Ia tupu anaˈe te hoê ati

TE HAUTI ra o Owen, te hoê tamaiti e piti matahiti e te afa, i roto i te fare pape i ǒ na. Ua tae o ˈna i te paiuma i nia i te hoê paepae vairaa raau ta to ˈna na metua i manaˈo e eita e raea ia ˈna. I rotopu i te mau mea e vai ra, ua ite o ˈna i te hoê mohina tei huti i to ˈna ara-maite-raa. Ua tatara oia i te reira e ua inu te mea e vai ra i roto. Ua tupu ihora te ati.

E acide aamu to roto i te mohina, e ma te peapea, ua pohe o Owen iti. Ua mauiui to ˈna na metua. Ua imi to ˈna metua tane, o Percy, i te tamahanahanaraa i roto i ta ˈna ekalesia. “No te aha te reira i tupu ai?” ta ˈna ïa i ui. Ua pahono te orometua, “Ua hinaaro te Atua i te tahi atu melahi i te raˈi.” Ma te peapea roa, ua manaˈo te metua oto e e mea tano ore roa te reira. Ua opua mau ra anei te Atua ia tupu teie huru ati? Ma te inoino, ua faaoti o Percy e faarue roa i ta ˈna ekalesia.

A feruri noa ˈi i te ohipa i tupu, ua uiui o Percy e: ‘Te mauiui ra anei ta ˈu tamaiti iti? E ite faahou anei au ia ˈna?’

Ua uiui atoa paha outou eaha te tupu mai i muri aˈe i te pohe e e nehenehe anei a muri aˈe e tahoê faahou atu i te feia herehia tei pohe. Te haamaramarama ra te Parau a te Atua, te Bibilia, i taua mau uiraa ra. I roto te vai ra te mau pahonoraa maramarama e te tamahanahana no te feia atoa i farerei i te mau ati mai teie. Hau atu â, te faaite ra te reira i te hoê tiaturiraa hanahana ta te Atua i fafau—te tia-faahou-raa.

A taio na i te tumu parau i te api 14 no te ite hau atu â i teie tiaturiraa faahiahia.