Tatararaa i te mau tapao e ohipa faufaa roa ïa!
“I te haamataraa, ua manaˈo vau e e maˈi upoo noa to ta mâua tamaiti o Andreas. Tera râ, aita o ˈna i poia e e fiva rahi to ˈna. Ua ino roa ˈtu te maˈi upoo, e ua haapeapea vau. I te hoˈiraa mai ta ˈu tane i te fare, ua afai mâua ia Andreas i te taote. Ua hiˈopoa oia i te mau tapao o te maˈi e ua afai-oioi-hia o Andreas i te fare maˈi. E fifi atu â i te hoê noa maˈi upoo. E ira tuiroro to Andreas. Ua rapaauhia o ˈna e aita i maoro ua afaro faahou mai oia.”—Gertrud, te hoê metua vahine no Heremani.
E TUPURAA matauhia paha to Gertrud e te metua e rave rahi. E hiˈopoa ratou i te mau tapao e faataa ra e e maˈi paha to ta ratou tamarii. Noa ˈtu e e ere te mau maˈi atoa i te mea atâta, eita te mau metua e nehenehe e tâuˈa ore i te mau tapao o te maˈi o ta ratou mau tamarii. E nehenehe te hiˈopoaraa i te mau tapao e te raveraa i te mau mea e au e ohipa maitai i nia i te tupuraa. E ohipa faufaa roa ïa.
E ere teie parau no te ea noa. Te vai ra te hiˈoraa o te ati tsunami i Titema 2004 i te mau vahi e haaati ra i te moana Inidia. Ua itea i te mau faanahonahoraa a te hau no Auteralia e no Vaihi te hoê aueueraa fenua rahi i Sumatra apatoerau e ua taa ia ratou te tupuraa atâta o te faahopearaa. Tera râ, aita ta te feia i tera mau vahi atâta e ravea no te fanaˈo aore ra no te pahono i te faaararaa atoa. Ei faahopearaa, hau atu i te 220 000 taata o tei pohe.
Te mau tapao faufaa roa ˈtu â
A vai ai Iesu Mesia i te fenua nei, ua horoa oia i te hoê haapiiraa na te feia e faaroo ra ia ˈna ia hiˈopoa i te mau tapao e ia ohipa ˈtu ia au i te reira. Ua paraparau oia no nia i te hoê ohipa faufaa roa ˈtu â. Te parau ra te Bibilia e: “Ua haere maira te mau Pharisea e te Sadukea ia ˈna ra, ua ani râmâ maira ia ˈna i te hoê tapao no nia i te raˈi. Ua parau atura oia ia ratou, na ô atura, Ia tae i te ahiahi ra, te parau na outou e, E riro i te raumai, e raˈi uraura. E ia poipoi ra, E verohia auanei; te uraura nei hoi te raˈi e te rumaruma. E te mau haavare e, te ite na outou i te hiˈo i te huru o te raˈi, aita râ outou e ite i te mau tapao o teie nei anotau?”—Mataio 16:1-3.
Na roto i te faahitiraa i “te mau tapao o teie nei anotau,” ua faataa Iesu e ua taa paha i te mau ati Iuda o te senekele matamua e faaroo ra ia ˈna e e anotau ru ta ratou e ora ra. Ua fatata te faanahoraa ati Iuda o te mau mea i te ite i te hoê ati rahi ta ratou pauroa e faaruru. Tau mahana na mua ˈtu i to ˈna poheraa, ua paraparau Iesu i ta ˈna mau pǐpǐ no nia i te tahi atu tapao—te tapao o to ˈna vairaa mai. E mea faufaa roa ta ˈna i parau i te reira taime no tatou pauroa i teie mahana.