“Ua patoto mai e piti vahine i to mâua opani”

“A PITI matahiti to mâua oto-rahi-raa i te faarueraa mai ta mâua tamahine iti.” Teie ïa te omuaraa o te hoê rata na te huiraatira i roto i te vea ra Le Progrès, tei neneihia i te oire Saint-Étienne, i Farani.

“E toru avaˈe to Mélissa e ua roohia oia i te maˈi trisomie 18. Eita roa ˈtu oe e afaro mai i muri aˈe i taua ati ra e au ra e aita roa ˈtu i tano. Noa ˈtu e ua paari mâua i roto i te faaroo Katolika, ua manaˈonaˈo noa mâua e ‘E te Atua, mai te peu e te vai mau ra oe, no te aha oe e vaiiho ai i teie mau ohipa ia tupu?’” Papu maitai, ua oto roa te metua vahine o tei papai i teie rata e ua manaˈo e aita e ravea. Te na ô faahou ra ta ˈna rata e:

“Aita i maoro i muri aˈe i taua tupuraa ra, ua patoto mai e piti vahine i to mâua opani. Ua taa oioi ia ˈu e e Ite no Iehova raua. Ua ineine au i te faahoˈi ia raua ma te peu maitai, i muri iho râ, ua ite au i te hoê buka rairai ta raua e pûpû ra. Te faaite ra te buka rairai i te tumu te Atua e faatia ˈi i te mauiui. No reira, ua faaoti atura vau e faatomo mai ia raua ma te manaˈo e vavahi i ta raua mau parau. Ua manaˈo vau e ua mauiui roa ino to ˈu utuafare e ua navai roa i te faaroo i te mau parau faufaa ore mai teie te huru ‘Ua tuu mai te Atua ia ˈna e ua rave faahou atura ia ˈna.’ Ua faaea mai nau Ite hau atu i te hoê hora. Ua faaroo mai raua ia ˈu ma te aumihi rahi, e ia raua i faarue mai, ua maitai roa ˈˈe mai au e ua farii i te tahi atu farereiraa. A piti atura matahiti i teie nei. Aita vau i riro mai ei Ite no Iehova, ua haamata râ vau i te haapii i te Bibilia e o ratou, e te haere nei au i ta ratou mau putuputuraa i te mau taime atoa e nehenehe ai au.”