Te hoê buka pahi anaanatae roa

E PAE tere maimiraa na te Antarctique ta Richard Byrd i rave mai te matahiti 1928 e tae atu i te matahiti 1956. Maoti te tapaopao-maitai-raa i te tere, ua tia ia ˈna e to ˈna mau hoa ia faataa i te tere o te mataˈi, ia faaineine i te mau hohoˈa fenua, e ia noaa mai te mau haamaramaramaraa e rave rahi roa no nia i te fenua rahi Antarctique.

Te faataa ra te mau tere maimiraa a Byrd i te faufaaraa ia tapaopao i te tere. I roto i te buka tapaopaoraa, ua papaihia te mau parau rii o te hoê tere pahi aore ra te hoê tere manureva. E nehenehe tera mau haamaramaramaraa e faaohipahia i muri aˈe no te hiˈo faahou i te ohipa i tupu aore ra no te faahohonu i te mau haamaramaramaraa faufaa no te tahi atu â mau tere.

Te horoa ra te mau Papai i te hoê faatiaraa anaanatae roa o te diluvi i te tau o Noa. Ua tupu taua diluvi rahi ra hau atu i te hoê matahiti i te maoro. No te faaineine ia ratou no te diluvi, ua hamani o Noa, ta ˈna vahine, e ta raua na tamaiti e toru e ta ratou mau vahine i te hoê araka—te hoê pahi iti rahi fatata e 40 000 metera orapa—e 50 aore ra e 60 matahiti i te maoro. No te aha? No te faaora i te tahi mau taata e mau animara i te diluvi.—Genese 7:1-3.

Oia mau, i roto i te buka bibilia Genese, te vai ra tei parauhia te buka pahi a Noa o te faatia ra i te ohipa i tupu mai te haamataraa o te diluvi e tae roa i to ˈna e to ˈna utuafare faarueraa i te araka. Te vai ra anei te tahi mea faufaa no tatou i roto no teie mahana?