E tuhaa anei ta te tutuiraa i te mea noˈanoˈa i roto i te haamoriraa mau?

“E MEA au na te mau atua te mau mea noˈanoˈa.” E parau matauhia teie e to Aiphiti i tahito ra. No ratou, e mea faufaa roa te tutuiraa i te mea noˈanoˈa i roto i ta ratou haamoriraa. No to ratou manaˈo e tei pihai iho te mau atua, e tutui to Aiphiti i te mea noˈanoˈa i te mau mahana atoa i roto i ta ratou mau hiero e i nia i te mau fata i te fare e ia rave atoa ratou i te tapihooraa. Tera atoa te peu a te tahi atu mau nunaa.

Eaha te mea noˈanoˈa? E nehenehe e parau e o te au auahi aore ra te taoˈa i tutuihia. E mea hamanihia i te tapau noˈanoˈa, mai te libano e te zuri. E pâpâhia te reira e ia huˈahuˈa roa e e anoi-pinepine-hia e te tahi atu mau taoˈa mai te raau noˈanoˈa, te paa raau, e te tiare no te hamani i te tahi mau mea noˈanoˈa no te tahi mau faaohiparaa taa maitai.

No te mea e mea hinaaro-roa-hia te mea noˈanoˈa e e taoˈa faufaa roa i tahito ra, ua riro te mau anoi no te hamani i te reira ei mea faufaa i roto i te tapihooraa. E tari te tahi mau pǔpǔ taata tapihoo o te na nia i te mau purumu tapihoo, i te reira no te mau fenua atea mai. Te haamanaˈo ra paha outou e ua hoohia o Iosepha, te tamaiti apî a Iakoba, i te feia tapihoo ati Isemaela o ‘tei haere mai mai Gileada mai, ma ta ratou mau kamela, ma te tapau maitai, e toru atoa huru, oia te nakata, e te zuri, e te luta, i te hopoiraa i Aiphiti ra.’ (Genese 37:25) No te mea e mea ani-roa-hia te mea noˈanoˈa, ua matara te purumu tapihoo o te libano, tei haamatahia e te feia hoo i te mea noˈanoˈa, i rotopu ia Asia e ia Europa.

Te pûpû-noa-hia ra te mea noˈanoˈa i roto i te mau oroa e te mau peu a te haapaoraa e rave rahi i teie mahana. Hau atu â, te rahi noa ˈtura te taata e maiti ra i te tutui i te mea noˈanoˈa i ǒ ratou no te faanoˈanoˈa i to ratou fare. Eaha te manaˈo o te mau Kerisetiano no nia i te tutuiraa i te mea noˈanoˈa, e tia ˈi? E farii anei te Atua i te reira i roto i te haamoriraa? E hiˈo mai tatou eaha ta te Bibilia e parau ra.

‘Ei mea moˈa na Iehova’

I roto i te mau Iseraela i tahito ra, e tuhaa faufaa roa te tutuiraa i te mea noˈanoˈa i roto i te mau hopoia a te tahuˈa i te sekene. Te na ô ra te Cyclopedia a McClintock e a Strong e: “Oia mau, no te mea e ohipa haamoriraa aore ra e ô moˈa te tutuiraa i te mea noˈanoˈa no te mau Hebera, tera anaˈe ïa to ˈna faaohiparaa i roto ia ratou.”

Ua poroi te Atua ra o Iehova e anoi e maha mea noˈanoˈa e e tutui atu i te sekene: ‘E rave oe i te mea noˈanoˈa ra, i te natapha, e te sehelata, e te helebena, e te tapau libano maitai ra, o na mea noˈanoˈa ra ïa, ia faito atoa te rahi. O ta oe ïa e hamani ei mea noˈanoˈa, ei mea putu-maite-hia mai te ravea a te putu taoˈa noˈanoˈa ra, ia anoi-atoa-hia ei mea maitai, e te moˈa. E pâpâ oe e tahi pae e ia huˈahuˈa roa, a tuu ai i mua i te afata ture i te tiahapa o te amuiraa ra.’ (Exodo 30:34-36) Te parau ra te tahi mau aivanaa e i muri aˈe, ua tuu te mau rabi ati Iuda i te tahi atu mau mea i roto no te faaohipa ˈtu i roto i te hiero.

E mea moˈa te mea noˈanoˈa e tutuihia i te sekene, e e faaohipa-noa-hia i roto i te haamoriraa a te Atua. Ua poroi o Iehova e: “Teie nei raau noˈanoˈa ta oe e putu ra, eiaha ta outou iho e putuhia mai te reira te huru; ei mea moˈa ïa te reira ia oe na Iehova. O te putu i ta ˈna ra mai te reira te huru ei hoˈiraa na ˈna, e faataa-ê-hia ïa i to ˈna ra nunaa.” (Exodo 30:37, 38) I nia i te hoê fata i faataahia, e tutui te mau tahuˈa i te mea noˈanoˈa e piti taime i te mahana. (Paraleipomeno 2, 13:11) E i te Mahana taraehara, e tutui te tahuˈa rahi i te mea noˈanoˈa i roto i te vahi Moˈa Roa.—Levitiko 16:12, 13.

Aita te Atua i farii i te taatoaraa o te mau pûpûraa i te mea noˈanoˈa. Ua faautua oia i te feia e ere i te tahuˈa o tei pûpû atu ma te teoteo mai te mea ra e e tahuˈa ratou. (Numera 16:16-18, 35-40; Paraleipomeno 2, 26:16-20) Aita roa ˈtu o Iehova i au i te mea noˈanoˈa i pûpûhia e te nunaa ati Iuda, no te mea te rave atoa ra ratou i te mau ohipa haamoriraa hape e te haamanii ra to ratou rima i te toto. No to ratou huru haavarevare, ua parau o Iehova e: “Te mea noˈanoˈa ra, o ta ˈu ïa mea faufau.” (Isaia 1:13, 15) No to ratou tâuˈa ore rahi i te haamoriraa ta Iehova i poroi, ua opani aˈera ratou i te hiero e tutui atura i te mea noˈanoˈa i nia i te tahi atu mau fata. (Paraleipomeno 2, 28:24, 25) I muri aˈe, ua faaohipa-atoa-hia te mea noˈanoˈa moˈa i roto i te haamoriraa hairiiri i te mau atua hape. Ua inoino roa o Iehova i tera mau peu.—Ezekiela 16:2, 17, 18.

Te mea noˈanoˈa e te mau Kerisetiano matamua

Ua hope te faufaa o te Ture, e te faaueraa mana i te mau tahuˈa e pûpû i te mea noˈanoˈa moˈa, i to te Mesia haamanaraa i te faufaa apî i te matahiti 33 T.T. (Kolosa 2:14) Aita e faatiaraa e ua tutui te mau Kerisetiano matamua i te mea noˈanoˈa no te mau tumu faaroo. No nia i te reira, te na ô ra te Cyclopedia a McClintock e a Strong e: “E mea papu roa e aita te mea noˈanoˈa i faaohipahia [e te mau Kerisetiano matamua]. Oia mau, e tapao te faaohiparaa i te reira o te peu etene . . . Te tuuraa te hoê taata paieti maa mea noˈanoˈa i nia i te hoê fata etene, e ohipa haamoriraa ïa.”

Ua patoi atoa te mau Kerisetiano matamua i te tutui i te mea noˈanoˈa no te farii i te “atuaraa” o te emepera Roma, noa ˈtu e e nehenehe ratou e haapohehia. (Luka 4:8; Korinetia 1, 10:14, 20) Ia hiˈohia te faaohiparaa i te mea noˈanoˈa i roto i te haamoriraa idolo i taua tau ra, te taa ra ia tatou no te aha te mau Kerisetiano matamua i ore ai i faaô i roto i te tapihooraa i te mea noˈanoˈa.

Te tutuiraa i te mea noˈanoˈa i teie tau

Eaha te faaohiparaa o te mea noˈanoˈa i teie tau? I roto e rave rahi ekalesia a te Amuiraa faaroo Kerisetiano, te pûpûhia ra te mea noˈanoˈa i roto i te mau oroa e te rituria. E mea rahi te utuafare Asia o te tutui i te mea noˈanoˈa i roto i te mau fare pure aore ra i mua i te mau fata i ǒ ratou no te faahanahana i to ratou mau atua e no te paruru i tei pohe. I roto i te mau oroa pureraa, e faaohipahia te mea noˈanoˈa no te faaau auahi, no te faaora i te maˈi, no te tamâ, e no te paruru.

Ua faaohipa-rahi-faahou-hia aˈenei te mea noˈanoˈa e te feia aita ta ratou e haapaoraa. E tutui te tahi pae i te mea noˈanoˈa a feruriruri ai ratou. Te faaitoito ra te hoê buka i te faaohiparaa i te mea noˈanoˈa ia raea “te mau faito miterio o te hiroa” e “te mau ito” i rapae au i te ao materia. No te ite i te ravea e afaro ai te mau fifi o te oraraa, te poroi atoa ra te buka i te mau peu tutuiraa i te mea noˈanoˈa tei taaihia i te farereiraa i “te mau varua.” No te mau Kerisetiano anei tera mau peu?

Te faahapa etaeta maitai ra o Iehova i te feia e tamata i te anoi i te mau peu faaroo hape e te haamoriraa viivii ore. Ua faahiti te aposetolo Paulo i te parau tohu a Isaia, e ua faaau atu i te mau Kerisetiano, ma te faaitoito ia ratou ia ara i te mana viivii o te haapaoraa hape. Ua papai oia e: “Te na ô maira Iehova, E haere mai outou i rapae au mai roto mai ia ratou ra, ia taa ê outou, e eiaha e rave noa ˈtu i te mea viivii ra; e na ˈu e farii atu ia outou.” (Korinetia 2, 6:17; Isaia 52:11) Te tutava maite ra te mau Kerisetiano mau i te ape i te mau mea atoa tei taaihia i te haamoriraa hape aore ra te peu tahutahu.—Ioane 4:24.

I te mea e te faaohipahia ra te mea noˈanoˈa i roto i te mau oroa faaroo e te mau peu tahutahu, e mea ino anei ïa te taatoaraa o te tutuiraa i te mea noˈanoˈa? Eita. Peneiaˈe e hinaaro te hoê taata e tutui i te mea noˈanoˈa no te faanoˈanoˈa i to ˈna fare. (Maseli 27:9) E mea titauhia râ ia feruri te hoê Kerisetiano i te tahi mau mea no te faaoti e tutui i te mea noˈanoˈa. E faatuati anei vetahi ê i to outou vahi faaearaa i te faaohiparaa i te mea noˈanoˈa i te tahi peu faaroo hape? I ǒ outou, ua taai-pinepine-hia anei te mea noˈanoˈa i te tahi mau peu tahutahu? Aore ra te faaohipa-pinepine-hia ra anei te reira no te mau tumu e ere i ta te faaroo?

Ia faaoti te hoê taata e tutui i te mea noˈanoˈa, e mea titauhia ia tâuˈa oia i to ˈna iho manaˈo haava e to vetahi ê manaˈo. (Korinetia 1, 10:29) E tano te mau parau a te aposetolo Paulo i to Roma. Ua papai oia e: “E titau tatou i te parau hau, e te parau e maitai apipiti ai ra. Eiaha e faaorehia te ohipa a te Atua nei i te maa. E mea viivii ore hoi te mau mea atoa nei; e mea ino râ i te taata i amu ma te turori. E mea maitai hoi ia ore ia amu i te puaa, e ia ore ia inu i te uaina, e ia ore ia rave i te mau mea atoa e turori ai to taeae ra, e e maheaitu ai, e e paruparu ai hoi.”—Roma 14:19-21.

Te mau pure i ‘faaineinehia mai te mea hauˈa noˈanoˈa’

Te pûpûraa i te mea noˈanoˈa i roto i te mau Iseraela, e taipe tano ïa o te mau pure ta te Atua e faaroo. No reira te papai salamo ra o Davida i himene ai ia Iehova e: “Ia [faaineinehia] tau pure i mua ia oe mai te mea hauˈa noˈanoˈa.”—Salamo 141:2; MN.

E ere te pûpûraa i te mea noˈanoˈa i te peu faufaa ore no te mau Iseraela haapao maitai. Ua haapao maite ratou i te faaineineraa e te tutuiraa i te mea noˈanoˈa ia au i te raveraa ta Iehova i poroi. I teie mahana, aita te mau Kerisetiano e faaohipa ra i te mea noˈanoˈa mau, te pûpû ra râ i te mau pure o te faaite ra i to ratou mauruuru rahi e to ratou faatura rahi i to tatou Metua i te raˈi. Mai te mea hauˈa noˈanoˈa i pûpûhia e te mau tahuˈa i te hiero, te haapapu maira te Parau a te Atua e: ‘O te pure a te feia piˈo ore ra, e mea au ïa na ˈna.’—Maseli 15:8.

[Hohoˈa i te api 20]

E mea moˈa te mea noˈanoˈa e tutuihia i te sekene e i te hiero

[Hohoˈa i te api 21]

E tano anei te tutuiraa i te mea noˈanoˈa tei taaihia i te feruriruriraa no te mau Kerisetiano?