Eaha te Basileia o te Atua?

AUÊ ïa ati riaria tei tairi i te huitaata i te omuaraa o te tuatapaparaa o te taata! Ua patoi te hoê melahi i te mana faatere o Tei poiete iho ia ˈna. Ua faahema tera orure hau i te vahine matamua ra ia Eva ia amu i te maa opanihia. Ma te faahiti ia ˈna e ta ˈna tane ra o Adamu, ua parau te melahi e: “E ore roa orua e pohe: ua ite hoi te Atua e, ua amu anaˈe orua i to reira, e araara ïa to orua mata, e e riro orua mai te Atua ra te huru, i te ite i te maitai e te ino.” (Genese 2:16, 17; 3:1-5) Ua parauhia ˈtura te melahi orure hau ra, Diabolo e Satani.—Apokalupo 12:9.

Ua haapao anei o Eva i te mau parau a Satani? Te parau maira te Bibilia e: “E ite aˈera te vahine, e raau maitai ei maa, e te au hoi i te mata ia hiˈo atu, e te raau hinaaro hoi ia noaa te ite; ua rave ihora oia i te maa no nia i taua raau ra, amu ihora, hopoi atura hoi i ta te tane, amu atoa ihora hoi oia.” (Genese 3:6) Oia, ua apiti atu na taata faaipoipo matamua, o Adamu e o Eva, ia Satani i roto i ta ˈna orureraa hau. Ei faahopearaa, ua ere raua e to raua huaai i te Paradaiso. Aita ˈtura ïa te mau tamarii i fanauhia mai ma te tia roa no te ora e a muri noa ˈtu, ua tufahia râ te hara e te pohe.—Roma 5:12.

E nafea ïa te Atua ra o Iehova, te Arii Rahi o te ao taatoa? Ua opua o ˈna e faanaho i te faaoreraa i te hara. (Roma 5:8) Ua haamau atoa te Atua ra o Iehova i te hoê faatereraa no te faatitiaifaro i te mau fifi. Ua parauhia tera faatereraa “te basileia o te Atua.”—Luka 21:31.