Garde i te aamu o te mau taeae haapao maitai i raro aˈe i te upoo parau “Comment je poursuis le but de ma vie.” Mai reira mai, e hanere aamu atu â tei neneihia. Te horoa nei teie mau aamu atoa i te feruriraa itoito rahi e te oaoa o te haamanaˈo maira i tei itehia i roto i te buka bibilia o te Ohipa. E turai te taioraa i teie mau aamu anaanatae mau ia oe ia parau e, ‘Tera mau te huru oraraa ta ˈu e hinaaro nei!’

16. Eaha te faariro i te oraraa o te hoê Kerisetiano ei mea faufaa e te oaoa?

¹⁶ Te haamanaˈo nei o Aaron, tei faahitihia i te omuaraa, e: “I Afirika, e pinepine au i te farerei i te mau taurearea overe haere na te fenua ma te imi i te hoê opuaraa no te oraraa. Aita roa ˈtu te rahiraa i ite i te reira. Ua tapi râ matou i ta te Atua opuaraa ma te faaite i te parau apî maitai o te Basileia, e ua fanaˈo matou i te hoê oraraa anaanatae mau e te faufaa. Ua ite roa matou e mea maitai i te horoa ˈtu i te rave mai.”—Ohipa 20:35.

17. No te aha e mea tia ˈi ia tapi tatou i ta te Atua opuaraa i teie nei?

¹⁷ E o outou? Teihea opuaraa ta outou e tapi nei? Mai te peu e aita ta outou e fa pae varua papu, e pau oioi to outou taime e puai i te tahi atu mau tapiraa. No te aha outou e haamâuˈa ˈi i to outou ora taoˈa rahi no te moemoeâ o te faanahoraa a Satani? Ia tairi te “ati rahi,” ua fatata hoi, e faufaa ore te taoˈa rahi e te tiaraa o teie nei ao. Te mea faufaa, o to tatou ïa taairaa e o Iehova. E mauruuru mau â tatou i te taviniraa i te Atua e ia vetahi ê e i te tapi-hope-raa i ta te Atua opuaraa i roto i to tatou oraraa!—Mataio 24:21; Apokalupo 7:14, 15.

[Nota i raro i te api]

E nehenehe anei oe e faataa?

• Eaha to Iehova huru aau i ta tatou taviniraa ia ˈna?

• E nafea te faaauraa i ta tatou ohipa e te vai-faito-noa-raa e tauturu ai ia tatou ia tavini i te Atua e ia vetahi ê?

• Eaha te mau ravea taviniraa e vai nei i mua ia tatou?

• E nafea tatou e ora ˈi i teie nei i te hoê oraraa e auraa mau to ˈna?

[Hohoˈa i te api 25]

Ia vai faito noa tatou no te tavini tamau ia Iehova ma to tatou nephe atoa

[Hohoˈa i te api 26]

Ua rau te huru o te taviniraa moˈa