Ua haamaitaihia to ˈna tuutuu ore

E hinaaro te mau taata aau tia ia haapii tei herehia e ratou i te mau opuaraa a te Atua e ia fanaˈo i te hoê oraraa oaoa. Ia pûpû te hoê ia ˈna iho na te Atua, na vetahi ê paha, te feia apî e te feia paari, i tauturu ia ˈna ia rave i tera faaotiraa paari maoti to ratou haerea maitai. Tera ïa te tupuraa o Jearim, te hoê potii i Mehiko, o tei papai i te mau parau i muri nei e ta ˈna i horoa i te hoê mahana tairururaa taa ê a te mau Ite no Iehova:

“Te hinaaro nei au e faaite atu i to ˈu oaoa. E faatia ˈtu vau no te aha. A ahuru ma vau matahiti aˈenei, aita vau i fanauhia ˈtura, ua haapii to ˈu mau metua i te parau mau. Ua haere to ˈu mama i mua, e i muri aˈe, o mâua atoa to ˈu taeae. Ua pure amui matou ia Iehova ia haere atoa mai to ˈu papa i nia i te eˈa e tae atu ai i te ora. Ua mairi hoê ahuru ma vau matahiti, e e mahana taa ê roa teie no matou. E bapetizohia to ˈu papa. Te haamauruuru nei au ia Iehova e aita oia i haamou i teie nei ao hou a tae mai ai teie taime tiai-maoro-hia. Mauruuru, e Iehova!”

I te roaraa o te mau matahiti, mea papu e ua haamanaˈo te utuafare o teie potii i te mau faaueraa tumu i roto i te aˈoraa faauruahia o te Petero 1, 3:1, 2 o te na ô ra e: “E te mau vahine, e auraro maite i ta outou mau tane ra; e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ˈtu â te parau; i te hiˈoraa mai ratou i ta outou haapaoraa viivii ore i apiti-atoa-hia i te mǎtaˈu.” E eita e ore e ua faaohipa te potii ra o Jearim i te mau parau o te Deuteronomi 5:16: “E faatura ˈtu i to metua tane e to metua vahine, ta to Atua ra ta Iehova i parau mai ia oe ra.” Mea papu e ua hopoi mai te faaohiparaa i tera mau faaueraa tumu e te taviniraa ia Iehova ma te faaoromai i te mau haamaitairaa na Jearim e to ˈna utuafare.